بلوچ یکجھتی کمیٹی ءِ جارکش ءَ چہ منگوچر ءَ بیگواھیں پٹبالر اجاز ءِ زوریں بیگواھی ءَ پد سی ٹی ڈی ءِ نیمگ ءَ کٹان ھزدار ءَ دروگیں میڑ ءَ نشانگ کنگ مئے ھمے گمان ءِ پدرائی ءَ کنت کہ سی ٹی ڈی نوں لشکر جوڑ کنگ بیتگ آ چہ لشکر ءَ اَبید سی ٹی ڈی ءِ نام ءَ لّس مردماں زوریں بیگواھی ءَ پد آیاں بہ کش ایت۔ اجاز ءَ ھوار درزنانی کچ ءَ اے وڑیں مردم داں انوں سی ڑی ڈی ءَ نشانگ کرتگ اَنت کہ آیانی چم دیستیں گواہ ھم ھست اَنت، بلے اے کشت ءُ کوش یک شوربندی ءُ شونداتے ءِ بنیاد ءَ بوگ ءَ اِنت بژنی گپے۔
اجاز 24 اگست ءَ چہ گِس ءَ شپ ءِ دو ءَ چادر ءُ چاردیوالی لگتمال کرتگ اَنت ءُ زور بیگواہ کرتگ۔ آئی زوریں بیگواھی ءِ گزارش رسانکدر ءَ شنگ بیتگ۔ باز بے سریں دروگ بندگ ءُ دروگیں میڑ ءَ نشانگ کنگ بیتگ۔ جارکش ءَ گوشتگ کہ اد ءَ یک نیمگے ءَ سی ٹی ڈی ءِ وڑیں لشکر بلوچستان ءَ اجاز وڑیں ورنایاں دروگیں میڑاں نشانگ کن اَنت ءُ آیانی کوش ءُ آوار جنگ ءِ کار ءَ کنگ ءَ اَنت۔ ھمے دومی نیمگ ءَ بلوچستان ءَ کودکیں جنک ھم پھریز نہ اَنت۔ بلوچ چاگرد ءِ تہ ءَ چونیں جنینے ءَ گوں بدیں گپ جنگ مزنیں میارباری یے زانگ بیت نوں بے کانودی ءُ چہ ڈن ءَ آرتگیں زھن ءُ تب ءِ سوب ءَ اے وڑیں دردناکیں وئیل دیم ءَ پیداک اَنت اے گمان کنگ نہ بیتگ اَنت۔ ھشت سالی ئیں ھمیرہ کہ آئی ءِ ناھکیں بیگواہ کنگ، اے کودکیں پل ءِ گون ءَ بدکاری کنگ ءُ آئی ءِ کشگ یزیدی ءِ آسر اَنت ایشی ءَ ھچ وڑ ءَ نہ منّ ایں۔
مارا ھمے ترس اِنت کہ بلوچستان ءِ جاور ھما جاہ ءَ سر بیتگ اَنت آیانی نوں گھتری مشکل اِنت۔ بلوچستان ءَ نوں کودکیں جنک ھم پھریز نہ اَنت۔ کشندہ ٹولی ءَ سرجم ءَ واک دیگ بیتگ، ریاست ءَ سی ٹی ڈی جوڑ کرتگ ءُ بیگواھیں مردمانی دروگیں میڑاں کشگ ءِ زمہ واری داتگ۔ چوش کہ اے جاورانی ودی کنگ ءَ لھتیں زوراک پہ وھد نپ زور اَنت بلے دیمتر ءَ مردم اے زوراکیاں ھچ وڑ ءَ اوپار کرت نہ کن اَنت۔ جارکش ءَ وتی درشان ءِ گُڈی ءَ گوں بلوچ راج ءَ دلگوش گور کرتگ ءُ گوشتگ کہ بلوچاں جیڑگ لوٹ ایت کہ مرچی راجے ءِ بستار ءَ مئے گور ءَ چے پشت کپتگ کہ اد ءَ کودکیں ھمیرہ ءِ وڑیں زھگ پھریز نہ اَنت وھدیکہ ریاست ءِ زمہ واری لّس مردمانی پھازداری اِنت بلے آئی ءَ سی ٹی ڈی ءِ وڑیں لشکر جوڑ کرتگ ءُ بلوچ ءِ چکچینی تیز کرتگ۔ وھد ءُ جاورانی لوٹ ھمیش اِنت کہ باسمائیں بلوچ پہ وتی ھکاں سیاسی جھد ءِ بھر بہ بنت ءُ پہ ناھکیانی ھلاس کنگ ءَ جھد بہ کن اَنت۔ پمیشکا دانکہ ما بزاں راج اے زوراکیاں اوپار بہ کن ایں اے ھچ وڑ ءَ ھلاس نہ بنت۔
بنشون: درشان | اکس: مونوگرام