ھب چوکی ءَ پاکستانی پوج ءَ بیڑ برتگ ءُ کیچ ءِ جاہ منندیں ورنایے سھراب بلوچ آوار جتگ ءُ بیگواہ کرتگ۔
زرمبش جھگیر ءِ رد ءَ زور بیگواھیں سھراب بلوچ ء امین یاکوب کیچ ءِ ھند تمپ، دازن ءِ جاہ منند اِنت۔ ھشت پروری ءَ پاکستانی پوج ءَ چہ بلوچ کالونی ھب چوکی ءَ آوار جتگ ءُ بیگواہ کرتگ۔
پاکستانی پوج ءِ سیزدہ ءُ چاردہ گاڑیانی کاروانے بوتگ کہ گوں آیاں سی ٹی ڈی ءُ چیریں ادارہ ءُ آدگہ ادارھانی کارمند ھم گوں بوتگ اَنت۔
سھراب بلوچ ءِ بابت ءَ گوشگ بوگ ءَ اِنت کہ چہ ایشی ءَ پیش ھم 2017 ءُ 2018 ءَ بیگواہ کنگ ءُ پد ءَ یل کنگ بوتگ، اے آئی سیمی رند اِنت کہ بیگواہ کنگ بوتگ۔
چوش کہ ایشی پیش پرندوشی چہ ھب چوکی دارو ھوٹل ءَ جاؤ ءِ جاہ منندیں ورنایے نادل بلوچ آوار جنگ بوتگ ءُ چہ ایشی ءَ پیش ھب چوکی ءَ بلوچ نیشنل موومنٹ ءِ چیئرمین ڈاکٹر نسیم بلوچ ءِ پت مھمد بکش ساجدی، ناکو نئیم ساجدی ءُ رپیک بلوچ آوار جنگ ءُ بیگواہ کنگ بوتگ اَنت۔
بنشون: زرمبش جھگیر. اکس: اھوالکار
