وائس پار بلوچ مسنگ پرسن ( وی بی ایم پی ) ءِ زھرشانی گدان ءَ شال پریس کلب ءِ دیم ءَ 6093 روچ سرجم بوتگ انگت ءَ برجاہ انت۔ گدان ءَ گل ءِ ایگزیکٹو کمیٹی ءِ باسک نیاز مھمد ساڑی بوتگ۔
مرچی گدان ءَ امیر جمائت اسلامی ءُ ایم پی اے مولانا ھدایت الرھمان اتکگ ءُ گوں زور بیگواھیں مردمانی کھولاں ھمدردی درشان کرتگ۔
مولانا ھدایت الرھمان ءَ گوشتگ کہ بلوچستان ءَ زوریں بیگواھی ءُ زوربیگواھیں بلوچانی درکانودی کوش تیز کنگ بوتگ کہ ڈیھ ءِ کانود ءُ انسانی ھکانی بگیری اِنت ما ایشی ایر جن ایں۔
آئی گوں سرکار ءَ لوٹ کرتگ کہ زور بیگواھیں بلوچانی درکانودی کوش ءُ زوریں بیگواھی ھلاس کنگ بہ بیت، پہ درستیں بیگواھیں مردمانی آجوئی ءَ دلجمی دیگ بہ بیت، کسے ءِ سر ءَ بھتام ھست گڑا آمیدگس ءَ آرگ بہ بیت ءُ ہہ زوریں بیگواھی ءِ وڑیں انسانی جیڑھے ءِ ھلاسی ءَ ڈیھ ءِ کانود ءِ رد ءَ زوت دلجمیں گامگیج زورگ بہ بیت۔
وی بی ایم پی ءِ ایگزیکٹو کمیٹی ءِ باسک نیاز مھمد ءَ گوشتگ کہ گل زوریں بیگواھیانی ھلاسی ءُ زوربیگواھیں مردمانی آجوئی ءَ مئے پرایمنیں ءُ راھبند ءِ رد ءَ جھد برجاہ بیت۔
بنشون: درشان اکس: وی بی ایم پی
