درگاہ شھیدانی : راھشونے کہ مدام پندلانی آماچ اَت|| دومی بھر || کازی ریھان
2008 ءِ راجمان پتر ءَ یا و ایش کہ مئے ناپھتوئی سھرا اَت یا ما دژمن ءِ چیریں تلکے ءِ آماچ اَت ایں۔بازیں انچیں کار ءُ کردگار اَنت کہ آیاں بی این ایم ءِ باسک بھر ءُ بانگ کرت اَنت کہ داں دیر ءَ شریں ءُ سرپدی ئیں پرستکیں سنگتاں یک دومی ءِ سر ءَ بھیسہ نہ کرت۔بازینے شھید بوت ھم ھمے بے بھیسھی برجاہ اَت۔ بازیں گپے یات کیت کہ گوں ھمے بنگپ ءَ بندوک اَنت ، سیاسی کارکن ءُ آشوبی گلے ءِ باسک بیگ ءِ بستار ءَ من مدام مار اتگ کہ مئے گْور ءَ پہ وتی سنگتانی کرد ءُ کارانی سر ءَ جْوانیں دیدے بہ بیت۔ شرگداری ءُ کچوگری ءُ کردارکشی ءِ میان ءَ ھما کہ پیر ھست آ مارا سرپد بیگی اِنت۔مئے ناپتیانی پژدر ءَ سیاسی مناک بہ بہ اَنت ناں کہ زاتی کینگ ءُ کست۔شھید واجہ ءِ گوں شھید ڈاکٹرمنان ءَ دلرنجی۔ بیگواھیں راھشون ڈاکٹر دین جان ءِ گوں شھید رسول بکش مینگل ءَ ناسیلی ءُ آیانی میان ءَ دیری منی سیاسی یاداشت ءِ تھل تریں بھر اَنت۔اے شھیدانی داتگیں دیمونی اَنت کہ مروچی آ روچیگیں کلپ کہ مئے سْرپانی تہ ءَ چیر بیتگ اَنت ، مروچی پدر اَنت۔ شَرگوں شَرکرداں ءُ شِر گوں شِراں گون کپتگ ءُ شَر پجارگ بیتگ۔
زورگریں سرکار مدام دو وڑ ءَ آشوبی کارکن ءُ سروکانی بگیری ءَ کار کنت پدرائیں رنگے ءَ آئی ءَ دژمن لیک ایت ءُ تاوان دنت دومی آئی ءِ جند ءِ گل ءِ تہ ءَ یا راج ءِ تہ ءَ آئی ءِ کردار کشی بیت۔ لھتے انچیں کارست کہ سرگند ءَ آجوئی دوست اَنت ھمایانی پارست ءَ راھشونانی کردار کشی کنگ بیت۔انچوش کہ شھید واجہ ءِ کنگ بیتگ۔ زورگریں سرکار انچوش پندل کنت کہ باز بر ءَ گل ءِ جوانیں کارکن ءُ دگہ راھشون ھم ھمائی ءِ آماچ بہ اَنت۔گل ءِ ھمک بے سوبی ءَ راھشونانی سر ءَ لڈگ ءُ کچوگری ءِ نام ءَ آیانی کردار کشی کنگ انچیں کار اَنت کہ گل ءِ جند ءِ بدنامی ءِ بنیاد جوڑ بہ اَنت ءُ گل ءِ دیمروی اوشت ءِ آماچ بیت۔
منی نزیک ءَ 2008 ءِ راجمان پتر بلوچ راجی زْرمبشت ، بی این ایم ءِ گل ءِ بستار ءَ بندات اَت۔گیشتریں بھر ھما مردمانیگ اَت کہ آ نوک بی این ایم ءَ ھوار بیتگ اَت اَنت اے ھما اَت اَنت کہ آیاں سیاسی گلانی تہ ءَ کارکنگ ءَ تجربہ گون نیست اَت۔ ھمے رمب ءِ تہ ءَ ھم بازینے شھید واجہ ءِ بگیری ءَ بیوکیں پندلانی ھم آماچ اَت۔ شھید واجہ یکیں وھد ءَ سے سنگر ءَ جنگ ءَ اَت۔ گْورے آئی ءَ بی این ایم ءِ سیاسی مراگش ءِ پد ءَ آجوئی ءِ زْرمبشت مھکم کنگی ءُ پاکستانی زوراک ءِ زور پْروش دیگی اَت ، نیمگے آئی ءَ بلوچ راج ءَ آگاھی دیگی اَت ءُ مستریں کار وتی گل ءِ تہ ءَ انچیں باسکانی رودم اَت کہ زْرمبشت ءَ دیم ءَ برت بہ کن اَنت۔ دژمن ءَ گوں سکیں شیواری ءَ اے جیڑ اتگ اَت کہ آ چون آجوئی ءِ زْرمبشت ءَ داشت کنت، آئی ءَ جیڑ اِت کہ اگاں آ زْرمبشت ءِ راھشوناں شھید بہ کنت بلوچ زْرمبشت نزور بیت۔ شھیدواجہ ءِ کوش ءَ پد گل ءِ تہ ءَ پْرشت ءُ پْروش کیت ءُ چنڈ پہ چنڈیں گل ءِ زور ایوک ءَ گپانی تہ ءَ بیت، آئی ءَ راج ءِ تہ ءَ روتگ نہ بیت۔
بلے شھید واجہ ءِ کوش آسانیں کارے نہ اَت چد ءُ پیش شھید ڈاڈا اکبر ھان ءِ کوش ءَ آئی ءَ ھمے درونت رس اتگ اَت کہ راجی سرانی کوش ءَ پد آیوکیں تاوانانی دیم چوں گرگ بہ بیت۔ اے دیریگیں رپکے کہ راھشونانی کردار کشی کنگ بہ بیت۔ پرتگیز ، انگریز ءُ جھان ءِ درسیں زورگرانی اے میل ءُ ھیلانی تہ ءَ گون اِنت کہ وتی دیم ءَ میلانکیں آجوئی دوست ءُ آشوبی راھشونانی کردار کشی کن اَنت۔ آیانی اے رسانکدری ءُ چاگردی ڈینڈاری (پروپیگنڈہ) انچوش مھکم اَنت ءُ گوں انچیں چالاکی یے ءَ کنگ بہ اَنت کہ مزنیں بھرے ھمے گپانی سر ءَ باور کنت۔ زمانگ گْوزگ ءَ پد ھم باز کس چہ ایشانی سان ءَ در نہ کپ ایت۔ چوش کہ انیگیں مئے لھتے دانشمنداں جاہ جتگ ءُ ھمل ء جیھند رنگیں کارستاں دریائی ڈنگ لیک اَنت ، چہ اے درور ءَ زانگ بیت کہ دژمن تئی نامی ئیں کارستانی کردار کشی ءَ چون کنت۔شھید واجہ ءِ باریگ ءَ و زوراکانی گْور ءَ گیشتریں مشینری ءُ مڈی ھست ، جھان ءِ دیمروی ءَ آ شاھگان ءُ مستریں واکے ءِ ھدابند جوڑ کرتگ اَنت۔آیاں گیشتر زر ھست گیشتر رسائی ھست۔
نوک تیجاریں بی این ایم ءِ تہ ءَ شھید گلام مھمد ءِ کرد ءِ کم کنگ ءِ پندلانی تہ ءَ آئی ءَ چہ گل ءِ سروکی ءَ گستا کنگ ءُ بی این ایم ءِ دوبھر کنگ ءَ بے سوب بیگ ءَ پد سرکار ءَ شھید واجہ گلام مھمد ءِ سر ءَ جتائیں آمیدگساں کیس جوڑ کرت۔کراچی ، کیچ ءُ شال ءَ ھمک سے روچ ءِ سر ءَ آئی ءِ پیشی اَت اَنت۔گل ءِ تہ ءَ ھم انچیں مردم ھست اَت کہ آ شھید واجہ ءِ دیمونی ءُ آئی ءِ بلوچ سیاست ءِ تہ ءِ گْوستگیں کرد ءَ ڈالچار کنگ ءَ اَت اَنت۔ آیانی گْور ءَ سیاست چہ بی ایس او (متھدہ) ءَ بنا اَت ءُ آیانی زور ھمیش اَت کہ راھشونی ھم ھمے بی ایس او ءِ باسک بہ کن اَنت۔آیانی اوست ڈاکٹر امداد ءِ سر ءَ اَت کہ ھچ وڑ ءَ اے زمہ واری ءِ زیرگ ءَ ساڑی نہ اَت۔ ڈاکٹر امداد ءَ ناں ایراد ءِ سگ ھست اَت ءُ ناں کہ چہ وتی نوانیں جاہ ءَ در کپگ ءُ مردمانی میان ءَ سیاست کنگ ءِ ھاٹیگ۔ آئی ءَ ناں گوں کارکناں ھم بستگی یے ءُ مھر ءِ سیادی یے ٹاھینت ءُ ناں کہ راجی سیاست ءِ تہ ءَ گوں مردماں ھمگرنچ بوت بلے شھید واجہ ءَ وتی درسیں کوھنیں سنگتانی باور کٹ اِت ءُ درس کم کم ءَ گوں آئی ءَ ھمگرنچ بیان بوت اَنت۔
کراچی شھید واجہ ءِ سیاست ءِ مستریں بنجاھاں یکے اَت پرچا کہ گل ءَ ھمے شور کرتگ اَت کہ شھید واجہ مند ءَ مہ نند ایت بلکیں کراچی ءَ بہ بیت۔ اے شور پہ آئی ءِ جان پھریزی ءَ کنگ بیتگ اَت ءُ دومی انگیز ایش اَت کہ کراچی ءَ نندگ ءَ رسانکدر ءَ ھمگرنچی گیشتر بیت ءُ بلوچستان ءِ سرجمیں دمگانی راہ ھم یک وڑ ءَ نزیک بہ اَنت۔دژمن ءَ ھم چار اِت کہ شھید واجہ ءَ کراچی ءَ بندر کرتگ پمیشکا آئی ءِ کوش ءِ بنداتی پندل کراچی ءَ سازگ بوت۔
چہ راجمان پتر ءَ پد کراچی ءَ بیتگیں بنداتی اگدہ داری نیاد ءَ شھید واجہ ءَ سنگت سرپد کرت اَنت کہ پاکستانی چیریں واکاں کراچی ءَ ’’ رھمان ‘‘ ءَ منی کشگ ءِ پرمان داتگ۔اگدہ داری پتر ءَ گْوشگ بوت کہ ’’ رھمان ءَ کلوہ کرتگ کہ آئی ءَ گْوشگ بیتگ کہ گلام مھمد ءَ بہ کش ، من و اے کار ءَ نہ کن آں بلے گلام مھمد وتی انان ءَ بہ دار ایت۔‘‘ نومبر 2008 ءَ بی این پی کراچی ءِ راھشون زاھد ھسین کشگ بوت چہ آئی ءَ پد اے گپ شنگ کنگ بوت کہ گلام مھمد ھم جنگ بیتگ۔زانگ نہ بیت کہ چہ اے دروگ ءَ دروگ بندانی مول چی اَت بلے ھمے گمان شت کہ شھید زاھد ھسین ءِ کوش ءَ گلام مھمد کشگ بیتگ ، چہ اد ءَ بی این ایم ءِ باسکانی دل ءَ پہ شھید واجہ ءَ ترس گیش بوت۔
مارچ ءِ ماہ ءَ روتاکاں بی ایل ایپ ءِ نام ءِ سر ءَ شھید واجہ ءِ بگیری ءَ دروگیں درشانے دیم دیگ بوت۔دروگ پدر اَت پمیشکا اے درشان ھچ روتاکاں شنگ نہ بوت۔ اے بارہ ءَ شھید ھاجی رزاک ءَ من ءَ پون کرت ءُ ھال دات کہ چوشیں چیزے مئے گْور ءَ اتکگ۔من شھید ھاجی ءَ گْوشت کہ ھمیشی ءِ کاپی یے بہ کن ءُ وتی گْور ءَ ایر کن۔ منی دل ءَ ھما روچ ءَ جت کہ نی شھید واجہ ءَ زیت نشانگ کن اَنت ءُ اے درس ھمے دْرچ ءِ بھر اَنت۔اے وھدی ھیربیار ءِ سر ءَ لندن ءَ ناشرکاری ءِ کیس کنگ بیتگ اَت۔ جان سولیکی آوار اَت، آئی ءِ آوار جنگ ءِ زمہ واری بلوچ لبریشن یونائیٹڈ پرنٹ ءِ نام ءَ منگ بیتگ اَت۔آوار جنانی نیمگ ءَ گْوشگ بیتگ اَت کہ بلوچ بیگواہ یلہ کنگ بہ بہ اَنت نی جان سولیکی یلہ کنگ بیت۔پہ اے کار ءَ شھید واجہ ، زاکر مجید ءُ بی این ایپ ءِ دگہ راھشونانی پترے جوڑ کنگ بیتگ اَت کہ گوں پاکستانی واکداراں ھمے بارہ ءَ گپ ءُ تْران کنگ ءَ اَت۔
شھید واجہ ھمے پتر ءِ ھم سروگانی کنگ ءَ اَت ، ایشی ءِ سر ءَ ھم مئے لھتے ترس ءُ جست ھست اَت اَنت۔27 مارچ 2009 ءَ پسنی ءَ بلوچستان ءِ زیردست کنگ ءِ روچ ءَ مچی یے ایر کنگ بوت۔ ھمود ءَ من گوں شھید واجہ ءَ اے درسیں گپ جت اَنت کہ تئی بگیری ءَ اے پندل بیگ ءَ اَنت ءُ اے بارہ ءَ مارا شیوار بیگ لوٹ ایت۔ من آئی ءَ گْوشت: من ءَ گمان بیت کہ زیت پاکستانی واکدار ترا نشانگ کن اَنت یا پد ءَ بیگواہ۔ واجہ ءَ درائینت کہ : اگاں انی من ءَ بیگواہ بہ کن اَنت ، گڑا وش اِنت بزانت ھمیش اَت کہ جان سولیکی ءِ آوار جنگ ءِ میان ءَ چوشیں کارے ءَ پاکستان لوپ ءَ کپ ایت ءُ بدنام بیت۔
من گوں واجہ ءَ پت نہ داشت ءُ گْوشت کہ پاکستان ھما بدنام اِنت کہ آئی ءَ نی چد ءُ دیم وتی بدنامے ءَ ھچ پرواہ نہ کنت ما چہ اے وش منی ءَ در بہ کپ ایں کہ پہ بلوچ ءِ کوش ءَ پاکستان بدنام بیت۔ شھید واجہ ءَ و مرگ ءِ بیھار مدام ھست اَت ، پہ ایشی ءَ آ وتی سیاسی سرگرمیان دارگ ءَ ساڑی نہ اَت۔ آ وھدی سنگتانی میان ءَ نزیکی ءُ ھمکاری نیست اَت پرچا کہ سنگت بلوچستان ءِ جتائیں کنڈاں نشتگ اَت اَنت ءُ ھر یکے ماں وتی ھنکین ءَ کار ءَ اَت۔گیشتریں سنگتانی گْور ءَ موبائل ءَ ھم کار نہ کرتگ اَت۔ من ھم نہ زانتگ اَت کہ اے بارہ ءَ دگہ گوں کے ءَ اھوال بہ کن آں ءُ چوشیں راھے در بہ گیج آں کہ ما وتی راھشون ءَ پھریز اِت بہ کن ایں۔چہ اد ءَ زانگ بیت کہ ما سیاسی تک ءَ چینکس ناپھتو ءُ بے زانگ بیتگ ایں۔
شھید واجہ چہ پسنی ءِ مچی ءَ پد مند ءَ شت ، آئی ءِ لوگ ءَ پاکستانی لشکر ءَ ارش کرت واجہ ءِ برات یوسپ ، لٹ ءُ کٹ کرت۔ دومی روچ ، 3 اپریل ءَ شھید واجہ ءِ ماں تربت ءَ پیشی اَت۔ چہ پیشی ءَ پد آ چہ کچکول ایڈوکیٹ ءِ کارگس ءَ پاکستانی لشکر ءَ بازیں مردمانی دیم ءَ گوں شھید لالا منیر ءُ شھید شیر مھمد ءَ آوار جت۔
گمان گیشتر ھمیش اِنت کہ ھما روچ ءَ سے ئیں راھشون شھید کنگ ءُ آیانی پاکیں کنٹ مرگاپ ءَ چگل دیگ بوت اَنت۔مرگاپ ءَ اے جاہ چوشیں جاھے نہ اِنت کہ کنٹ گندگ مہ بوتین اَنت بزاں پاکستانی لشکر ءَ پہ زور انچوش کرتگ داں بلوچ راج سرپد بہ بیت کہ سے ئیں راھشون شھید کنگ بیتگ اَنت بلے داں پنچ روچ ءَ کس سرپد نہ بوت۔ گڑا پاکستانی لشکر ءَ وتی کاسگ چٹانی پارست ءَ اے کلوہ سر کرت کہ واجہ گلام مھمد گوں سنگتاں شھید کنگ بیتگ۔اے ھال گوادر ءَ من ءَ اھوالکارے ءَ جستے ءِ دْروشم ءَ دات وھدے کہ من گْوشت من سرپد نہ آں ، آئی ءَ درائینت کہ من ءَ چہ لشکری مردماں کسے ءَ اے ھال داتگ ءُ اے دلجمیں ھالے بلے من اے ھال ھچ وڑ ءَ راست نہ لیک اِت داں وھدے شھید رزاک گل ءَ من ءَ دلجمی ءَ گْوشت کہ اے گپ راست اِنت۔
گوں شھید واجہ ءِ شھیدی ءَ آئی ءِکردار کشی ءِ دْرچ اوشتات ، بازیں مردم سیاسی بگیردار ءُ کچوگروکیں ھمبلانی دْروشم ءَ وتی کرتگیں گپاں پشومان بوت اَنت۔ بازینانی آرٹیکل کہ توار ءِ کارگس ءَ پہ شنگ بیگ ءَ مھتل اَت اَنت ، آیاں پہ منتے دارائینت اَنت کہ آیاں شنگ مہ کن اِت۔
ھما روچی کہ شھید واجہ بیگواہ کنگ بیتگ اَت ، مند ءِ سرکاری کارمندے کہ گوں ما دیر سْیادی کنت۔ من ڈک دات۔ ما یکیں گاڑی ءَ سوار اَت ایں ءُ آ من ءَ لوگ ءَ رسینگ ءَ اَت۔ راہ ءَ درائینت ئِے کہ : نی سرکار اے مرد ءَ نامدار کنگ لوٹ ایت ، پمیشکا آوار ئِے جتگ وھدے کہ ما زھرشانی روانک کشگ ءَ بیتگ ایں ھم بازیں مردماں مارا ھمے گپ جتگ کہ گلام مھمد پہ مھمانی ءَ برگ بیتگ۔
رند ءَ کہ شھید بوت مندی اپسر ءَ من ءَ ڈک دات ءُ گْوشت : شما مئے سیاد کشارینت ءُ نشت اِت ۔۔۔۔من آئی ءِ چمانی تہ ءَ چار اِت ءُ ھچ نہ گْوشت۔
بی ایس او پجار ءِ ورنایے کہ پیش ءَ ھمے گپ ئِے جتگ اَت ، من ڈک دات ، پیش کپت آں ءُ گْوشت : واجہ گلام مھمد اے رندی الکاپی ءَ مھمانی وارینگ بیتگ، نی تئی دل سارت اِنت ؟ ، آئی ءَ سر جھل جت۔
من اے لھتے روچانی ھمراھی ءَ کہ من سرپد بہ آں پہ سیاسی پند ءَ ، سیاسی ھمراھی ءَ سک کسانیں باریگے۔ من چوشیں راھشون کم دیستگ کہ آ چوش شھید واجہ گلام مھمد ءَ ھرچ چاریں نیمگ ءَ دپ ءُ دنتاناں بہ بیت۔ داں اتاء اللہ مینگل گونگیں کلانھیں سیاسی سروکاں بہ گر بی ایس او ءِ ورنایاں ھر یکے ءَ پہ آئی ءَ دنتان درشتگ اَت اگاں راج وتی مھکمیں راھشون ءِ ارزشت ءَ سرپد بوتیں ما اینچو زیت چہ شھید گلام مھمد ءَ زبھر نہ بیتگ اَت ایں۔