ریڈیو زْرمبش بلوچی | ریڈیو زْرمبش بلوچی

کیچ:تمپ کونشکلات ءَ پاکستانی لشکر ءِ دست ءَ  بیگواہ کنگ بیتگیں سئیں ورنا ابدالستار ء الاھی بکش، سھراب ء رھیم بکش ءُ ابداللہ ء ماسٹر ھیسن تربت ءَ یل کنگ بیتگ اَنت۔ ریڈیو زرمبش ءِ اھوالکار ءِ رد ءَ مرچی پاکستانی لشکر ءَ آل پارٹیز ءِ سروک رھوت کنگ بیتگ اَنت ءُ کیچ ءِ کمک دمگدار ءِ ساڑی بیگ ءَ سئیں ورنا آل پارٹیز ءِ سروکانی دست ءَ داتگ اَنت۔یات بہ بہ اِت کہ 12 جون ءَ پاکستانی لشکر ءَ کونشکلات تُمپ ءَ بیڑ بُرتگ اَت ءُ چار ورنا آوار جنگ ءَ پد بیگواہ کُرتگ ءُ پاکستانی لشکر ءِ دزگیری ءَ یک ورنایے گھرام نادل چہ لشکر ءِ بازیں زوراکیاں شھید بیتگ۔پاکستانی لشکر گْوستگیں سَے چار روچ بیت کہ شھید گھرام ءِ کھول ءَ زور دیگ ءَ بیتگ کہ درشانے شنگ کن ءُ بہ گْوش کہ گھرام ءِ شھیدی پاکستانی لشکر ءِ دست ءَ نہ بیتگ بلکیں دل ءَ گیپتگ ءُ شھید بیتگ۔بلے گھرام نادل کھول ءَ درشان دیگ ءَ پھلی لوٹ اِتگ۔ زیکیں روچ ءَ آل پارٹیز ءِ سروکاں تُربت ءَ دیوانے برجم داشتگ اَت ءُ زھرشانی روانک،گلانی سروک ءُ رسانکدر ءَ نمدی نبشتہ کنگ ءِ سوڑگ کنگ بیتگ اَت۔ مرچی کیچ ءِ کمک دمگدار ھسین جان ءُ پاکستانی لشکر ءِ نیمگ ءَ آل پارٹیز کیچ ءِ سروک رھوت کنگ بیتگ اَنت ءُ سئیں بیگواھیں مردم آل پارٹیز سروک ءُ بیگواھیں ورناھانی کھولانی دست ءَ دیگ بیتگ اَنت۔ ریڈیو زْرمبش اھوالکار ءِ رد ءَ دزگیری ءِ میان ءَ سئیں ورناھانی سر ءَ باز زوراکی کنگ بیتگ چہ ایشی ءَ ورناھانی جاور ناگیگ اَنت۔ بنشون:ریڈیو زْرمبش دمگی اھوالکار / اکس:زرمبش اھوالکار