پاکستانی پوج ءَ چہ گْوادر ءِ جتائیں ھنداں دو مردم آوار جتگ ءُ بیگواہ کرتگ۔
بنشون ءِ رد ءَ زی پاکستانی پوج ءَ گْوادر ءِ ھند جیونی، پانوان ءَ یک گسے ءَ بیڑ برتگ ءُ گس ءِ سامان پروشتگ اَنت گوں مردماں زوراکی کرتگ ءُ سید مھمد ء شاھو آوار جتگ ءُ بیگواہ کرتگ۔
ھندی مردمانی گوشگ اِنت کہ سید مھمد چہ ایشی ءَ پیش ھم زوربیگواہ کنگ ءُ رند ءَ یل کنگ بوتگ۔ زی یکبرے پد ءَ پاکستانی پوج ءَ آوارجتگ ءُ بیگواہ کرتگ۔
آیانی گوشگ اِنت کہ ھمے کھول ءِ کم چہ کم پنچ مردم سید مھمد کلمتی، نوربکش کلمتی، جلیل کلمتی، الی نواز کلمتی ءُ پاروک کلمتی جتائیں وھداں آوار جنگ ءُ بیگواہ کنگ بوتگ اَنت۔
دومی نیمگ ءَ چہ گْوادر ءَ پاکستانی پوج ءَ ڈیرہ مراد جمالی ءِ جھمنندیں ورنایے اشرپ سولنگی ء اجب ھان سولنگی آوار جتگ ءُ بیگواہ کرتگ۔
آئی کھول ءِ گوشگ اِنت کہ اشرپ سولنگی گْوادر ءَ پٹرول ءِ باپاری کرتگ ءُ گوستگیں چار روچ انت کہ بیگواہ اِنت۔
آئی کھول ءَ گوں سرکار ءُ سرکاری ادارھاں لوٹ کرتگ کہ آ اشرپ ءَ ھوار درسیں زوربیگواھیں مردم آجو کنگ بہ بنت۔
