بلوچ یکجھتی کمیٹی ءَ بژن درشان کرتگ ءُ گوشتگ کہ گل ءِ بنجاھی سروک ڈاکٹر ماہ رنگ بلوچ ءُ آدگہ سروکانی دروگ ءُ وتگڑیں بھتام ءَ بندیگ کنگ ءَ سالے سرجم بوگ ءَ اِنت۔ چونیں ھم پکائیں منانک ءِ نہ بوگ ءَ ابید آ یکشل ءَ زندان ءَ بندیگ کنگ بوگ ءَ اَنت۔
آئی گوشتگ کہ گوستگیں شش ماہ بیت بندیگجاہ ءَ ڈاکٹر ماہ رنگ سکا نادراہ اِنت۔ پہ آئی الاج ءِ باز رند ءَ زندان ءِ مستر ءَ نمدی نبشتہ کرتگ ءُ پہ آئی الاج ءِ لوٹ کرتگ۔ بلے آئی لوٹ یکشل ءَ مان نیارتگ اَنت رند ءَ کانودی ٹولی یے ءِ نیمگ ءَ آمیدگس ءَ لوٹ کنگ ءَ پد بندیگجاہ ءَ ڈاکٹر ءَ آ چار اتگ ءُ ٹیسٹ ءِ گوشتگ۔ بلے چہ ایشی ءَ ابید ھم آ نادراھجاہ ءَ برگ نہ بوتگ۔
آئی گوشتگ کہ ھژدہ پروری ءَ آئی جاور سکا ناگیگ بوتگ اَنت چہ ایشی ءَ پد زندان ءِ امتزامیہ ءَ آ شیک زید نادراھجاہ ءَ برگ بوتگ۔
بلوچ یکجھتی کمیٹی ءَ گوشتگ کہ ما اے جار ءَ جن ایں کہ انسانی ھک ءُ انساپ ءِ توار چست کنگ چونیں ھم میارباری یے نہ اِنت۔ ڈاکٹر ماہ رنگ ءَ چہ الاج ءَ دارگ ءُ آئی آجوئی ءِ پلگ راھبند، کانود ءُ انسانی ھکانی مزنیں بگیری یے۔
آئی گوشتگ کہ ما لوٹ کن ایں کہ ڈاکٹر ماہ رنگ بلوچ زوت الاج کنگ بہ بیت ءُ آ زوت پہ مانزمانی یل کنگ بہ بیت۔ بی وائی سی ءِ درسیں درکانودی دزگیر کرتگیں سروک زوت یل کنگ بہ بنت۔
بنشون: درشان. اکس: دامگ
