بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ وتی درشانے ءَ گوشتگ کہ بی ایل ایپ ءِ سرمچاراں 3 مئی 2026 ءَ ھاران شھر ءَ گزی دگ ءَ برجاھیں پاکستانی پوج ءِ چوکی ءِ سر ءَ گوں راکٹ لانچر ءُ گرنیڈ لانچراں ارش کرتگ۔ ارش ءِ میان ءَ آس داتگیں گولا چوکی ءِ تہ ءَ کپتگ اَنت، ایشی آسر ءَ زورگریں پوج ءَ جانی ءُ مالی تاوان بوتگ۔
آئی ءَ گوشتگ کہ ارش ءَ پد پوج ءَ کر ءُ کشانی آبادی ءِ سر ءَ تیرگواری کرتگ ءُ چہ کواڈکاپٹر ءَ سرمچارانی رندگیری کنگ ءِ کوشست کرتگ، چیرجنگی شوربندیاں بلدیں سرمچار وتی مھکمیں ڈواراں سر بوتگ اَنت۔
جارکش ءَ گوشتگ کہ 2 مئی 2026 ءَ واشک ءِ ھند ناگ، گراڑی ءَ یک چیریں ھالے ءِ بنیاد ءَ کاروائی کرتگ ءُ زورگریں پاکستانی پوج ءِ کمکاریں کشندہ ٹولی ءِ دو کارمند امان اللہ ء جما جاہ منند واشک، گریشگ ءُ سجاد ء گلام کادر جاہ منند پتک شیراز ارش ءَ کشتگ اَنت۔
آئی ءَ گوشتگ کہ گل ءِ چیریں بھرگ ءَ ھال داتگ کہ زورگریں پاکستانی پوج ءِ چیر دستی ءَ کارکنوکیں کارمنداں دگ بستگ ءُ چہ گاڑیاں زور زر گرگ ءَ اَنت۔ ھمے ھال ءِ بنیاد ءَ سرمچار ھما جاہ ءَ شتگ اَنت ءُ کارمند نشانگ کرتگ اَنت۔ کشگ بوتگیں کارمندانی دو سی تیری ءُ یک موٹر سائیکلے دستیگ کرتگ۔
جارکش ءَ گوشتگ کہ بی ایل ایپ ءِ سرمچاراں دگہ یک کاروائی یے ءَ 29 اپریل2026 ءَ آواران ءِ ھند تیرتیج ءَ مزنیں بنجل ءِ سر ءَ ارش کرتگ۔ بندات ءَ اسنائپر ارش ءَ یک کارمندے جاھی مرتگ۔ارش ءَ پد سرمچاراں گوں ایل ایم جی ءُ آدگہ سلاھاں بنجل ءِ سر ءَ ارش کرتگ۔ ارش ءِ آسر ءَ زورگریں پوج ءَ گیشتر جانی ءُ مالی تاوان بوتگ۔
آئی ءَ گوشتگ کہ ھمے درچ ءَ سرمچاراں تیرتیج کوٹوری ءَ زورگریں پوج ءِ یک کاروان ءُ دگ کارکنوکیں کمپنی ءِ پھازدارانی سر ءَ سنگر گپتگ ءُ ارش کرتگ۔ ارش ءِ آسر ءَ یک کارمندے مرتگ ءُ باز ٹپی بوتگ۔
جارکش ءَ گوشتگ کہ سرمچاراں 28 اپریل 2026 ءَ آواران ءِ ھند کولواہ، گیشکور، زیک ءَ پوج ءِ چوکی ءِ سر ءَ ارش کرتگ۔ ارش ءِ بندات چہ اسنائپر ءَ کرتگ، چہ ایشی پد سنگر گپتگیں سرمچاراں چوکی ءِ سر ءَ گوں مزنیں سلاھاں ارش کرتگ۔ارش ءِ آسر ءَ پاکستانی پوج ءَ گیشتر جانی ءُ مالی تاوان بوتگ۔
آئی ءَ گوشتگ کہ بی ایل ایپ ءِ سرمچاراں 27 اپریل 2026 ءَ مستونگ کیڈٹ کالج چوکی ءِ کارمندانی سر ءَ گوں وتکاریں سلاھاں ارش کرتگ۔ اے کاروائی ءَ زورگریں پوج ءِ دو کارمند جاھی مرتگ، چہ ایشی ءَ پد سرمچاراں شھدگ بستگ ءُ دژمن ءِ تر ءُ گرد داشتگ اَنت۔
جارکش ءَ گوشتگ کہ دگہ یک کاروائی یے ءَ 27 اپریل 2026 ءَ سرمچاراں مستونگ ءِ ھند کڈ کوچگ ءَ مکہ ھوٹل ءَ شھدگ بستگ۔ ھمے میان ءَ شھدگ ءِ پھازداریں چوکی ءِ سر ءَ گوں مزنیں سلاھاں ارش کرتگ، ایشی آسر ءَ چوکی ءَ ساڑی ئیں چار کارمند مرتگ ءُ باز ٹپی بوتگ۔27 اپریل 2026 ءَ کیچ ءِ ھند دشت ءَ تلار ءُ بیری ءِ میان ءَ سرمچاراں پاکستانی پوج ءِ یک چوکی یے ءِ سر ءَ ارش کرتگ۔ چوکیءِ سر ءَ گرنیڈ لانچر ءِ باز گولا آس داتگ کہ آ نشانگ ءَ کپتگ اَنت۔ ھمے میان ءَ چوکی ءِ جتگیں چاریگی کیمرہ نشانگ کرتگ ءُ سرجم ءَ تباہ کرتگ اَنت۔
آئی ءَ گوشتگ کہ دگہ یک کاروائی یے ءَ سرمچاراں 24 پروری 2026 ءَ تمپ ءِ ھند کونشکلات ءَ زورگریں ریاست ءِ کمکار راجی میاربار ھدابکش پنام واجو ء اسمائیل جاہ منند کونشکلات دزگیر کرتگ۔ آ پہ زورگریں پوج ءُ چیریں ادارھانی چاریگی ءَ بلوچ ورنایانی زوریں بیگواھی ءُ نشانگ کنگ ءُ کشگ ءَ تچک ءَ ھوار بوتگ۔ جست ءُ پرس ءِ میان ءَ آئی وتی درسیں میارباری من اتگ اَنت۔ چہ من اتگیں میار ءُ منانکانی بنیاد ءَ گل ءَ مرگ ءِ سزا داتگ 6 مارچ ءَ کشگ بوتگ۔
جارکش ءَ گوشتگ کہ دگہ یک کاروائی یے ءَ سرمچاراں 14 مارچ 2026 ءَ تمپ ءِ میتگ کونشکلات ءَ دگہ یک میارباری یے آدل ء رھمدل جاہ منند کونشکلات دزگیر کرتگ۔ جستءُ پرس ءِ میانءَ آئی پہ ریاست ءَ سرمچار ءُ آجوئی لوٹوکانی بگیری ءَ کار من اتگ اَنت۔ گل ءِ کانودانی رد ءَ میارباری سرزد بوگءَ 27 مارچ ءَ تیرگواری کرتگ ءُ گڈی آسر ءَ سر کرتگ۔
میجر گھرام بلوچ ءَ درشانءِ گڈی ءَ درسیں کاروائیانی زمہ واری من اتگ۔
بنشون: درشان اکس: زرمبش
