
کیچ: شانزہ دسمبر ءَ پاکستانی لشکر ءُ چیریں ادارھانی جوڑ کُرتگیں کشندہ ٹولی ءِ دمگی سروک ھوتمان ءَ زمان ء سپاھان، ابدُلھسین ء رھمت ءُ التاپ ء براھیم وتی کِر ءَ لوٹائینتگ ءُ پد ءَ داشتگ۔
بنشون ءِ رد ءَ ورنا سیٹلائٹ ٹاؤن تربت ءَ پہ کارے ءَ شُتگ اَنت کہ آیانی سر ھوتمان ءِ لوگ ءَ کپتگ کہ ھوتمان ءِ مردماں ورنایانی رندگیری کُرتگ ءُ دیم ءَ مانتَر اِتگ اَنت۔ چہ اے ورنایاں زمان ء سپیان ھوتمان ءِ چریکاں جاہ آورتگ ءُ آئی ءِ نام جُست کُرتگ۔ پد ءَ گْوشتگ اَنت کہ مئے رند ءَ بیا اِت۔ یکبرے آ گاڑی ءِ دُمب ءَ شُتگ اَنت ءُ پد ءَ چہ تُرس ءَ تتکگ اَنت۔
بنشون ءِ رد ءَ ھوتمان ءَ آیانی لوگ ءِ مردمے ءِ گون ءَ ھال کُرتگ ءُ ورنا وتی کِر ءَ لوٹائینتگ اَنت۔رند ءَ آدگہ مردم راہ داتگ کہ باندا بیا ورنایاں بَر ، اے دگہ روچ ءَ التاپ ء براھیم یل داتگ ءُ آدگہ زمان ء سپاھان ءُ ابدُلھسین ء رھمت انگت گار اَنت۔
کھول ءِ گْوشگ اِنت کہ اگاں مرچی مئے مردم یل کنگ نہ بوت اَنت گڑا ما پریس کانپرنس کن ایں۔
التاپ ء براھیم کہ چہ ھوتمان ءِ جوڑ کُرتگیں آزار جاہ ءَ دراتکگ، آئی ءِ گْوشگ اِنت کہ اود ءَ مارا ھوتمان ءِ چریکاں باز جتگ ءُ زور داتگ کہ ما بہ منّیں کہ ما ھوتمان ءِ لوگ ءِ چارگ ءَ اَتگین ءُ لوگ ویڈیو کُتگ بلے راستی اے نہ اِنت ما دگہ مردمے ءِ لوگ ءَ روگ ءَ بیتگیں کہ مئے سر ھوتمان ءِ لوگ ءِ دپ ءَ کپتگ۔ نوں ھوتمان ءَ آدگہ دوئیں ورنا داشتگ اَنت ءُ من ءِ یل داتگ۔
نوں زانگ بیگ ءَ نہ اِنت کہ ھوتمان ءَ اے مردم وتی کِر ءَ داشتگ اَنت، اگاں پاکستانی لشکر ءِ دست ءَ داتگ اَنت بلے بندات ءِ زمہ وار ھوتمان ءُ آئی ءِ چریک اَنت۔