بلوچ راجی زْرمبشت( بی این ایم) ءِ بنجاھی جارکش ءَ وتی شنگ کُرتگیں درشانے ءَ پشتون تھپُز مومنٹ ءِ سرکماش منزور پشتین ماں تُربت ءِ آھگ ءِ جار ءِ سر ءَ وش اتک کُرتگ ءُ گْوشتگ کہ بلوچ ،پشتون ءُ پاکستان ءِ دُرسیں ایردست ءُ نزوریں راجانی درد ءُ توریشت، ارس ءُ دُژمن یکے۔ ایردستیں راجانی ھستی ءُ پہ منگِھ زندگ بیگ ءِ راہ وتی راجی گْوستانک ءِ پجارگ ءِ ھواری ءَ ھم سنتیں جُھد ءُ دُرسیں نزوریں راجانی درد ءُ تورشتانی مارگ ءُ ھمدست ءُ ھمکوپگ بیگ اِنت۔
جارکش ءَ گْوشتگ کہ پاکستان پہ نزوریں راجاں یک بندیگجاھے جوڑ بیتگ۔اے بندیگجاہ ءِ تہ ءَ ھچ بندیگ وتی واھگانی پد ءَ ھچ سُر اِت نہ کنت۔پُرایمنیں جُھدے منّوک منزور پشتین وھدے کہ تربت ءَ زھرشانی نندانک ءِ آھگ ءِ جار جت گڑا بندیگجاہ ءِ وھند ءُ واکداری ءِ مستریں واھُند پاکستانی لشکر ناوش بیتگ چے ءَ کہ ایردستانی وت ماں وتی رھوت ءُ ھمدست بیگ ریاست ءِ مرگ اِنت۔وھدے کہ منزورپشتین تربت ءِ نیمگ ءَ رھادگ بوت گڑا آئی ءِ گاڑی ءُ کاروان ءَ ھواریں آدگہ گاڑی تچکے ءَ تیر جنگ ءُ نشانگ کنگ بوت اَنت۔منزور تیرگْواری ءَ رَک اِت بلے دزگیر کنگ ءُ بندیگجاہ ءَ برگ بوت۔ منزور پشتین ءِ کاروان ءِ سر ءَ تیرگْواری کنگ ءُ پہ زور دارگ ءُ آئی ءِ جند بندیگجاہ ءَ برگ ءُ بند کنگ اے گپے گْواھی ءَ دنت کہ پاکستانی ریاست چہ ایردستانی ھواریں جُھد ءَ تُرسگ ءَ اِنت۔
آئی ءَ گْوشتگ کہ پاکستان ءَ واکدار ءُ سروک پنجاب ءُ پنجابی لشکر اِنت۔آدگہ دُرسیں راج ایردستی ءِ زندگی یے گْوازینگ ءَ اَنت۔ھچ راج ءَ وتی زبان ءُ دودمان ءِ دیمروئی دیگ ءِ موکل نیست۔ نہ ایوک ءَ موکل نیست بلکیں مئے زبان ءُ دودمان ءِ ھلاس کنگ ءِ جُھد کنگ بیگ ءَ اِنت۔بلوچستان ءَ زانشتی ادارہ لشکرجاہ جوڑ کنگ بیتگ اَنت کہ اود ءَ کتاب ءِ برگ ءِ سر ءَ پابندی اِنت۔پیش ءَ ما لاھور ءَ دیستگ کہ بلوچستان ءَ بیتگیں مراگش ریاست ءَ پہ زور ماٹو کُرتگ اَنت ءُ گْوستگیں ماہ ءَ تربت ءَ پروپیسر منزور بلوچ یک مراگشے ءَ روگ ءَ اَت کہ دارگ بوت۔
جارکش ءَ گْوشتگ کہ منزور پشتین ءِ سر ءَ تیرگْواری ءُ کاروان ءَ ھواریں آدگہ پشتون براتانی ٹپی بیگ ءَ بژنیگ ایں ءُ ریاست ءِ اے کار ءَ گوں تُردے ءَ ایر جن ایں۔ بلوچ ءُ پشتو یک نیمگے چُکچین کنگ بیگ ءَ اَنت ءُ دومی نیمگ ءَ آیان وتی مردمانی درد ءُ توریشتانی بابت ءَ گپ کنگ ءِ موکل نیست بلے دُرسیں ایردستیں راجاں مار اِتگ کہ پاکستان یک وتگڑیں ڈیھے ءُ دستیگ کنگ ءُ جوڑ کنگ بیتگ ءُ مئے راجی ھستی ءُ راجی پجار ءَ بےسر ءُ زورگریں پاکستانی پجار جوڑ کنگ ءَ ریاست ھزاراں پندل کارمرز کنگ ءَ اِنت۔اے مارشت ءَ پاکستانی ریاست جکسینتگ۔
آئی ءَ گْوشتگ کہ بوت کنت منزور پشتین تربت ءَ سر بوت مہ کنت بلے پہ ھمدردی ءَ آئی ءِ کلوہ ءُ آھگ ءِ واھگ، ھمے وت پہ نزوریں راجانی باندات ءَ ھواری ءَ جُھد کنگ ءِ سْوب جوڑ بیت۔
بنشون: درشان / اکس: زرمبش
