![](https://zrumbesh.com/wp-content/uploads/2024/06/Dr-Naseem-Baloch-BNM-2-1024x596.jpg)
بلوچ راجی زْرمبشت( بی این ایم) ءِ سرکماش ڈاکٹرنسیم ءَ واجہ ھیربکش مری ءِ دھمی سالروچ ءِ درگت ءَ وتی درشانے ءَ گْوشتگ کہ واجہ ھیربکش مری بلوچستان ءِ آجوئی جُھد ءِ سروکانی تہ ءَ مستریں لیکھی سروک، زانشتی ءُ سیاسی رھدربر ءُ راھشون بیتگ۔ آئی ءِ سرجمیں زندگی جُھد، دیمونی ءُ مھکمی ءِ دروورے۔آئی ءِ سالروچ ءِ درگت ءَ آئی ءِ سیاسی سوھوی،پگری مھکمی ءُ دیستگیں واب ءِ مھکمی ءَ ستک شانی ندر کن ایں۔
آئی ءَ گْوشتگ کہ واجہ ھیربکش مری ءَ وتی سرجمیں زندگی یک پگر ءُ لیکھے ءِ بنیاد ءَ گْوازینتگ۔آئی ءِ زندگی پہ بلوچستان ءِ آجوئی ءُ وتواکی ءِ جُھد ءَ داتگ۔ آئی مدام جنجال ءُ جیڑھانی دیم پہ دیمی کُرتگ۔لیکھی پِڑ ءَ مزن مزنیں زمین ءَ تنگ اِتگ اَنت، جھان ھرچ وڑ ءَ بھر ءُ بانگ بیتگ ءُ سیاسی رنگ الگرد بیتگ بلے بلوچ راھشون ءِ مھمکی برجاہ بیتگ۔دمگ ءِ سیاسی چست ءُ ایر ءُ بلوچستان ءِ سیاسی جاورانی جھل ءُ بُرزی،نزیکیں ھمبلانی سند ءُ سید دلپدری بیتگ اَنت بلے آئی ءِ کوھیں بالاد ءِ مھکمی ءِ دیم ءَ ھچ نہ بیتگ اَنت ءُ واجہ ھیربکش ءَ زمہ واری نوکیں پدریچ ءَ دات ءُ جنگی پِڑ ءِ شھسوار ءِ وڑ ءَ چہ جھان ءَ رکست بوت۔
آئی ءَ گْوشتگ کہ بلوچستان ءِ آجوئی ءِ زْرمبشت واجہ ھیربکش مری ءِ کِرد ءِ برورد اِنت۔آ نہ تیوک ءَ سیاسی پِڑ ءَ بلکیں پگری بنیاد ءَ ھم پدر اِنت۔ آئی وتی جُھد ءِ میان ءَ بار رند ءَ بندیگجاہ ءُ درانڈیھ بیتگ ءُ وتی بَچ بالاچ مری ءِ شھیدی ءِ اندوہ اوپار کُرتگ۔ اے دُرسیں جنجالاں ابید آ ھچبر چہ وتی راھبنداں پد نہ کِنز اِتگ۔ آ نہ تیوک ءَ پہ بلوچ بلکیں پہ سرجمیں جھان ءِ ایردستیں راجاں یک درورے جوڑ بیتگ۔
ڈاکٹرنسیم ءَ گْوشتگ کہ واجہ ھیربکش مری ءِ مزنیں کِرد ءَ بلوچ ورنایانی سر ءَ وتی سان اِشتگ۔ آ پہ ورنایاں یک رژنائیں کشکے کہ آئی ءَ ورنایان ءَ پیشداشتگ کہ وتی پجار، زبان ءُ ربیدگ ءِ پھریزگ ءَ تیوک ءَ آجوئی سرڈگار ءُ آجوئی زْرمبشت ءَ اندیم اِنت۔ آئی ءِ زانشت ءُ رژنائیں پگر مرچی پہ بلوچ ورنایاں رژنائیں کشکے ءُ آئی ءِ جُھد داں کرناں مارا دلبڈی ءُ توان دنت۔
بی این ایم ءِ سرکماش ءَ گْوشتگ کہ سیاسی پِڑ ءَ واجہ ھیربکش مری ءِ کارشونیاں بلوچ راج ءَ یک دلبڈی ءُ گیشتگیں کِشکے شون داتگ۔ آئی ءَ مدام وتگڑیں گپ ءُ تران ءِ جاہ ءَ راھبندی راہ گچین کُرتگ ءُ پہ ایشی ءَ ھرچ وڑیں دیمونی داتگ۔ اے آئی ءِ مھکمی ءُ توانمندی بیتگ کہ چہ آدگراں گھتر پیشدار ایت۔ آئی ءِ راجداری سوھوی ءَ بلوچستان ءِ آجوئی زْرمبشت یک نوکیں توانے داتگ ءُ مرچی ھم آئی ءِ پگر پہ ما رژنائیں کشکے۔
ڈاکٹرنسیم ءَ گْوشتگ کہ مرچی آئی ءِ سالروچ ءِ درگت ءَ ما آئی ءِ لوٹ ءُ واھگانی دیم ءَ برگ ءِ کول ءَ کن ایں۔ واجہ ھیربکش مری ءِ زندگی ءِ ھرچ دمان مارا ھمے درونت ءَ دنت کہ راھبندانی پابند بیگ ءِ بنیاد ءَ ما وتی سیتانی گِرگ ءَ سوبین بہ ایں۔مارا آئی ءِ دیمونی گیرآرگ ءُ بلوچستان ءِ آجوئی ءِ جُھد برجاہ دارگی اِنت ءُ پہ ایشی ءَ مارا ھرچ پیمیں دیمونی دیگ ءَ جاڑی بیگی اِنت۔ مرچی مارا آئی ءِ سالروچ یات پِرین ایت کہ وتی اُگبال ءُ لوٹانی جُھد ھچبر بلاش نہ بنت۔ آئی ءِ زندگی مارا ھمے درونت ءَ دنت کہ راھبندانی پابند ءُ جنجالانی دیمپانی کنگ سوبمندی ءِ مانزمان اِنت۔ مارا ھمائی ءِ کشک رستگیں راہ ءِ سر ءَ روگ ءُ پہ بلوچستان ءِ آجوئی ءَ چہ ایشی ءَ گیش جُھد کنگ ءُ گیش گوں توانمندی ءَ کار کنگی اِنت کہ مرچی ما کنگ ءَ ایں۔