ریڈیو زْرمبش بلوچی | ریڈیو زْرمبش بلوچی

شال: بلوچ یکجھتی کمیٹی ءِ سروکاں مرچی شال پریس کلب ءَ پریس کانپریس کرتگ ءُ گوشتگ کہ دیر اِنت کہ شُما کار ءَ اِت مئے پریس کانپریس ءِ مول ءَ گیشتر سرپد بہ اِت کہ ما اد ءَ پرچہ ءُ کجام مول ءَ کائیں ءُ ھمک وھد ءَ شمئے ھواری ءَ ریاست ءِ درسیں ادارھاں وتی لوٹ ءُ بلوچستان ءَ برجاھیں مردمی اگبالانی ناھکیں لپاشگ ءِ بارو ءَ سرپد کن ایں۔ بلے مردمی اگبالانی لپاشگ ءِ بند کنگ ءُ بلوچستان ءِ مردمانی کمک کنگ ءَ اَبید ھمک گوستگیں ماہ ءَ درکانودی ریاستی زوراکیانی تہ ءَ تیزی گندگ بوگ ءَ اِنت۔ آئی ءَ گوشتگ کہ بلوچستان ءِ جھمننداں اے وھد ءَ ریاست ءِ لشکر، چیریں ادارہ، سرکاری کشندہ ٹولی ریاست ءِ چیردستی ءَ تچک ءَ میارباریں ٹولیانی زوراکیانی دیمپانی اِنت ءُ رستری، درکانودی، بے دودی ءُ ھمک وڑیں ناھکیانی دْرچ ھلاسی ءِ نام ءَ نہ زان اَنت۔ ھمک روچ گساں بیڑ برگ، لشکرکشی ءِ نام ءَ چادر ءُ چاردیوالیانی لپاشگ، زوریں بیگواھی، دروگین میڑ، نشانگ کنگ، آزار دیگ، پانگساں دلسیاہ کنگ، میارباریں مردمانی دست ءَ آوار جنگ، زر گرگ ءُ آدگہ میارباریاں ھوار ھر پیمیں زوراکی ءُ ناشرکاریانی درچ برجاہ اِنت۔ آئی ءَ گوشتگ کہ ریاستی زوراکی شونداتانی سوب ءَ اے وھد ءَ بلوچستان ءَ ناگیگیں جاور ودی بیتگ، چہ ایشی ءَ بلوچستان ءِ گِس گس سانمند اِنت۔ ریاستی زوراکیانی بگیری ءَ سرجمیں بلوچستان ءَ زھرشانی برجاہ اَنت۔ بلے بلوچستان ءِ بارو ءَ آمیدگس ءَ بگر داں رسانکدر ءَ درس تُک ءُ نُک اَنت۔ آئی ءَ گوشتگ کہ مرچی مئے پریس کانپریس ءِ مول جولائی ءِ ماہ ءَ ریاستی میارباری ءُ بلوچستان ءَ برجاھیں مردمی اگبالانی ناھکیں لپاشگ ءِ بگیری ءَ گزارشے شمئے دیم ءَ ایر کنگی اِنت۔ آئی ءَ گوشتگ کہ اے ماہ ءَ 43 مردم ءَ گیش زوریں بیگواھی ءِ نشانگ کنگ بیتگ، شش ءَ گیش ژانگولیں جون دزکپتگ۔ چہ ایشی ءَ اَبید چاگے ءَ وتگڑیں جرگہ ٹولی ءِ دستاں یک جنینے کشگ بیتگ، وڈ ءَ کشندہ ٹولی ءُ لشکر ءِ چیردستی ءَ باجگری، کشت ءُ کوش، گوستگیں روچاں وڈ ءَ مردمانی گون ءَ زوراکی کنگ، ھزدار ءَ نودربرانی سر ءَ پولیس ءِ زوراکی کنگ، کراچی ءِ جتائیں ھنداں ھمک روچ لشکرکشی، کیچ ءِ آپسر ءَ مردمانی گون ءَ زوراکی کنگ ءُ آدگہ درسیں زوراکیانی درچ برجاہ اِنت۔ آئی ءَ گوشتگ کہ اے ھما وئیل اَنت کہ دیم ءَ آرگ بیتگ اَنت، دنیگت ءَ چوشیں باز وئیل ھست آ گزارش کنگ نہ بیتگ اَنت۔ بلوچستان ءَ وتکشی کنگ ءِ بازیں وئیل پریشان کن اَنت۔ باز وئیلاں کشندہ ٹولی ءِ کارمندانی زوراکیاں آیان ءَ پہ اے گامگیج ءِ زورگ ءَ لاچار کرتگ۔ آئی ءَ گوشتگ کہ پریس کانپریس ءِ رد ءَ رسانکدر ءِ دلگوش ءَ گوں بلوچستان ءَ برجاھیں مردمی اگبالانی لپاشگ ءِ نیمگ ءَ آرگ لوٹ ایں ءُ گوں سرکاری ادارھاں لوٹ کن ایں کہ اگاں بلوچستان ءِ جیڑہ ءَ گیش گیوار کنگ لوٹ اَنت گڑا بلوچستان ءَ برجاھیں مردمی اگبالانی لپاشگ ءِ گِر ءُ دار کنگ ءَ بنکی لوٹ اِنت۔ بنشون: پریس کانپریس / اکس: اھوالکار