آواران: پنچ روچ پیش پاکستانی لشکر ءِ دست ءَ زور بیگواہ کنگ بوتگیں ورنا ھاسل ء مھمد ھسن، ولی جان ءُ سجاد ءِ کھول ءِ نیمگ ءَ زھرشانی روانکے کشگ بوتگ۔ زھرشانی ءَ جنین ءُ زھگاں بازیں کچے ءَ بھر زرتگ۔
زور بیگواھیں مردمانی کھول ءِ گوشگ اِنت کہ مئے مردم بے میارءَ آوار جنگ ءُ بیگوہ کنگ بوتگ اَنت، ما زوریں بیگواھی ءِ بگیری ءَ زھرشانی روانکے کش اتگ مارا ھندی میر ءُ مستراں زھرشانی کنگ ءَ نہ اشتگ۔ مئے ھند ءَ دامگ ءُ دگہ ھچ آسراتی نیست پمیشکا مردم مئے سر ءَ بیوکیں زوراکیاں سرپد نہ بنت۔دوازدہ سال اِنت کہ مشکے تنک ءَ مئے سر ءَ پاکستانی لشکر ءِ زوراکی یکشل ءَ برجاہ اَنت۔
آیانی گوشگ اِنت کہ ولی جان ء نزیر ءُ سجاد ء آزم ساری ءَ بیگواہ کنگ بوتگ اَنت، ھاسل ءَ رند ءَ پاکستانی لشکر ءَ وتی بنجل ءَ لوٹائینتگ ءُ بیگواہ کرتگ۔ ما پہ وتی زور بیگواھیں مردماں جست کنگ ءَ ایں مارا ھچ وڑیں سرپدی دیگ بوگ ءَ نہ اِنت۔
آیان گوشتگ کہ مئے ھند مشکے تنک ءَ سک دیر اِنت پاکستانی لشکر ءِ زوراکی یکشل ءَ برجاہ اِنت۔ پاکستانی لشکر مئے مردماں کار ءُ روزگار ءَ نیل ایت ھمک وھد ءَ دگ ءِ پھنات ءَ درچک ءُ دارانی گڈگ ءَ پرمایگ ءَ اِنت، نوں کجام وھد ءَ آئی کہ آئی کاروان درکپ ایت مئے مردماں پہ وتی پھازداری ءَ برگ ءَ اِنت۔
آیاں گوں بلوچ یکجھتی کمیٹی ءِ سروک ڈاکٹر ماہ رنگ ءُ بیگواھیں بلوچانی توار ( وی بی ایم پی ) ءِ کارگشادسمی دین ءَ ھوار گوں مردمی ھکانی ادارہ ءُ باسکاں توار چست کنگ ءِ لوٹ کرتگ ءُ گوشتگ کہ پاکستانی لشکر ءِ زوراکیانی بگیری ءُ پہ مئے زور بیگواھیں آزیزانی آجوئی ءَ توار چست بہ کن اِت۔
