بلوچ راجی زْرمبشت ( بی این ایم ) ءِ جارکش ءَ وتی درشانے ءَ ماں ڈیرہ بگٹی ءَ پاکستانی لشکر ءِ زوراکیانی سر ءَ بے تاھیری درشان کنان ءَ گْوشتگ ڈیرہ بگٹی ءَ پاکستانی لشکر ھلک ءُ میتگاں نشانگ کنگ ءَ اِنت۔شھرمنندانی بگیری ءَ لشکری زور ءُ جنگی بالگردانی کارمرد ءِ پد ءَ مالی ءُ جانی تاوان بیگ ءَ اِنت ءُ لشکرکشی ءِ میان ءَ دھاں مردم دزگیر کنگ ءَ پد زور بیگواہ کنگ بیتگ۔ ڈیرہ بگٹی ءَ یک شمبے 10 ستمبر ءَ مزنیں کچے ءَ بنا بیتگیں لشکرکشی ءَ سوئی ءُ اچ ءِ ھند ءُ ھلک گنڈوئی ، سوناری مٹ، سردرپٹی ، بشک ، دم ءُ لگر دون ءِ سر ءَ بیڑ برگ بیگ ءَ اِنت۔اے بیڑاں جنگی بالگرد ءِ کارمردی ءِ دلجمیں ھالے۔ ھندی مردماں گْوشتگ پاکستانی لشکر ءِ چہ نوکتریں جنگی ابزاراں بڈ ءُ باریں ’ ایس ایس جی کمانڈو‘ ھم مزنیں کچے ءَ لشکری کارروائیاں بھر زیرگ ءَ اَنت۔داں انیگ ءَ چل ٹرک گندگ بیتگ کہ آیاں ایس ایس جی کمانڈو سوار بیتگ۔چہ ایشی ءَ ترس اِنت کہ اے دمگاں مزنیں کچے ءَ مردم کشگ بیت۔ اے میان ءَ بلوچی زبان ءِ لچہ گْوش ازیر بگٹی، سلیمان بگٹی ، ھاجی میاں ھان بگٹی، الی بکش ء الی ھان بگٹی، پٹان بگٹی ء مرزان بگٹی، ھاشم ء سوری بگٹی ، بابل بگٹی، بجار بگٹی ء ھاجی سبزل بگٹی، یاکوب بگٹی ، کریم بگٹی ءُ مستپا بگٹی پاکستانی لشکر ءَ دزگیری ءَ پد زور بیگواہ کرتگ اَنت۔
جارکش ءَ گْوشتگ زور بیگواھیں مردم چہ ایشاں گیشتر اَنت۔ ایشانی تہ ءَ کم ءَ کم دو کسانیں چک ھم ھوار اِنت۔مردم چہ ترس ءَ وتی کھول ءِ مردمانی زور بیگواھی ءَ پدر کنگ ءَ نہ اَنت ءُ دمگ ءَ رسانک ھم بند ءُ تنگ اِنت پمیشکا زور بیگواھی ءُ دگہ تاوانانی سرجمیں ھال دیم ءَ آیگ ءَ نہ اَنت۔کوھی دمگاں دورماڑیں کسانیں ھلک ءُ دمگ باز اِنت۔ پاکستان ءَ مزنیں زمینے انگر کرتگ چہ ایشی ءَ دھاں ھلک ءُ ھندانی راھوت سستگ۔
آئی ءَ گْوشتگ پہ بلوچستان ءِ مڈیانی دستیگ کنگ ءَ پاکستانی لشکر بلوچستان ءِکنڈ کنڈ ءَ تالان اِنت۔بلوچ وتی گلزمین ءِ آجوئی ءُ وتی مڈیانی سر ءَ راجی واک ءِ لوٹوک اِنت پمیشکا گوں لشکری زور ءَ لپاشگ ءُ نگٹ کنگ ءِ کوشست بیگ ءَ اِنت۔
آئی ءَ گْوشتگ پاکستان ءِ ادارکی تھی کارانی وزیر سرپراز بگٹی مھترھندی ناشرکارے (ریاستی دہشت گرد) کہ پہ پاکستانی لشکر ءَ مردم کشیں رمب ھلائین ایت۔پاکستانی لشکر ءَ 29 مارچ 2018 ءَ وتی کاسگ چٹ یکجا کرت ءُ ’ بلوچستان مردمی گل ‘ ( بلوچستان عوامی پارٹی ) ءِ نام ءَ گلے ءِ بن ھشت ایر کرت۔ ایشی ءِ بنکی باسکانی تہ ءَ پاکستان ءِ انیگیں ادارکی سروزیر ’انوار الھک کاکڑ‘ ھم ھوار اِنت۔اے رمب بلوچ راجی سیاست ءُ راجی سیتانی بگیر ءَ کارگرگ بیگ ءَ اِنت۔پاکستانی لشکر ءَ وتی اے کاسگ چٹ مھتر ھند ءِ ٹوھیں کارگساں نندارینتگ اَنت داں بلوچستان ءَ وتی من ءُ مولاں بہ رس ایت۔اے من ءُ مولانی تہ ءَ بلوچستان ءِ مستریں مول بلوچستان ءِ مڈیانی پلگ اِنت۔
جارکش ءَ گْوشتگ سرپراز بگٹی ھمے سرپد بیت کہ ڈیرہ بگٹی آئی ءَ چہ پاکستانی لشکر ءَ رس اتگیں جاگیرے۔پمیشکا آ اد ءَ چہ بلوچ راجی سنچ ءِ بالاچی ءَ ترسگ ءَ اِنت۔آ پندلے ءِ پارست ءَ ھما مردماں نشانگ کنگ ءَ اِنت کہ آئی ءِ لیکہ ءُ راج بگیریں سسا ءِ نہ منوک اَنت۔
بی این ایم ءِ جارکش ءَ چہ مردمی اگبالانی تْرامگیج ( ادارہ ) ءُ میان استمان ءَ دزبندی کرتگ کہ آ ماں ڈیرہ بگٹی ءَ برجاھیں لشکر کشی ءِ دارگ ءَ اشتاپی ءَ دزمانجنی بہ کن اَنت۔
بنشون: درشان / اکس: بی این ایم
