جرمنی: بلوچ راجی زْرمبشت (بی این ایم) جرمنی تَک ءِ نیمگ ءَ ھنوز شھر ءَ بلوچستان ءَ سی ٹی ڈی ءِ نیمگ ءَ برجاھیں دروگیں میڑانی بگیری ءَ زھرشانی کنگ بیتگ۔ زھرشانی ءَ بی این ایم ءِ باسکاں ھوار دگہ مردماں بازیں کچے ءَ بھر زُرتگ، اے میان ءَ بی این ایم ءِ باسکاں پنتاک بھر کُرتگ ءُ مردم پاکستانی زوراکیانی بابت ءَ سرپدی داتگ اَنت کہ بلوچستان ءَ بے میاریں مردم آوار جنگ ءُ ماہ ءُ سالاں چیریں آزارجاھاں بند کنگ ءَ پد ناشرکاری ءِ نام ءَ دروگیں میڑاں شھید کنگ بنت۔
ترانکاراں تران کنان ءَ گْوشتگ کہ بی این ایم ءِ مردمی ھکانی بھرگ پانک ءِ رِد ءَ ایوک ءَ نومبر 2023 ءِ گُڈی دوئیں ھپتگاں ھشت زور بیگواھیں بلوچ دروگیں میڑاں کُشگ بیتگ۔چہ ایشاں یکے کے بالاچ ء مولابکش اِنت کہ پاکستانی لشکر ءَ 28 اکتوبر ءَ چہ گِس ءَ آوار جتگ ءُ بیگواہ کُرتگ ءُ پد ءَ نومبر ءَ دروگیں میڑے ءِ نام ءَ شھید کُرتگ۔
آیاں گْوشتگ کہ بالاچ ءِ کھول داں یک ھپتگے ءَ لاش ءِ ھمراھی ءَ تربت شھر ءَ زھرشانی ءَ نشتگ۔اے زھرشانی ءَ بازیں کچے ءَ مردماں بھر زُرتگ ءُ سرجمیں بلوچستان ءَ روانک ءُ زھرشانی کنگ ءِ ھواری ءَ چاگردی رسانکدر ءَ ھم مردماں توار چِست کُرتگ بلے انگت آیاں انساپ نہ رس اِتگ۔
آیاں گْوشتگ کہ بی این ایم بلوچستان ءَ پاکستانی لشکر ءِ زوراکیانی پدر کنگ ءُ سی ٹی ڈی ءِ دروگیں میڑانی پدر کنگ ءَ دیمتر ءَ ھم زھرشانی کنت ءُ جھان ءَ پاکستانی ریاست ءِ ناشرکاری چھرگ ءَ پیشدار ایت۔
بنشون: درشان / اکس: اھوالکار
