بلوچ وومن پورم ءَ وتی درشانے ءَ گوشتگ کہ بلوچستان ءِ دمگ، بارکان ءِ ھند لھمہ زرین، ناھڑ کوٹ دگ ءَ بوتگیں ویل ءَ تیرگواری ءِ آسر ءَ یکیں کھول ءِ دہ مردم شھید ءُ سے سکا ٹپی بوتگ۔
آئیءَ گوشتگ کہ مری ٹک ءِ یک پھوالیں کھولے یک مزدا گاڑی یے ءِ سر ءَ لڈ ءُ بارے ءِ میان ءَ گوزگ ءَ بوتگ۔ ھمے میانءَ پاکستانی پوج ءَتیرگواری کرتگ کہ گاڑی یے ءَ بن کرتگ، چہ ایشی ءَ جان زوال بوتگ اَنت۔ گاڑی یے ءَ سواریں چار مردم زند ءَ ستکگ ءُ پر بوتگ۔ آیانی تہ ءَ پیریں، زالبول ءُ کودکیں زھگ ھوار اَنت، اے سکا دردیگ اِنت۔
آئی ءَ گوشتگ کہ بارکان ءِ یک سکا مزن ءُ بژنیگں ویلے کہ انسانی جانانی پھریزگ ءِ بابت ءَ بازیں جست ودی کنت۔ اے وڑیں جاوراں ھر پیم ءَ دلجمی دیگ ھژدری اِنت ءُ اے ویل ءِ گوں دلجمیں وڑے ءَ پٹ ءُ پول کنگ وھد ءِ لوٹ اِنت دانکہ راستی دیم ءَ بیت۔
آئی ءَ گوشتگ کہ اے ویل پہ پارلیمنٹ ءِ باسک، سیاستدان ءُ آدگہ بھرگانی زمہ واراں یک جیڑگی گپے اِنت۔ اے دلپدردیں ویل ءَ بے تواری ھمے میارباری ءَ شریدار کنت۔
آئی ءَ گوشتگ کہ چہ میان استمانی انسانی ھکانی ادارھاں ھمے اوست ءَ دار ایں کہ آ اے ویل ءِ بابت ءَ دلگوش ءَ گور کن اَنت ءُ پہ انسانی جانانی پھریزگ ءَ گامگیج زور اَنت۔
آئی ءَ گوشتگ کہ بلوچ وومن پورم اے ویل ءَ شھید بوتگیں کھولانی گون ءَ ھمدردی درشان کنت ءُ گوں ایشی ھوار ھمے کول ءَ کنت بلوچ چکچینی ءُ ناھکیانی بگیری ءَ کدی بے توار نہ بہ این ءُ ھمک جاہ ءَ توار چست کن ایں۔
بنشون: درشان اکس: مونوگرام
