ھاران: گوستگیں روچاں چہ ھاران بازار ءَ پاکستانی لشکر سی ٹی ڈی ءِ دست ءَ زور بیگواہ کنگ بوتگیں باپار امان اللہ مھمد ھسنی ءُ چہ کلی جنگل رھمت اللہ ءَ امین اللہ، ارشاد اھمد، دودا ءِ زوریں بیگواھی ءِ بگیری ءَ کھولانی نیمگ ءَ ھاران ریڈ زون ءَ مرچی سیمی روچ ءَ زھرشانی نندانک برجاہ بوتگ۔ بازار ءَ تھتگ بند ھرتال برجاہ بوتگ، زور بیگواھیں مردمانی کھولانی جاور ناگیگ اَنت ءُ جنینے تستگ ءُ نادراھجاہ ءَ برگ بوتگ۔
زھرشانی نندانک ءَ جنین ءُ زھگاں ھوار بی وائی سی ءِ کارکن ءُ ھندی میر ءُ مھتر، سیاسی ءُ چاگردی کارکن زمیندار، وکیل ءُ استاداں بازیں کچے ءَ بھر زرتگ۔
نندانک ءَ نشتگیں مردمانی گوشگ اِنت کہ گوستگیں سے روچ اِنت ھاران زیڈ زون ءَ زھرشانی نندانک برجاہ اِنت، نندانک ءَ کسان کسانیں زھگاں ھوار جنین نشتگ اَنت بلے پہ گپ ءُ تران ءَ سرکار ءُ زمہ وارانی نیمگ ءَ کس نہ یتکگ کہ آ گوں کھولاں ھمدردی بہ کنت۔
آئی ءَ گوشتگ کہ دمگی واکدار گچین کرتگیں جھگیر ءُ لشکر ءِ رویشت ھاران ءِ مردمانی دلانی تہ ءَ کینگداری ءَ گیش کنگ ءَ اَنت۔ اے پہ ریاست ءَ شریں پالے نہ اِنت۔
آیاں لوٹ کرتگ ءُ گوشتگ کہ مئے زور بیگواھیں مردم زوت یل کنگ بہ بنت اگاں نہ مئے زھرشانی گیش ترند کنگ بیت۔
