کراچی: یازدہ اگست ءَ سی ٹی ڈی ءِ دست ءَ چہ ھاکس بے ءَ آوار جنگ بیتگیں داد شاہ ءِ کھول ءَ آئی ءِ یل نہ کنگ ءِ بگیری ءَ یکشمبے ءِ روچ ءَ کراچی پریس کلب ءَ داں سند اسمبلی ءِ دیم ءَ زھرشانی روانکے کش اِتگ۔ زھرشانی روانک ءَ بلوچ یکجھتی کمیٹی ءُ وی بی ایم پی ءِ سروک، سیاسی ءُ چاگردی کارکن، زور بیگواھیں مردمانی کھول، زھگ ءُ جنیناں بازیں کچے ءَ بھر زرتگ۔ زھرشانی کنوکیں مردماں پولیس ءِ بگیری ءَ اوگام جتگ ءُ دادشاہ ءَ ھوار آدگہ زور بیگواھیں مردمانی سلامتی آجوئی ءِ لوٹ کرتگ۔ آیاں تران کرتگ ءُ گوشتگ کہ کراچی ءِ ھند ھاکس بے ءَ زور بیگواہ کنگ بیتگیں دادشاہ گریشگ ھزدار ءِ جھمند اِنت۔ آیاں لھتیں سال بیت کہ کراچی ءِ ھند ھاکس بے ءَ نشتگ اَنت۔ داد شاہ ءَ پِت ءُ آدگہ مردمانی دیم ءَ سی ٹی ڈی ءَ شپ ءِ دو ءَ چہ آئی ءِ جند ءِ گس ءَ آوار جتگ ءُ بیگواہ کرتگ۔ زھرشانی کنوکیں مردماں گوں وتگڑیں سرکار ءَ لوٹ کرتگ ءُ گوشتگ کہ دادشاہ ءِ سر ءَ چونیں بھتام ھست گڑا آرگ ءُ آمیدگس ءَ پیش کنگ بہ بیت، اگاں بے میار اِنت یل کنگ بہ بیت۔ بنشون: اھوالکار / اکس: اھوالکار