بلوچ راجی زْرمبشت (بی این ایم) ءِ چاگردی گھبودی تک ءَ وتی درشانے ءَ گوادر ءِ ھند پسنی ءَ ٹرالر ماپیا ءِ نیمگ ءَ دریاورانی سر ءَ اُرش بلوچستان ءِ وتگڑیں سرکار ءُ پشریز ءِ نابودیانی آسر لیک اِتگ ءُ گْوشتگ کہ نوک آبادی تْرام ءَ بلوچ راج ءِ زندگی ءِ ھمک بھرگ نابود کُرتگ۔ مردمانی زور بیگواہ کنگ ءَ بگر داں مالی کوش ءِ پارست ءَ پہ بلوچ راج ءَ آئی ءِ سرڈگار تنگ کنگ بیتگ ءُ ایشی ءِ بنکی سْوب پاکستان ءِ ماں بلوچستان ءَ مُشگ بیتگیں نوک آبادی تْرام اِنت۔ بلوچ راج ءِ مالی تنگدست کنگ ءَ پاکستانی ریاست ءُ آئی ءِ شریدار بلوچستان ءِ وتگڑیں سرکار ءُ انیگیں اتکگیں سرکار اِنت کہ ایشانی مھار ریاست ءِ لشکر ءِ دست ءَ اِنت کہ ھمائی ءِ گْوشگ ءِ پد ءَ بلوچ راج مالی تنگدستی ءِ نشانگ کنگ ءُ چہ آئی ءَ زندگ بیگ ءِ اُگبال پچگرگ بیگ ءَ اِنت۔
بلوچ راجی زْرمبشت (بی این ایم) ءِ چاگردی گھبودی تَک ءَ وتی درشانے ءَ گْوشتگ کہ ٹرالر ماپیا ءَ بلوچستان ءُ سند ءِ زِر ءَ درکانودی شکار ءِ واک چہ ریاست ءِ نیمگ ءَ بلوچستان سرکار ءَ داتگ کہ سلاہ بند اَنت ءُ زِر ءِ سَنٹ کنگ ءَ وتی کِرد ءَ پیلو کنگ ءَ اَنت۔ اے ٹرالرانی سْوب ءَ زِری زندمان نزور بیگ ءَ اِنت ءُ ھندی مردم پہ نان ءَ ھیران اَنت۔
آئی ءَ گْوشتگ کہ سرجمیں گوادر دمگ ءَ ٹرالر ماپیا ھاکمی کنگ ءَ اِنت۔آیانی دیم ءَ پشریز ءُ بلوچستان ءِ وتگڑیں سرکار سرجم ءَ بےوس ءُ بےتواری ءَ ندارگ چارگ ءَ اَنت،ھمے سْوب ءَ ٹرالر ماپیا پہ تمردی برے پشریز ءِ کارمنداں آوار جن اَنت ءُ برے ھندی دریاورداں نشانگ کن اَنت۔
آئی ءَ وتی درشان ءِ گُڈّی ءَ گْوشتگ کہ بلوچ راج چہ بلوچستان ءِ سرڈگار، زِر ءُ مڈیاں زبھر کنگ بیتگ کہ اے ریاست ءِ پندلے ءُ ریاست ءِ درسیں تک اے پندل ءَ ھم سَنّت اَنت۔ بلوچ راج ءِ سروکیں سیاسی گل ءِ بستار ءَ بی این ایم اے کار ءَ ایر جنت ءُ پہ اے سِلّیں کار ءِ بگیری ءَ توار چست کنت۔
بنشون: درشان / اکس: زرمبش
