شال: وائس پار بلوچ مسنگ پرسنز ءِ زھرشانی گدان ءَ 6138 روچ سرجم بوتگ کہ شال پریس کلب ءِ دیم ءَ برجاہ بوتگ۔
شمبے ءِ روچ ءَ نزر مری ءِ کھول ءَ گوں وی بی ایم پی ءَ رھوت کرتگ ءُ گوشتگ نزر مری پاکستانی پوج ءَ پاری 27 اگست ءَ چہ شال ءَ آوار جتگ ءُ بیگواہ کرتگ۔
آئی کھول ءِ گوشگ انت کہ نزر مری ءِ بیگواھی ءَ ھشت ماہ سرجم بوتگ بلے انگت آ نہ کہ آمیدگس ءَ پیش کنگ بوتگ ءُ نہ کہ آئی بابت ءَ کھول ءَ سرپدی دیگ بوتگ۔ چہ ایشی ءَ مئے سرجمیں کھول جنجالانی دیمپان انت۔
وی بی ایم پی ءِ چیرمین نسراللہ بلوچ ءَ نزر مری ءِ کھول دلجمی داتگ کہ گل نزر مری ءِ کیس ءَ کانود ءُ راھبند ءِ رد ءَ سرکار ءُ انساپ دیوکیں ادارھاں سر کنت ءُ پہ آئی آجوئی ءَ ھمک بھرگ ءَ توار چست کنت۔
آئی گوں سرکار ءُ ادارھاں لوٹ کرتگ کہ نزر مری ءِ آجوئی ءَ زوت دلجمی دیگ بہ بیت۔ اگاں آئی سر ءَ چونیں ھم بھتامے ھست آمیدگس ءَ کنگ بہ بیت ءُ آئی کھول چہ اے جنجالاں رکینگ بہ بیت۔
بنشون: درشان اکس: وی بی ایم پی
