مراگش:ریڈیو ھال?
بنگپ :ریڈیو ھال شمبے 28مارچ 2020
شنگکار:ریڈیو زرمبش بلوچی

➖➖➖➖➖➖

?روتاک زرمبش بلوچی?
?شمبے»28مارچ 2020| زرمبش ھال

?سرھال?

✪تپتان ءَکورونا ءِ تالانی ءِ بنیاد ایرکنگ بیتگ|بلوچ زورگریں سرکار ءِ کمک ءِ واستیگ مہ بہ اَنت وت ءَ وت بہ پھریز اَنت‘ڈاکٹر اللہ نزر
✪جھان پتائیں وبا کورونا ءِ پژدر ءَ بلوچ بیگواھانی توار ءِ شدکشیں زھرشانی‘ماٹو
✪مند:بلوچستان راجی سنگر ءِ سرمچارانی دژمن ءِ سر ءَ ارش|5 دژمن مرتگ ءُ میجر ءَ ھوار 4 زدگ
✪چہ سویڈن ءَ بلوچ اھوالکار ساجد ھسین بیگواہ
✪تمپ:پاکستانی لشکریانی سر ءَ اُرش
✪جاھو ءَ پاکستان ءِ لشکر ءِ چاریگے «بلوچستان راجی سنگر» ءَ مرگ ءِ ڈنڈ داتگ
✪آواران:پاکستانی لشکر ءَ ورنایے آوار جتگ
✪ھزدار: کبیر ءُ ھمراھانی بیگواھی ءَ 11سال سرجم
✪بلوچستان ءُ سیستان:ھار ءَ لین دئی دامگ ءَ یک میلیارد ءُ 171 میلون ءِ تاوان داتگ
✪بلوچستان ءُ سیستان:ھور آسر ، گندیم ءِ رون بندات
✪بلوچستان ءُ سیستان:چہ کورونا ءَ 13 مرتگ | 173 نادراہ اِنت
✪پھرگ:سھرنوک ءَ پہ کورونا ءِ دیمگیری ءَ مردماں پنوم،دستکش ءُ وائرس کش داتگ
✪بلوچستان ءُ سیستان:گوستگیں چاردہ روچانی تہ ءَ دگ وھیلاں 11 مرتگ ءُ 47 زدگ بیتگ
✪بلوچستان ءُ سیستان:سالینہ ھورانی میانگین 150 ملی میٹر ءَ رس اتگ | 13 سال بیت کہ چوشیں ھوراں نہ گورتگ
✪تھران:رمبے دلمانگ اِنت کہ چہ مردمانی کورونا جتیں زندمان ءِ لڑیں آپ ءَ سیاسی ماھیگ بہ گر ایت‘ایران سرکاری جارکش
✪جھان ءَ کورونا ءِ نادراھانی کچ داں 5 لک ءَ سر
✪اوگانستان ءَ 2 دری ءُ نیٹو ءِ 4کارمند کورونا ءِ نادراھی ءَ گیپتگ
✪چہ کورونا وائرس ءَ ماں ازرائیل ءَ 10 کس بیران
✪کورونا ءَ 2/3 ماہ ءِ تہ ءَ پروش دئے ایں‘پیوتن
✪پلپین ءِ سرلشکر ھم کورونا ءِ آماچ

➖➖➖➖➖➖

?رودرتکی بلوچستان?

تپتان ءَکورونا ءِ تالانی ءِ بنیاد ایرکنگ بیتگ|بلوچ زورگریں سرکار ءِ کمک ءِ واستیگ مہ بہ اَنت وت ءَ وت بہ پھریز اَنت‘ڈاکٹر اللہ نزر

?بلوچ راھشون ڈاکٹراللہ نزر ءَ واگریں نادراھی کورونا ءِ پژدر ءَ چہ بلوچاں لوٹ کرتگ:آ وتی لوگاں بہ نند اَنت داں چہ اے وبا ءَ بہ پھریز اَنت۔اگاں اے وبا ماں بلوچستان ءَ تالان بہ بیت گڑا ایشی گر ءُ دار باز گران بیت پرچاکہ بلوچستان ءَ ھچ وڑیں آسراتی ءُ درمان نیست۔اے دیمروی کرتگیں باریگ ءَ بلوچستان ءِ مردم چہ ملیریا ءُ دگہ ھما نادراھیاں مرگ ءَ اَنت کہ آھانی درمان ھست اَنت۔ پہ ایردستیں راج ءَ اے نوکیں گپے نہ اِنت۔زورگر ءِ گْوستانک ھمے گْوش ایت کہ پہ زورگر ءَ ڈیھ ءِ جاھمننداں گیش آئی ءِ مال ءُ مڈی ارزشت دار اَنت۔ زورگریں پاکستان ءَ ھپتاد سالاں بلوچستان ءِ مال ءُ مڈی چَل ءِ نھاد ءَ بھا کرتگ ءُ مئے ھزگاریں ڈیھ لُٹ ءُ پُل کرتگ بلے ڈیھ ءِ واھنداں ابید زوراکی ءُ بزگری ءَ دگہ ھچ نہ داتگ۔

آئی ءَ گْوشتگ:بلوچستان ءَ جاندراھی آسراتی چی ھست اے گپ شری ءَ پدر اِنت کہ سرجمیں بلوچستان ءِ تہ ءَ ایوک ءَ چار ونٹی لیٹر ھست اِنت۔کورونا وائرس ءَ آماچیں مردمانی جاندراھی ءُ آھانی چارگ ءَ اے بنکی ءُ شرتریں مشین اِنت۔نادراھجاھاں یک کریں ترھجاہ ایوک ءَ شال ءِ شیھ زاید ءِ نادراھجاہ ءَ ھست کہ آ ھم چہ 12 کت ءَ گیش نہ اَنت۔اے جاورانی تہ ءَ پہ بلوچ راج ءَ گھتریں درمان پھریز اِنت۔مئے گیشتریں مردم کوچگ ءُ کوھانی تہ ءَ جاھمنند اَنت کہ آھانی کار کشت ءُ کشار اِنت۔ باید اِنت کہ آ وتی لوگانی تہ ءَ بہ نند اَنت ءُ ھرچی کہ آیانی گور ءَ ھست ھماھانی سر ءَ وتی روچاں بہ گوازین اَنت ھچ وڑا پاکستان ءِ اوست ءُ کمکانی وداریگ مہ بہ اَنت۔پرچا کہ چہ مردمی کٹ ءَ کپتگیں پاکستان اے وباءَ بلوچ راج ءِ بگیری ءَ یک جنگ ابزارے ءِ وڑ ءَ کارمرد کنگ ءَ اِنت۔

بلوچ راھشون ڈاکٹر اللہ نزر ءَ گْوشتگ کہ مارا باور اِنت کہ پاکستان وتی زورگری ءِ مھرکم کنگ ءَ ھپت دھکاں برجاھیں زوراکی ءُ چکچینی ءَ کورونا وائرس ءِ پارست ءَ دیم ءَ بران کنت۔ بلوچستان ءِ دیمروی ءُ ھژدھمی ترمیم، کنکرنٹ لسٹ ءَ ھوار سرجمیں اوگام بلوچ راج ءِ ایردستی ءِ برجاہ دارگ ءِ پندل اَنت۔
آئی ءَ گْوشتگ تپتان ءِ کورنٹین بنجل یک پدریں درورے کہ چہ ایران ءَ اتکگیں چارھزار پنچ سد مردم نام گپتیں یک گوری ءَ گوں ھما سد مردماں یکجا کنگ بیتگ اَنت کہ آ نادراہ اَنت۔چہ ھمد ءَ پاکستانی لشکر ءِ چیردستی ءَ بلوچستان ءِ تہ ءَ کورونا وائرس ءِ تالان کنگ بندات بیتگ۔نی اے وبا ءَ سرجمیں بلوچستان ءَ تالان کنگ ءَ اَنت داں بلوچاں گوں ھمے وبا ءَ بے کٹین اَنت۔ آئی ءَ چہ بلوچ راج ءَ لوٹ کُرتگ کہ بلوچ راج پاکستان ءِ پندلاں پوہ بہ بیت ءُ وتی لوگانی تہ ءَ بہ نند اِیت ءُ دری آؤکیں ھر وڑیں مردماں چہ وت ءَ دور بہ دار اِیت۔

---★---
جھان پتائیں وبا کورونا ءِ پژدر ءَ بلوچ بیگواھانی توار ءِ شدکشیں زھرشانی‘ماٹو

? بیگواھیں بلوچانی توار ءِ کمک کماش ماما کدیر ءُ کماش نسراللہ ءَ شال پریس کلب ءِ دیم ءَ جتگیں شدکشیں زھر شانی گدان ءِ پہ چیزے روچ ءَ ماٹو کنگ ءِ جار پرینتگ۔ اے جار کورونا وائرس ءِ پژدر ءَ جنگ بیتگ۔پاکستانی لشکر ءِ دست ءَ پہ زور بیگواہ کرتگیں مردمانی درکنگ ءَ اے شدکشیں زھرشانی گدان ءَ سئے ھزار ءُ نوسد ءُ سی ءُ چار روچ اَت کہ یکشل ءَ برجم اَت۔گْوستگیں یازدہ سالانی تہ ءَ اے سری رند اِنت کہ گدان پیچگ بیتگ۔

ھمے درگت ءَ ماما کدیر ءَ گْوشتگ:گْوستگیں یازدہ سالاں ھر وڑیں سکی، سارتی،گرمی، ھور ءُ ھرگاں پہ بیگواھیں مردمانی یل کنائینگ ءَ مئے شدکشیں زھر شانی گدان برجاہ بیتگ۔زمستان ءَ ما وتی زھر شانی گدان پہ سئے ماہ ءَ چہ شال ءَ کراچی ءَ برتگ ءُ برجاہ داشتگ۔پہ بیگواھیں مردمانی یل کنائینگ ءَ ما شال ءَ بہ گر داں اسلام آباد ءَ پادانی سئے ھزار کیلومیٹر پند ھم بُر اتگ۔ اے یازدھیں سالانی میان ءَ ما میان استمانی ءُ ڈیھی راھبندانی پاسداری کرتگ۔ بلے دومی نیمگ ءَ پاکستانی لشکر ءُ چیریں ترامگیجکار ھمک گام ءَ وتی ڈیھ ءُ میان استمانی راھبنداں لپاشگ ءَ اَنت۔

آئی ءَ گْوشتگ وبا ءِ روچاں ھم پاکستانی لشکر بلوچاں آوار جنگ ءُ بیگواہ کنگ ءَ اِنت۔

گڈسر ءَ ماما کدیر ءَ درائینتگ:جھان پتائیں وبا کورونا ءِ گر ءُ دار ءَ بلوچستان سرکار ءَ داں 4 اپریل ءَ بندآرگ ءِ جارجتگ۔ما بلوچستان سرکار ءِ جار ءِ منگہ ءَ کن ایں ءُ چیزے روچ ءَ وتی زھر شانی گدان ءَ ماٹو کنگ ءِ جار ءَ پرین ایں ءُ دیمتر ءِ جاوراں چارگ ءَ پد پہ گْوم ءُ گیگ اے شدکشیں زھرشانی ءَ برجاہ دار ایں۔
--★---
مند:بلوچستان راجی سنگر ءِ سرمچارانی دژمن ءِ سر ءَ ارش|5 دژمن مرتگ ءُ میجر ءَ ھوار 4 زدگ

?بلوچستان راجی سنگر ، بی ایل ایپ ءِ جارکش میجر گْوھرام ءَ گْوشتگ کہ چار شمبے ءِ بیگاہ ءَ سرمچاراں مند ءِ ھند ردیگ نکو کنڈگ ءَ پاکستانی لشکر ءِ کاروان ءِ سر بستگ ءُ آئی ءِ سر ءَ گوں راکٹ ءُ مزنیں سلاھاں ارش کرتگ۔

میجر گوھرام ءَ گوشتگ کہ سرمچاراں ھما وھد ءَ لشکر ءِ سر ءَ اُرش کرتگ کہ لشکری میجرے سیمسر ءَ بندگ بیوکیں ٹٹ ءِ چارگزار ءَ پد واترگ ءَ بیتگ، چہ اے ارش ءَ پنچ دژمن مرتگ ءُ پاکستانی لشکر ءِ میجر مشتاک ءَ ھوار چار زدگ بیتگ۔

---★---
چہ سویڈن ءَ بلوچ اھوالکار ساجد ھسین بیگواہ

? بلوچستان ٹائمز ءِ سر شونکار ساجد ھسین چہ 2 مارچ 2020 ءَ چہ سویڈن ءِ شھر اُپسالا ءَ بیگواہ اِنت۔

ساجد ھسین چہ سویڈن ءِ شھر اسٹاک ھوم ءَ لڈگ ءَ پد اپسالا ءَ پہ وتی نوکیں کار ءُ وانگ شتگ اَت۔وتی نوکیں کار ءِ رد ءَ ساجدھسین اپسالا زانشتجاہ ءَ وانین ایت ءُ ھمے پجیگ ءَ پہ دیمتر ءَ وان ایت ھم۔ پمیشکا آئی ءَ چہ زانشتجاہ ءِ نیمگ ءَ وابجاہ ءَ کتے دیگ بیتگ اَت۔ 2 مارچ ءَ اپسالا ءَ سر بیگ ءَ پد داں دو ادار آئی ءَ گوں وتی سنگتاں اھوال کرتگ چہ آئی ءَ پد آئی ءِ ھچ وڑیں گواہ نیست۔

آئی ءِ سنگتاں اے میان ءَ گوں ھندی پولیس ءَ رھوت کرتگ ءُ ایشیءِ پجیگ ءَ سویڈن ءَ بیگواہ بیتگیں مردمانی درگت ءَ کارکنوکیں گل ھم آئی ءِ بیگواھی ءِ درگت ءَ سرپد کنگ بیتگ۔دنیگت سویڈن پولیس ءُ آئی ءِ جند ءِ نزیکیں مردمانی نیمگ ءَ ھچ چوشیں گپے دیم ءَ نَے اتکگ کہ آ چونیں جاوراں بیگواہ بیتگ۔

بلوچستان ٹائمز ءَ چہ سویڈن ءِ پولیس ءَ لوٹ کُرتگ کہ آ ساجد ھسین کرد ءُ کاراں دیم ءَ ایر بہ کنت ءُ آئی ءِ شوھازگ ءَ مادنیں گامگیج بہ زیرایت۔
---★---
تمپ:پاکستانی لشکریانی سر ءَ اُرش

پنچ شمبے ءِ روچ ءَ تمپ ءِ کوھی دمگ دیزوی ءَ پاکستانی لشکریانی سر ءَ بلوچ سرمچاراں اُرش کرتگ۔اُرش ءَ لشکر ءَ بازیں کَچے ءَ جانی ءُ مالی تاوانانی دیمپانی بیتگ۔
اُرش ءَ پد لشکر ءَ وتی بالیگ بال داتگ اَنت ءُ چار اتگ۔
---★---
جاھو ءَ پاکستان ءِ لشکر ءِ چاریگے «بلوچستان راجی سنگر» ءَ مرگ ءِ ڈنڈ داتگ

?پنچ شمبے ءِ روچ ءَ آواران ءِ دمگ جاھو ءَ مردمے ءِ تیر سپتگیں کنٹ دزکپتگ۔

دمگی مردمانی رد ءَ دزکپتگیں کنٹ ءِ پجار « ھدا داد ء نورا» ءِ نام ءَ بیتگ۔گوشگ بیگ ءَ اِنت کہ ھدا داد شش روچ ءَ پیسر ناشناسیں سلاہ بنداں چہ ڈوکی کور ءَ آوار جتگ ءُ برتگ ءُ آئی ءِتیرسپتگیں کنٹ چہ گوھلیٹ کور ءَ دزکپتگ۔ بلوچستان راجی سنگر، بی ایل ایپ ءَ اے کوش ءِ زمہ واری من اتگ ءُ گْوشتگ کہ کشگ بیتگیں مردم راج دْروھے بیتگ۔

میجرگوھرام ءَ پہ رسانکدر ءَ شنگ کرتگیں درشانے ءَ گْوشتگ:سرمچاراں بیست مارچ ءَ پاکستانی چیریک «ھداداد ء نورا» جاھمنند جاھو ترجی کور دزگیر کرتگ۔

جارکش ءَ دیمتر ءَ گْوشتگ کہ اے پاکستانی چانیگوار چد ءُ پیش بازیں براں گْوشگ بیتگ کہ آ بلوچ ءِ دژمنی ءَ یلہ بہ کنت ءُ سرمچارانی رندگیری مہ کنت بلے چہ بازیں گْوشگاں پد ھم آئی ءَ وتی سلکاری یلہ نہ داتگ اَنت۔

جستءُ پرس ءِ میان ءَ پاکستانی چاریگ ءَ دپ ء وت من اتگ کہ آئی ءَ بازیں براں سرمچارانی رندگیری کرتگ، سرمچارانی رؤگ ءُ آھگ ءِ درگت ءَ ھم زورگریں لشکر ءَ ھال سرکرتگ ءُ لشکرکشیانی تہ ءَ زورگریں لشکر ءِ ھمراھداری کرتگ۔

میجرگوھرام ءَ گْوشتگ:جست پُرس ءِ میان ءَ آئی ءَ وتی ھمراھانی نام ءُ نشان ھم داتگ اَنت۔چاریگ ھداداد چار شمبے ءِ روچ ءَ چہ بلوچ آمیدگس ءِ نیمگ ءَ مرگ ءِ ڈنڈ دیگ بیتگ۔
---★---
آواران:پاکستانی لشکر ءَ ورنایے آوار جتگ

? آواران ءِ ھند مالار کھن ءَ پاکستانی لشکر ءَ بیڑ بُرتگ ءُ «نئیم ء پینڈوک» آوار جتگ ۔ لشکرکشی ءِ میان ءَ آیاں جنین ءُ زھگ ھم لٹ داتگ اَنت۔
---★---
ھزدار: کبیر ءُ ھمراھانی بیگواھی ءَ 11سال سرجم

?چہ ھُزدار ءَ بیگواھیں کبیر ،مشتاک ءُ اتااللہ ءِ بیگواھی ءَ 11سال سرجم بیتگ۔ھرچ سئے ئیں 27مارچ 2009 ءَ چہ آمیدگس ءِ دیم ءَ پاکستانی لشکر ءِ کارمنداں آوار جنگ ءَ پد بیگواہ کرتگ اَنت۔

?روکپتی بلوچستان?

بلوچستان ءُ سیستان:ھار ءَ لین دئی دامگ ءَ یک میلیارد ءُ 171 میلون ءِ تاوان داتگ

? چہ ھار ءَ بلوچستان ءُ سیستان ءِ لین دئی دامگ ءَ یک میلیارد ءُ 171 میلون تومن ءِ تاوان رس اتگ۔

بلوچستان ءُ سیستان ءَ لین دیوکیں شرکت ءِ کارمستر «ھلیل اوز زادہ» ءَ شمبے ءِ روچ ءَ گوں رسانکدر ءَ گپ جنان ءَ گْوشتگ:سراوان، میرجاوہ، زابل، ھامون،نیمروز، واش،کنرک،نیکشھر(اسپکہ)، پھرگ(بزمان)، راسک،سربازءُ نگور(پلان) چہ ھماں دمگان اَنت کہ آ اُود ءَ تاوان بیتگ۔

آئی ءَ گْوشتگ: چہ نیم پژاریں وائراں نزیک ء 7 کیلومیٹر ءُ 66 پادگ،نزوریں پژار ءَ نزیک ء 2 کیلومیٹر ءُ 37پادگ ءُ سئے گواتی ٹرانسپارمراں تاوان رس اِتگ۔

آئی ءَ درائینتگ:چہ تاوان ءَ پد گوں اشتاپی ءَ پرشتگیں پادگ ءُ ھرابیں ٹرانسپارمر شر کنگ بیتگ اَنت ءُ سرجمیں جاھاں پیشیگیں پیم ءَ لین رسگ ءَ اِنت۔

گال زانتی:لینی دئی دامگ:شبکہ برق | لین:برق،بجلی | پژار: فشار، نیم پِژار:فشارمتوسط | وائر:کابل
---★---
بلوچستان ءُ سیستان:ھور آسر ، گندیم ءِ رون بندات

? ھور ءِ آسر بیگ ءَ پد بلوچستان ءُ سیستان ءَ گندیم ءِ رون بندات بیتگ۔

سرکاری بنشون ءِ رد ءَ بلوچستان ءُ سیستان ءَ 68 ھزار ءُ 140 ایکٹر ڈگاراں گندیم کشگ بیتگ ءُ چہ کشار ءَ گمان بیگ ءَ اِنت کہ چہ پیشگی سال ءَ اے سالی کشار دو سری گیش بیت۔

بلوچستان ءُ سیستان ءِ کشاوردی تک ءِ سروک «گلام ھیدر زورکی»ءَ گْوشتگ: اے سالی پہ گندیمانی روناں 200 کمباین کاربوج ساڑی اِنت ءُ اے رد ءَ ھچ رنگیں پریشانی نیست۔

آئیءَ گْوشتگ:چہ سرکار ءِ نیمگ ءَ1کیلو گندیم ءِ نھاد 2500تومن پیش گْوشی کنگ بیتگ ءُ بلوچستان ءُ سیستان ءِ کشاورد 68 ھزار ٹن گندیم سرکار گور ءَ بھا کن اَنت۔
---★---
بلوچستان ءُ سیستان:چہ کورونا ءَ 13 مرتگ | 173 نادراہ اِنت

? بلوچستان ءُ سیستان ءَ چہ کورونا ءَ مرتگیں مردمانی کچ 13 ءَ سر بیتگ درسی 173 کس کورنا وائرس ءَ گیپتگ۔

دزاپ ءِ جاندراھی زانشتجاہ ءِ سروک ڈاکٹرسیدمھمدھاشمی شھری ءَ گْوشتگ چہ مرتگیں مردماں 7 کس دزاپ جاندراھی زانشتجاہ ءِ پرگنگ ءَ ، 5 کس زابل زانشتجاہ ءُ 2 کس ایرانشھر ءِ زانشتجاہ ءَ ھمگرنچیں دمگاں بیران بیتگ۔

داں آدینگ ءِ نیمروچ ھشت پروردین شمسی ھجری سال ءِ 1399 ھمدپ گوں 27 مارچ سال 2020 ءَ ، چہ آزمایش ءَ ماں بلوچستان ءُ سیستان ءَ 5 نادراہ گیش بیتگ ءُ نادراھانی کچ 173 ءَ سر بیتگ۔

چہ ایشاں 117 دزاپ زانشتجاہ، 39 زابل زانشتجاہ ءُ 17 کس ایرانشھر ءِ زاشتجاہ ءِ چیردستی ءَ کارکنوکیں نادراھجاھاں نپادیگ اَنت۔زانگ بہ بیت کہ سرجمیں بلوچستان ءِ نادراھجاہ ءُ درمانجاہ ھمے سئے ئیں زانشتجاھانی چارگزاری ءَ کار کنگ ءَ اَنت۔ بلے چہ سرکاری بنشون ءِ نیمگ ءَ دنیگت چوش گْوشگ نہ بیگ ءَ اِنت کہ اے نادراہ کجام کجام شھرئیگ اَںت۔ چد ءُ پیش اے ھبر منگ بیتگ کہ چھبار شھر ءِ نادراھجاہ ءَ ھم کورونا ءِ نادراہ نپادی کنگ بیتگ اَنت۔
---★---
پھرگ:سھرنوک ءَ پہ کورونا ءِ دیمگیری ءَ مردماں پنوم،دستکش ءُ وائرس کش داتگ

? چہ پھرگ ءِ سھرنوک ءِ نیمگ ءَ پنچ ھزار بستگاں گیش جاندراھی سامان گوں سر ءُ سوجی پنتاکاں پہ کورونا ءِ دیمگیری ءَ وازمندیں مردماں دیگ بیتگ۔

پھرگ ءَ سھرنوک ءِ سروک «مھمدرزا کرد» ءَ شمبے ءِ روچ ءَ ھمے درگت ءَ درائینتگ:اے بستگانی تہ ءَ دستکش،پنوم، سابون، وائرس کش ءُ سر ءُ سوجی پنتاک ھوار بیتگ کہ وازمندیں مردماں چہ سھرنوک ءِ نیمگ ءَ دیگ بیتگ اَنت۔

گال زانتی:سھرنوک:ھلال احمر | بستگ: بستہ، پیکج | سر ءُ سوجی پنتاک:بروشورھای آموزشی | پنوم: ماسک
---★---
بلوچستان ءُ سیستان:گوستگیں چاردہ روچانی تہ ءَ دگ وھیلاں 11 مرتگ ءُ 47 زدگ بیتگ

? گوستگیں چاردہ روچانی تہ ءَ بلوچستان ءُ سیستان ءَ بیتگیں دگ وھیلانی تہ ءَ 11مردم مرتگ ءُ 47 کس زدگ بیتگ۔

بلوچستان ءِ راہ پولیس ءِ رد ءَ 25 اسپند ءَ بہ گر داں انی 36 دگ وھیلانی تہ ءَ اے مردم مرتگ ءُ زدگ بیتگ اَنت۔ چہ ایشاں 40 ماں سدی وھیل چہ گاڑیانی چپ بیگ ءَ، 30 ماں سدی گوں دگہ گاڑیاں ڈک ورگ ءَ ءُ آدگہ گوں پیادگ ءُ پرپٹ سواریں مردماں بیتگ اَنت۔

گال زانتی: دگ وھیل:تصادف، سڑک پر پیش آنے والے حادثات | پرپٹ سوار:موتوسیکلت سوار، بائک رائڈر
---★---
بلوچستان ءُ سیستان:سالینہ ھورانی میانگین 150 ملی میٹر ءَ رس اتگ | 13 سال بیت کہ چوشیں ھوراں نہ گورتگ

? 13 سالانی تہ ءَ سری رند اِنت کہ بلوچستان ءُ سیستان ءِ پرگنگ ءَ سالینہ ھور ءِ میانگین 150 ملی میٹر ءَ رس اتگ ۔

بلوچستان ءُ سیستان ءِ گوات پجاری تک ءِ مستر موسن ھیدری ءَ گوں تامر ءِ پارست ءَ اھوالکارانی نیادے ءَ گپ جنان ءَ گْوشتگ کہ بلوچستان ءَ سال ھجری شمسی ءِ 98 داں 99 ءَ بیتگیں ھور 13 سال ءِ تہ ءَ چہ درساں گیشتر اَنت۔

آئی ءَ گْوشتگ:سال 98 ھجری شمسی ءَ نیکشھر ءَ 333 ملی میٹر ھور ءَ گورتگ کہ بلوچستان ءَ چہ درساں گیشتر ھور ءَ ھمد ءَ گورتگ۔11 سال اَت کہ چوشیں ھوراں نہ گورتگ اَت ءُ اے سالیگیں ھور کہ بیتگ اَنت اے پیمیں ھور ءَ 19 سال بیت کہ نہ گورتگ۔

آئی ءَ گْوشتگ:گوستگیں سال ءَ سرجمیں بلوچستان ءَ میانگینی 3.3 میٹر آپ باپ بیتگ۔

گال زانتی: گوات پجاری: ھواشناسی، محکمہ موسمیات|پارست:ذریعہ ، توسط | تامر:ویڈیو | باپ:تبخیر

?ایران?

تھران:رمبے دلمانگ اِنت کہ چہ مردمانی کورونا جتیں زندمان ءِ لڑیں آپ ءَ سیاسی ماھیگ بہ گر ایت‘ایران سرکاری جارکش

? تھران: ایرانی سرکار ءِ جارکش «الی ربیئی» ءَ گْوشتگ کہ کورونا بِھ سیاسی گوازی یے نہ اِنت۔مرتگیں مردمانی کچ ءُ ایشی ءِ ایران ءُ جھان ءِ گزرانک ءِ سر ءَ سان اے پیش دار اَنت کہ ایشانی جار ءِ پرینگ گوں ھچ سیاسی دیدانک ءَ بندوک نہ اِنت بلکیں اے ایوک ءَ میلون ھا ایرانیانی جان پھزی ءِ جیڑہ اِنت۔

آئی ءَ گْوشتگ:من چہ ھما روچ ءَ کہ کورونا ءِ درگت ءَ بنداتی نیاد بیتگ اَت۔ رسانکدر ءِ جھگیر ءُ شونکارانی دیم ءَ اے ھژدار داتگ کہ اگاں کورونا ءِ جیڑہ تھی ءُ ڈنی سیاسی بگیری ءُ میاربارانی گر ءُ دار ءِ تہ ءَ مان بہ گیش ایت۔ مردمانی تاب ورگ ءُ سرکار ءِ اے جھان پتائیں نادراھی ءِ گر ءُ دار ءَ کوشست نزور تر اَنت۔

آئی ءَ گیش کرتگ:بازمردماں اے ھژدار مان نہ یارتگ۔سری رند اِنت کہ سرکار ءِ بگیرداراں لوٹ اتگ کہ گچینکاریاں مردمانی نہ آیگ ءَ گوں کورونا ءَ بندوک بہ کن اَنت بلے ایشی ءِ تہ ءَ آیانی جند ءِ کرد گون بیتگ، کورونا ءِ آیگ ءِ جار ءَ چہ گچینیکاریاں لھتے روچ پیش ھمگرنچ کنگ۔«گلابی ئیں کورونا» رنگیں گال شکسایگ ھمے درانگازی ءَ کن اَنت کہ یک جاندراھی جیڑھے پہ وتی سیتاں سیاست زدگ کنگ بیتگ۔ھما وھدی من مار اتگ کہ رمبے لوٹ ایت چہ مردمانی کوروناجتیں زندمانی ءِ لڑیں آپ ءَ سیاسی ماھیگ بہ گر ایت۔

?جھان?

جھان ءَ کورونا ءِ نادراھانی کچ داں 5 لک ءَ سر

? جھانی جاندراھی گل ءِ27 مارچ ءَ شنگ کرتگیں گزارش ءِ رد ءَ اے وھدی سرجمیں جھان ءَ کورونا ءِ نادراھانی کچ 5 لک ءَ سر بیتگ۔

ایران ءَ 29406 کس،پاکستان ءَ 1057،سھودی ءَ 1012،گتر ءَ 549،بھرن ءَ 458،امارات ءَ 333،کویت ءَ 208،امان ءَ 109 ءُ اوگانستان ءَ 80 مردم کورونا ءِ نادراھی ءَ گیپتگ۔

چہ کورونا ءِ نادراھی ءَ ایران ءَ داں انیگ ءَ 2234،پاکستان ءَ 8،سھودی ءَ 3،گتر ءَ ھچ،بھرن ءَ 4،امارات ءَ 2،کویت ءَ ھچ،اومان ءَ ھچ ءُ اوگانستان ءَ 2 کس بیران بیتگ۔

زانگ بہ بیت کہ اے شمارینک چہ جھانی جاندراھی گل ءِ نیمگ ءَ شنگ کنگ بیتگ اَنت ، ھندی ھالتاکانی تہ ءَ شنگ بیتگیں شمارینک دگہ بوت کن اَنت۔
---★---
اوگانستان ءَ 2 دری ءُ نیٹو ءِ 4کارمند کورونا ءِ نادراھی ءَ گیپتگ

?کابل: اوگانستان ءِ جاندراھی تک ءِ جارکش «وحیداللہ مایار» ءَ گْوشتگ کہ ڈیھ ءَ نوول کورونا وائرس ءِ 11نوکیں نادراہ زانگ بیتگ۔چہ ایشی ءَ پد ڈیھ ءَ نادراھانی کچ 91 بیتگ۔آدینگ ءِ روچ ءَ 8 نوکیں نادراہ ھرات ءُ 2 چہ نیمروز ءَ دیم ءَ اتکگ۔
---★---
چہ کورونا وائرس ءَ ماں ازرائیل ءَ 10 کس بیران

ازرائیل ءِ جاندراھی ءِ وزیر ءَ گْوشتگ:چہ کورنا وائرس ءَ 10مردم بیران بیتگ ءُ آماچیں مردمانی کچ 3035 اِنت۔ایشانی تہ ءَ 48 نادراھانی جاور نگیگ اِنت۔
---★---
کورونا ءَ 2/3 ماہ ءِ تہ ءَ پروش دئے ایں‘پیوتن

ماسکو:روسی مھتر ولادی میر پیوتن ءَ گْوشتگ:روس کم چہ کم 2/3ماہ ءِ تہ ءَ کورنا وائرس ءِ پروش دیگ ءَ سوبین بیت۔
---★---
پلپین ءِ سرلشکر ھم کورونا ءِ آماچ

پلپین ءِ سرلشکر پیلمون سانتوس ھم کورونا ءِ آماچ بیتگ۔ امریکا ءِ دریائی گُراب ءِ 23 کارمندانی تہ ءَ ھم کورونا ءِ نادراھی گندگ بیتگ۔
?