گوادر: زورگریں پاکستانی لشکر ءِ دست ءَ زور بیگواہ کنگ بیتگیں نومان اسھاک ءِ زوریں بیگواھی ءِ بگیری ءَ زھرشانی روانکے کشگ بیتگ۔ روانک ءَ جنین ءُ زھگاں ھوار مردماں بازیں کچے ءَ بھر زرتگءُ زوریں بیگواھیانی بگیری ءَ اوگام جتگ۔
زور بیگواھیں نومان ءِ برات ءَ تران کرتگ ءُ گوشتگ کہ نومان اسھاک پاکستانی لشکر ءَ 7 نومبر 2024 ءِ بیگاہ ءَ چہ ڈھور گوادر ءَ آوار جتگ ءُ بیگواہ کرتگ کہ انگت ءَ بیگواہ اِنت۔
آئی ءَگوشتگ کہ ما پہ برات ءِ آجوئی ءَ درسیں در ٹک اتگ اَنت ءُ ھمے جست گپتگ کہ منی برات ءِ میار چے اِنت۔ اگاں میار بار اِنت گڑا وتی آمیدگسءَ پیش کن اِت۔ پرچہ آمیدگس ءَ پیش کنگ بیگ ءَ نہ اِنت۔
آئیءَ گوشتگ کہ ما گوں ریاستءُ چیریں ادارھاں ھمے لوٹ ءَ کن ایں اگاں منی برات داں باندا یل کنگ نہ بوت ما زھرشانی ءَ دگاں بند کن ایں۔
زھرشانی ءَ کھول ءُ گوادر انتزامیہ ءِ میان ءَ گپ ءُ تران بے سوب بوتگ زور بیگواھیں نومان ءِ کھول جی ٹی ءِ دروازگءِ دپ ءَ زھرشانی ءَ نشتگ ءُ باندا سی پیک دگ ءَ رو اَنت ءُ زھرشانی کن اَنت۔
