شھیدیں راجی راھشون نمیران اَنت نبشتہ کار: یاسر بلوچ بلوچ ءِ زندمان مدام گوں جنگی وھداں گوزان اِنت، انچو کہ گْوستگیں وھداں بلوچستان انگریزانی دست ءَ دستیگ کنگ بوتگ، بلوچ ءِ زندمان آ وھد ءَ ھم جنگی وھداں گوزان بوتگ بلے آ وھد ءِ آجوئی ءِ جنگ باز بر ءَ پروش ءِ آماچ بوتگ اَنت، پرچا کہ آ وھداں بلوچ راج ءَ شریں راھشون ءِ نہ بُوَگ ءِ سَوب ءَ بازیں رند ءَ بلوچ چہ جنگ ءَ بے سوب بوتگ اَنت۔ آیاں پہ آجوئی ءَ جنگ داشت نہ کرتگ ءُ بازیں شھید بوتگ اَنت ءُ بازیں باجو بوتگ اَنت، پرچا کہ آیاں شریں راھشون نہ بوگ ءِ سوب ءَ آیاں جنگی راھبند نہ زانتگ اَنت یا کہ آ چہ جنگ ءَ دلپروش بوتگ ءُ سِلاہ دور داتگ اَنت۔ بلے! بلوچ ءِ اے جنگ ءِ تہ ءَ بازیں بلوچ راھشون بوتگ ءُ بازیں راھشون ھست اَنت، اے مئے بلوچ راج ءِ وش بھتی اِنت کہ مرچی اے وڑیں راھشون بلوچ راج ءِ تہ ءَ ھست اَنت وتی راجی جنگ ءَ جوانیں وڑے ءَ دیم پہ منزل ءَ بران اَنت۔ مرچی بلوچ راجی جُھد ءِ تہ ءَ بازیں راھشون شھید کنگ بوتگ اَنت ءُ بازیں بیگواہ کنگ بوتگ اَنت،بلوچ راجی راھشونانی نام ءَ بگراں چو کہ بلوچ نودربر گل ءِ سروگ واجہ زاھد کرد (بلوچ ھان)، زاکر مجید، دگہ بازیں راھشون ھست اَنت کہ انگت بیگواہ اَنت۔ چو کہ شھید سنگت سنا بوتگ، شھید بانُک کریمہ بوتگ، شھید واجہ ڈاکٹر منّان بوتگ کہ بلوچ راج ءِ سروگ بوتگ اَنت کہ شھید کنگ بوتگ اَنت۔ من وتی زندمان ءِ تہ ءَ بازیں راھشون نہ دیستگ اَنت، بلے ھما شھید کنگ بوتگیں یا بیگواہ کنگ بوتگیں راھشونانی کردار بوتگ اَنت، وتی راج ءِ گُور ءَ اِش کُتگ اَنت یا کہ آیانی کِسّہ ونتگ اَنت، من وتی راج ءِ سر ءَ پھر بنداں کہ مارا اے وڑیں راھشون ءُ راج ءِ درد وار ھست اَنت۔ من باز جُھد کنگ ءَ پد چہ ھما شھیدیں راجی راھشونانی لڑ ءَ ھواریں راھشون شھید واجہ گُلام مھمد ءِ بابت ءَ لھتیں دانک نبشتہ کنگ ءِ جُھد کرتگ، بلے بِہ گندے کہ من آیانی ھما کردار ءَ شرّی ءَ شُمئے دیم ءَ آؤرت مہ کنان ءُ آیانی ھما کہ کردار اِنت منی ھیال ءَ دیم ءَ آرگ مھتاج نہ اِنت، راجدپتر ءَ آیانی کردار کُلّیں جھان ءِ دیم ءَ ایر کرتگ اَنت۔ بلوچ راج گوں شرّیں وڑے ءَ آیانی داتگیں دیمونیاں داں جھان ھست یات کنت ءُ دائمی گیر کار اِیت۔ 9 اپریل پہ بلوچ راج ءَ یک مزنیں ارزشتے دار اِیت، انچو کہ ما شما کُل سرپد اِیں کہ اے روچ ءِ بابت ءَ کہ اے روچ ءَ بزانکہ 3 اپریل 2009 ءَ بلوچ راجی راھشون شھید گلام مھمد، شھید لالا منیر، شھید شیر مھمد کہ تربت ءَ کچکول ایڈوکیٹ ءِ کارگس ءَ پاکستان ءِ چیریں ادارھانی کارمند آیاناں آوار جن اَنت ءُ بیگواہ کن اَنت، شھید گلام مھمد ءِ اولی رند ءِ بیگواھی نہ اَت پیش ءَ ھم باز رند ءَ شھید گلام مھمد، لالا مُنیر، شیر مھمد بیگواہ کنگ بوتگ اَنت، بلے آیاں آزار دیگ ءَ پد یل کنگ بوتگ اَنت کہ بلکن ءَ اے چہ بلوچ راجی جُھد ءَ دزکش بنت۔ شھید گلام مھمد چہ جھد ءَ دزکش نہ بوت بلکیں آ گیش مھکم بوت وتی جھد ءِ سر ءَ وتی راجی ھک پیلو کرت، دژمن ءَ اے گیش تورینگ ءَ اَت کہ آ چہ جھد ءَ دزکشی نا وتی جھد ءَ گیش مھکم کنگ ءَ اِنت۔ واجہ گلام مھمد ءَ بلوچ راج ءَ را یک وژنامیں زند گوازینگ ءِ راھے نشان داتگ اَت،آئی وتی ھمے راہ ءَ روان کُرت داں کہ شھیدی پہ وت گچیں کرت، بلے وتی راہ ءِ ھمبل نہ دْروہ اِت اَنت۔ آ روچ 9 اپریل 2009 اَت، مرگاپ ءَ سَے جون دزکپتگ اَت کہ آ جون پجّارگ نہ بوتگ اَت اَنت، آ جون نادراھجاہ ءَ برگ بوت اَنت اُود ءَ جونانی پجّار کنگ بوت کہ آ جون راجی راھشون شھید گلام مھمد، شھید شیر مھمد ءُ شھید لالا منیر ءِ جون اَت اَنت، شھید گلام مھمد ءِ جند شھید کنگ بوت چہ بلوچ راج ءَ سِندگ بوت بلے آئی ھمے لوٹ ءُ واھگ اَت آ گوں بلوچ راج ءَ ھوار اَنت ءُ آیاں گیش جھد مھکم کرتگ۔ بلوچ آجوئی جھد ءِ تہ ءَ بازیں بلوچ راھشون بیگواہ کنگ بوتگ اَنت یا کہ شھید کنگ بوتگ اَنت، وھدے کہ ما دنیا ءِ گْوَستانک ءَ چار اِیں مارا ادا جتاھیں جاھاں آبادیں راجانی انچیں کردار دیم ءَ کاینت کہ آواں وتی انکلابی راہ ءَ مزن مزنیں کربانی داتگ ءُ گْوستانک نویس اِتگ۔ ھمے وڑ ءَ بلوچ راج ءِ تہ ءَ چُوشیں مردم سک باز اِنت کہ آواں پہ وت گْوَستانکے نبشتہ کُرتگ، ھمے وڑ ءَ شھید گلام مھمد ءُ شھید لالا مُنیر ءُ شھید شیر مھمد اَنت۔ شھید گلام مھمد بلوچ راج ءِ ھما راھشون بوتگ کہ آئی بابت ءَ منی ھیال ءَ لبزانی دیم ءَ آرگ سک باز گْران اِنت، شھید گلام مھمد راج دوستی ءِ چیدگ اِنت۔ آ یک زمین دوست ءُ راجدوستے اَت، آئی داتگیں سوج داں جھان ھست اِنت بلوچ ءَ گوں بندوک اَنت۔ شھید گلام مھمد ءِ راھشونی ءَ چہ ایوک ءَ بلوچ راج ناں بلکیں ھر گُلامیں راج چہ آئی کربانی ءَ اے راہ ءَ سبک زور اِیت، وتی ھوناں گوں گْوَستانک ءَ نبشتہ کنوکیں شھید گلام مھمد ءِ جند چہ ما سندگ بوتگ بلے آئی لیکہ ءُ پِگر گوں بلوچ راج ءَ ھر وھد ءَ بندوک اِنت، آئی ھمے پِگر ءُ لیکہ ءِ دیم ءَ برگ ءَ پہ مرچی ھر بلوچ پرزند تیار انت۔ مئے شھیدیں راھشون یا بیگواھیں راھشوناں وتی جند ندْر کرتگ اَنت بلے وتئی ھما ھیال پہ ما پش گِپتگ اَنت داں ما آیانی رندگیری ءَ بہ کن اِیں ءُ وتی ھمے راہ ءَ یل مہ کن اِیں، اگاں مارا زند پہ وشھالی گْوازینگی اِنت گُڑا مارا ھر زُوراکی ءِ بگیری ءَ توار چست کنگ لوٹ اِیت ءُ گھگیری کنگی اِنت، ءُ وتی راھشونانی رندگیری کنگ لوٹ اِیت، داں ما وتی مُرادانی منزل ءَ سر بِہ اِیں ءُ وشھالیں زِندے گْوازینت بِہ کن اِیں۔