بلوچ نیشنل موومنٹ ءِ چیئرمین ڈاکٹر نسیم بلوچ ءَ گوشتگ کہ بارکان ءَ یکیں کھول ءِ دوازدہ کودک ءُ بے میاریں مردمانی کوش پاکستانی پوج ءِ نیمگ ءَ بلوچستان ءِ مھلوک ءِ سر ءَ بیوکیں بے مھاریں زوراکیانی درچ اِنت۔ اے دگہ اناگتیں ویلے نہ اِنت بلکیں اے بلوچ راج ءِ سر ءَ ھمے زوراکی ءِ بھر اِنت کہ ما گوستگیں ھپتاد ءُ ھشت سال اِنت اوپار کنگ ءَ ایں۔ اے تچکیں ریاستی ناشرکاری یے کہ کودکیں مردم نشانگ کنگ ءُ کشگ بوتگ اَنت۔
آئی ءَ گوشتگ کہ یک پھوالیں مری کھولے ، لڈ ءُ بارے ءِ میان ءَ نھر کوٹ دگ ءَ سپر ءَ بوتگ کہ پاکستانی پوج ءَ تچک ءَ تیرگواری کرتگ ءُ نشانگ کرتگ اَنت۔ کشگ بوتگیں مردمانی تہ ءَ زالبول، زھگ ءُ پیریں ھوار اَنت۔ اے ھما مردم بوتگ اَنت کہ آیاں سلاہ گوں نہ بوتگ، اے لاچار ءُ تنگ دستیں پھوال اَنت، آیانی میار بس آیانی پجار بوتگ۔
ڈاکٹر نسیم بلوچ ءَ گوشتگ کہ یکیں کھول ءِ دوازدہ مردمانی کوش دلپدرد کنت۔ مات، پت، بچک ءُ جنک ءِ کوش یکیں ارش ءَ سے نسل ءِ نشانگ کنگ، بلوچ چکچینی ءِ یک انچیں ویلے پہ باندات ءَ بلوچ ءِ یاداشت ءِ بھرے بوت ءُ پہ دژمن ءَ کھرے جوڑ بیت۔
آئی ءَ گوشتگ کہ چل سالی الی ء سلتان امیر، الی لوگبانک سی سالی بیبل، دو سالی میرجان ء الی، ھپتاد سالی بالاچ ء سبزو، بالاچ ءِ لوگبانک سی ءُ پنچ سالی سومری ء بھنگان، سیزدہ سالی سادو ء بالاچ، شش سالی اللہ بکش ء بالاچ، ھشت سالی ھاپو ء بالاچ، ھژدہ سالی رھمان ء بالاچ، رھمان ء لوگبانک ھبدہ سالی نائکو ء جمالان، بیست ءُ دو سالی شاری ءِ کوش یک جنگی میارباری یے۔ اے بلوچ راجی آجوئی سپر ءِ دلپدردیں داستانے، بلوچ وتی ھونانی ھساب ءَ گیت۔
بنشون: درشان اکس: بی این ایم
