بلوچ راجی زْرمبشت (بی این ایم) ءِ بنجاھی جارکش ءَ گل ءِ کلانھیں باسک ،راجدار ءُ آجوئی لوٹوکیں یوسپ ءِ ناگتیں بیرانی ءِ سر ءَ آئی ءَ ستک شانی ندر کُرتگ ءُ گْوشتگ کہ یوسپ ھرکسی دوستین ءُ دلجمیں آجوئی ءِ لوٹوکیں ھمبلے بیتگ۔ گوں وتی دراجکشیں راجداری بندوکی ءِ پَند ءَ آئی ءَ بازیں جنجالانی دیمپانی کُرتگ ءُ درانڈیھ ھم بیتگ ءُ بلے مدام گوں وتی مھکمیں لیکہ ءَ برجاہ بیتگ۔
آئی ءَ گْوشتگ کہ یوسپ دالبندین ءَ ودی بیتگ۔ بندانی وانگ ءُ زانگ آئی ءَ چہ ھمود ءَ دربُرتگ۔نودربری ءِ وھد ءَ گوں راجی راجداری ءَ بندوک بیتگ ءُ بی ایس او ءِ پرکار ءُ جوانمردی باسکے بیتگ۔ پد ءَ چہ نواب مری ءِ درانڈیھی ءَ پد یوسپ اوگانستان ءَ شتگ ءُ ھمود ءَ ونتگے ءُ روس ءَ شُتگ۔ روس ءَ شھید ڈاکٹر ھالد ءُ آدگہ جھدکارانی گون ءَ ھوار بیتگ۔وانگ ءَ پد وھدے کہ نواب مری چہ درانڈیھی ءَ واتر کیت گڑا یوسپ ھم واتر بیت ءُ وتی دمگ ءَ وتی دیوان ءُ راجدارے کاراں بندات کنت۔ ھمے میان ءَ سرکاری کارمندے بیتگ بلے گوں راجداری ءَ بندوک بیتگ۔
آئی گْوشتگ کہ کماش یوسپ کیچ ءِ بنجاھی شھر ءَ بیتگ ءُ شھید گُلام مھمد ءِ ھمراہ ءُ راجداری جُھد ءِ کارانی بھر بیتگ۔ سال دوھزار دہ ءَ گل ءِ راجمانی پتر ءَ ھوار بیتگ ءُ دُرسیں بنگپانی سر ءَ گپے کرتگ۔تربت ءَ پد اوتل لسبیلہ ءَ اسپورٹس سروکے ءِ بستار ءَ کار ءَ بیتگ بلے آئی ءِ گس ءَ مدام آجوئی دوستیں دیوان برجاہ بیتگ اَنت۔ جارکش ءَ گْوشتگ کہ گل وتی کلانھیں ھمبلانی دراجکشیں جُھداں ستک شانی ندر کنت ءُ ما کول کن ایں کہ دُرسیں شھید ءُ رپتگیں ھمبلانی سیاسی سپر ءَ برجاہ دار ایں۔
بنشون: درشان / اکس: بی این ایم
