بلوچ راجی زْرمبشت (بی این ایم) یوکے تک ءِ نیمگ ءَ زورگِپتیں بلوچستان ءَ زورگریں پاکستانی لشکر ءُ گوں چیریں ادارھاں بندوکیں وتگڑیں سی ٹی ڈی ءِ دست ءَ بلوچ ورنایانی زور بیگواھی ءُ درکانودی کوش ءِ بگیری ءَ برتانیا ءِ شھر لندن ءَ ٹریپلگر اسکوائر ءَ زھرشانی کنگ بیتگ۔ زھرشانی ءَ بی این ایم یوکے تَک ءِ باسک،اگدھدار ءُ ھمود ءِ جھمنندیں بلوچاں ھوار جنین ءُ زھگاں بازیں کچے ءَ بھر زُرتگ۔
زھرشانی کنوکاں بینرز ءُ پلے کارڈ دستاں بیتگ ءُ آیانی سر ءَ سی ٹی ڈی ءِ دست ءَ زور بیگواھیں بلوچ ورنایانی نوک نوکین ءُ زوراکیں وڑ ءُ پیماں در کانودی کوش ءِ بگیری ءَ اوگام نبشتہ بیتگ، اے درگت ءَ زھرشانی کنوکاں زورگریں پاکستانی لشکر ءُ سی ٹی ڈی ءِ زوراکیانی بگیری ءَ اوگام جتگ ءُ چار روچ پیش کُشگ بیتگیں بالاچ مولابکش، ودود ءُ سیپ ءَ ھوار پہ آدگہ کُشتگیں ورنایاں انساپ ءِ لوٹ کنگ بیتگ۔
زھرشانی ءَ تران کنان ءَ بی این ایم ءِ کستریں کمک سرکماش ھسن دوست ءَ زورگِپتیں بلوچستان ءَ زورگریں پاکستانی لشکر ءُ گوں آئی ءَ بندوکیں ادارہ سی ٹی ڈی ءِ دست ءَ زور بیگواھیں ورنایانی کوش گوں ترندیں دانکاں ایر جتگ ءُ گْوشتگ کہ سی ٹی ڈی ءَ ھمے زوراکی ءِ دْرچ کہ بلوچ راج ءُ تیوک ءَ زور بیگواھیں مردمانی سر ءَ بندات کُرتگ جھان ءَ ھچ کُجا ایشی ءِ درور گندگ نہ بیت۔
آئی ءَ گْوشتگ کہ دیم پہ دیمی دروگیں میڑ ءِ نام ءَ کشگ بیتگیں مردماں گوں ھچ ادارہ ءَ سیادی نہ بیتگ ءُ بالگتر ءَ دورگیں میڑ ءِ نام ءَ بمب تراکے ءَ کُشگ بیتگیں مردمانی دست ءُ پاد بندوک بیتگ اَنت۔
زھرشانی ءَ بلوچ ھیومن رائٹس کونسل ءِ سروک سمد ءَ تران کُرتگ ءُ گْوشتگ کہ بالاچ مولابکش آمیدگس ءَ پیش کنگ ءُ دہ روچ ءِ جُست ءُ پد کنگ ءِ موکل ءِ گِرگ ءَ ابید کُشتگ کہ سی ٹی ڈی ءِ ٹاپاراں رَد کنت۔
آئی ءَ گْوشتگ کہ بلوچستان مئے سرڈگار اِنت کہ ما آجوئی ءُ پہ منگھ زندگ بیگ لوٹ ایں، زھرشانی ءَ بلوچ استمانی لشکر( بی آر پی) ءِ سروک منسور ھم تران کُرتگ ءُ گْوشتگ کہ بلوچ ورنایا آمیدگساں پیش بیگ ءَ ابید کُشگ بیگ ءَ اَنت، منسور ءَ چہ برتانیا ءِ مردم، پارلیمان ءُ سرکار ءَ لوٹ کُرتگ کہ آ بلوچ راج ءِ سر ءَ برجاھیں پاکستان ءِ زوراکیاں دلگوش بہ دنت ءُ بلوچ چکچینی ءِ گِر ءُ دار کنگ ءَ وتی کِرد ءَ پیلو بہ کنت۔
بنشون: اھوالکار / اکس: اھوالکار
