بلوچ نیشنل موومنٹ ( بی این ایم ) ءِ پیشیگیں چیئرمین ھلیل بلوچ ءَ وتی شنگ کرتگیں درشانے ءَ گوشتگ کہ بلوچستان ءِ گوستانک ءَ گھگیری ءُ دیمونیانی یک دراجکشیں کسھے۔ مرچیگیں جھدکار چہ گوست ءَ باز دیم ءَ گوں سوھو، راھبند ءُ بے ترس ءَ زورگر ءِ بگیری ءُ پہ راجی پدریچ ءَ جھد کنگ ءَ اَنت۔ بلوچ پسگاں ھمے پیش داشتگ کہ راجی آجوئی تھنا مئے ھک نہ اِنت بلکیں پیسلہ اِنت ءُ اے پیسلہ ءِ پژدر ءَ بلوچ ءِ دیمونی، ھون ءُ مھکم ارادھی اِنت۔
آئی ءَ گوشتگ کہ بی این ایم ءُ آئی ھمپگریں ھمراھاں گوں تچکیں لبزاں جھان ءَ را گوشتگ کہ بلوچستان نہ بے کسیں سرڈگارے ءُ نہ توانمندانی ھوس ءِ جاہ اِنت۔ لٹ ءُ پلی شوربندی بہ بنت یا زورگر ءِ باپاری بلوچ ورنا سینگ ءَ مک کن اَنت ءُ آیانی دیم ءَ اوشت اَنت۔ مئے سرڈگار ءِ یک یک بڈگے ھمنچو ارزیشت دار ایت کہ مئے ھون اَنت، ایشی زورگپتی ءِ ھمک شوربندی ءَ چہ وتی زور ءَ دارگ بیت۔ بلوچستان ءِ سر ءَ چم داروکیں ھمک ریاست ءُ کمپنی ءَ اے چیز زانگ لوٹ ایت کہ بلوچستان ءَ چونیں ھم زورگری شوربندی یے بلوچستان ءِ دستیگ کنگ زانگ بیت ءُ بلوچ راج چونیں ھم ریاست یا میان استمانی شریدارے ءَ اے موکل ءَ نہ دنت کہ آ یک نوک آبادکاریں زوراکے ءِ گون ءَ ھواری ءَ بلوچ سرڈگار ءُ مڈیاں دستیگ بہ کنت۔
ھلیل بلوچ ءَ گوشتگ کہ ما سدکیں زوت بہ بیت یا دیر جھان ءِ نکش ءَ بلوچ سرڈگار ءِ آجوئی ءِ بیرک مک بیت ءُ میان استمانی توانمنداں اے راستی منگ لوٹ ایت کہ پاکستان ءِ زورگپتی ءِ مھکم کنگ چہ درساں مستریں پلہ مرزی اِنت۔ بلوچستان ءِ راجی تالہ ءِ پیسلہ نوں اسلام آباد ءِ ایواناں نہ بلکیں گھگیری ءِ سنگرانی تہ ءَ نبیسگ بیت۔
آئی ءَ گوشتگ کہ بلوچ راجی جھد ءِ ھمک گام، ھمک ارش، ھمک دیمونی مارا چہ منزل ءَ نزیک کنگ ءَ اِنت۔ من وتی ھما بلوچ پسگاں ستک شانی ندر کن آں کہ آیاں پہ بلوچ سرڈگار ءِ پھریزگ ءَ تھنا کول نہ بلکیں چہ وتی کرد ءُ دیمونیاں ھمے پیش داشتگ ءُ زورگر ءِ بنجلاں پشت ماں پشت ءَ تباہ کنگ ءَ اَنت۔
