بلوچ یکجھتی کمیٹی(بی وائی سی) ءَ وتی شنگ کرتگیں درشانے ءَ گوشتگ کہ بلوچستان ءِ جتائیں ھنداں جھمنندیں بلوچ سیاسی ءُ انسانی ھکانی کارکناں پاکستان ءِ ناشرکاری ءِ گر ءُ داری ایکٹ ءِ رد ءَ پورتھ شیڈول ءَ ھوار کنگ بلوچ مھلوک ءِ جھد ءَ زور ءِ گون ءَ ھلاس کنگ ءِ جھداِنت۔
آئی گوشتگ کہ اے گامگیج نہ تھنا درکانودی اِنت بلکیں یک ترسناکیں گامگیجے ۔ چہ ایشی آسر ءَ پُرایمنیں سیاسی کاراں دارگ ءُ ھک ءِ توار ءَ بے توار کنگ ءُ انسانی ھک، انساپ ءُ پہ سیاسی آجوئی ءَ توار چست کنوکاں میاربار پیش دارگ ءِ جھد کنگ بوگ ءَ اِنت۔
آئی گوشتگ کہ بی وائی سی ءِ کارکناں ھوار بازیں بلوچ سیاسی ءُ انسانی ھکانی کارکنانی نام ابید چہ کاروائی ءُ کانودی منانک ءَ پورتھ شیڈول ءَ ھوار کنگ بوتگ اَنت ءُ اے لڑا یکشل ءَ سیاسی کارکنانی نام ھوار کنگ بوگ ءَ اَنت۔ گوستگیں روچ ءَ تھنا بلوچستان ءِ ھند ھب ءَ 64 مردمانی نام اے لڑ ءَ ھوار کنگ بوتگ اَنت۔ آیانی تہ ءَ سیاسی ءُ انسانی ھکانی کارکن، نودربر ءُ چاگردی کارکن ھوار اَنت۔
آئی گوشتگ کہ اے رویشت راھبند ءُ بنیادی انسانی ھکانی تچک ءَ لگتمالی اِنت۔ گیشتر انساپ ءِ ھک، آجوئی ءِ گپ، سیاسی مچی ءِ آجوئی ءُ تر ءُ گرد ءِ آجوئی کہ آیانی موکل ءَ جھانی انسانی ھکانی کانود دے اَنت۔ ناشرکاری ءِ کانود ءِ پہ سیاسی دارگ ءَ کارمرز کنگ ریاستی زوراکی ءِ بدیں چھرگ اِنت۔
آئی گوشتگ کہ ما گوں سرکار ءَ لوٹ کن ایں کہ زوت سیاسی ءُ انسانی ھکانی کارکناں ھوار درسیں مردمانی ناماں چہ پورتھ شیڈول ءَ در بہ کنت ءُ جمھوری سیاسی جھد ءَ دارگ ءُ ناشرکاری دارگ ءِ کانود ءَ پہ سیاسی مولاں کارمرز کنگ ءَ بند بہ کنت۔
