ریڈیو زْرمبش بلوچی | ریڈیو زْرمبش بلوچی

مروچی بلوچ راجدوستیں راھشون نمیرانیں پِدا اھمد ءِ سی ءُ پنچمی سالروچ اِنت۔چہ مروچیگ ءَ سی ءُ پنچ سال پیش ، دو مئی 1988 ءَ ماں تربت ءَ پاکستان ءِ چیریں واکانی سرینگ ءُ پرماینگ ءَ لھتے کلپ ءُ بداں نمیرانیں پدا اھمد تیر جت ءُ شھید کرت۔ شھید پدا اھمد بلوچ راج ءِ مزن کرد ءُ شھسسائیں راھشوناں یکے اَت۔ ھما وھد ءَ واجہ ابدل نبی بنگلزھی بی ایس او ( اوامی ) ءِ سرکماش اَت ، شھید پدا اھمد ءَ بی ایس او ءِ کارگشادی ءِ اگدہ گون اَت۔ بلے راست ءُ تچکیں گپ ایش اِنت کہ بی ایس او ءِ بنجاھی سرگرمی ءُ راھشونی ءِ درسیں زمہ واری شھید پدا ءِ کوپگ ءَ اَت اَنت۔آئی ءَ دیمتر ءَ گوں ھمراھاں بی این وائی ایم ءِ جوڑ کنگ ءَ مزنیں کردے پیلو کرت۔ گْوش اَنت کہ شھید پدا اھمد چہ شھید گلام مھمد ءَ پیش در پارلیمانی سیاست ءِ منوگر اَت ءُ آئی ءِ کوش ءِ پژدر ھم ھمیش اَت کہ آ زمانگ ءَ لھتے مردم ترسگ ءَ اَت اَنت کہ پدا اھمد ماں بلوچستان ءَ پاکستانی پارلیمانی سیاست ءِ دیم ءَ میلانک بیت۔ دو مئی ءَ لھتے برات کشیں بلوچ سیاستدان وتی پندل ءَ سوبین بوت اَنت ءُ آیاں شھید پدا اھمد ، شھید کرت چہ ایشی ءَ بلوچ راج چہ مزنیں راھشونے ءَ زبھر بوت۔

بنشون: کارگِس اھوالکار /اکس: دامگ