بلوچ لبریشن آرمی ( بی ایل اے ) ءِ جارکش جیھند بلوچ ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں شال، ھاران ءُ سامی ءَ سے جتائیں ارشانی میان ءَ زورگریں پوج ءُ آئی چاریگی کیمرہ نشانگ کرتگ اَنت۔
آئی ءَ گوشتگ کہ بی ایل اے ءِ سرمچاراں مرچی شال ءِ شھر ءَ بروری دگ ءَ زورگریں پاکستانی پوج ءِ کارمند ھما وھد ءَ گوں گرنیڈلانچراں نشانگ کرتگ اَنت کہ آ وتی چوکی ءِ نزیک ءَ دگ بندی ءَ بیتگ اَنت۔ تراکانی آسر ءَ زورگریں پوج ءِ پنچ کارمند ٹپی بیتگ۔
جارکش ءَ گوشتگ کہ بی ایل اے ءِ سرمچاراں ھاران ءِ ھند برشونکی ءَ زورگریں پوج ءِ یک ٹرک گاڑی یے گوں چیرکرتگیں شورھاں نشانگ کرتگ۔ تراک ءِ آسر ءَ دو کارمند مرتگ ءُ چار ٹپی بیتگ۔
آئی ءَ گوشتگ کہ سرمچارانی ارش ءَ پد پروش وارتگیں زورگریں پوج ءَ لس آبادیانی سر ءَ گوں مزنیں سلاھاں تیرگواری کرتگ ءُ گس نشانگ کرتگ اَنت۔
جارکش ءَ گوشتگ کہ بی ایل اے ءِ سرمچاراں30 اکتوبر ءَ گیشکور، سامی ءَ زورگریں پاکستانی پوج ءِ نیمگ ءَ جتگیں چاریگی کیمرہ ءُ راھوتی ٹاور نشانگ کرتگ ءُ تباہ کرتگ۔
جیھند بلوچ ءَ درشان ءِ گڈی ءَ درسیں ارشانی زمہ واری من اتگ۔
