شال : بلوچ راجی زْرمبشت ( بی این ایم) ءِ گھبودی بھرگ ءَ سیمسر ءِ بندش ءُ باپار ءِ کمیں پارست ءُ درانی پد ءَ بلوچستان ءِ گزرانکی جیڑھانی سھرا کنگ ءَ گزارشے شنگ کرتگ۔ گزارش ءِ تہ ءَ انگریزانی زورگری ءِ پد ءَ بلوچستان ءِ بھر ءُ بانگ ءِ دمگ ءِ سر ءَ سان ءُ انگیں نوکیں نوک آبادی زوراکی ءِ جاور درشان کنگ بیتگ اَنت۔
بلوچ راج ءِ بدیں جاور ءِ سر ءَ چمشانک دیگ بیتگ ، بلوچ کہ وتی پجار ، ربیدگ ، وانگ ءُ پاکستانی زیردستیں بلوچستان ءَ گیش بیوکیں گزرانکی ناگیگی ءِ آسر ءَ چارپھناتیں ارشانی دیمپانی کنگ ءَ اِنت۔گزارش ءِ رد ءَ بلوچستان ءَ دلجمیں کارجاہ نیست اِنت۔لسبیلہ ھنکین ءِ شھر ھب تیوکیں کارجاھی شھر اِنت بلے آ اود ءَ ھم دری مردم کار ءَ دارگ بہ اَنت چہ ایشی ءَ بلوچستان ءِ شھرمنند چہ روزگار ءِ ھمے کسانیں در ءَ ھم زبھر کنگ بیگ ءَ اَنت۔
گزارش ءَ گچینی روکپتی سیمسر ءَ باپاری راھداریانی نیمگ ءَ دلگوش گْور کنگ بیتگ۔ گزارش ءِ تہ ءَ پرارزشتیں باپاری راھداری تپتان، ماشکیل ، ابدوئی، پیشن ۔مند، ریمدان، کوھک ، پروم ، پسابندن ، گْوتر ءُ کلانی ۔ کنٹاٹی ھور ءِ نام گرگ ءُ باپار کنوکیں مردمانی جیڑہ درشان کنگ بیتگ اَنت۔ مردماں پہ زور سنگ گرگ، ٹوکن سسٹم، ناوشیں راہ ءُ سیمسر ءِ بے سمائی بند کنگ ، جیڑہ اَنت۔
گزارش ءَ اوسپانانی (اوسپان ۔ وقفہ) سر ءَ سیمسر ءِ بندش ءِ تباہ کنوکیں سانانی بارہ ءَ گْوشگ بیتگ کہ چہ ایشی ءَ شد ءُ بے روزگاری گیش بیت۔ چہ ایشاں ابید گزارش ءِ تہ ءَ پاکستانی لشکر ءُ ھندی ناراھیں پرواکانی (مافیا) نیمگ ءَ منڈگ بیتگیں ھلکیں گزارانک (غیرمستحکم معشیت) ءِ نیمگ ءَ دلگوش پرینگ بیتگ کہ چہ باپاری سرگرمیاں ناگتیں اوشتگ ءَ گزرانکی تباہی بیت ءُ دمگ ڈکال ءِ آماچ بیت۔ گزارش بلوچ راج ءِ بدیں جاورانی سر ءَ میان استمانی آگاھی ءُ ھمے رد ءَ گپ ءُ تْران ءِ پارست ءَ گزرانکی داشت ءُ مردمی کمک ءِ ’اشتاپیں لوٹ‘ ءِ سر ءَ زور دنت۔
بنشون: اھوالکار / اکس: زرمبش
