بلوچ وومن پورم ءِ بنجاھی جارکش ءَ ھسینہ بلوچ ءِ زوریں بیگواھی ءِ سر ءَ بژن درشان کرتگ ءُ گوشتگ کہ ھسینہ بلوچ آواران ءِ جاہ منند اِنت کہ اے وھد ءَ کراچی ءَ نشتگ۔ آئی زوریں بیگواھی زالبولانی نشانگ کنگ ءِ یک ترسناکیں تباھی یے پیش دار ایت۔
آئی ءَ گوشتگ کہ 16 اپریل 2026 ءَ ھسینہ بلوچ پاکستانی پوج ءَ زور بیگواہ کرتگ۔ چہ ایشی ءَ پد آئی بابت ءَ کھول ءَ ھچ سرپدی دیگ ءَ نہ اَنت۔ اے وڑیں کاروائی کانودی لوٹ ءُ انسانی ھکانی گنتریں لگتمالی اِنت۔
جارکش ءَ گوشتگ کہ بلوچ زالبولانی زوریں بیگواھی ءِ ویل ریاستی زوراکیانی پالیسیاں پیش دار ایت۔ اے گامگیج نہ تھنا انسانی ھکانی بگیری اِنت بلکیں کھولاں یکشلیں آزار، بے ستکیں جاور ءُ سسائی جنجالانی دیمپان کنت، انساپ ءُ جست گرگ ءِ نزام ءِ ھچ بستار پشت نہ کپ ایت۔
بلوچ وومن پورم ءَ ھسینہ بلوچ ءِ دیم ءَ آرگ ءُ یل کنگ ءِ لوٹ کرتگ ءُ گوشتگ کہ ما سرکار ءَ زور دے ایں کہ پہ کانود ءِ پھازداری ءَ دلجمی دیگ بہ بیت ءُ زالبولاں ھوار چونیں ھم مردمے چہ کانود ءَ ڈن نشانگ کنگ مہ بیت۔
آئی ءَ گوں میان استمانی انسانی ھکانی گلاں لوٹ کرتگ کہ زالبولانی زوریں بیگواھی ءِ جیڑہ ءِ سر ءَ دلگوش دیگ بہ بیت ءُ زوت گامگیج زورگ بہ بیت۔
بنشون: درشان اکس: مونوگرام