بلوچ اسٹوڈنٹس کونسل اسلام آباد ءِ جارکش ءَ وتی شنگ کرتگیں درشانےءَ گوشتگ کہ وانگجاہ ھما جاہ گوشگ بنت کہ اود ءَ ورنا وتی زانشت ءِ سپر ءَ دیم ءَ بر اَنت۔ بلے چہ بد بھتی ءَ بلوچستانءِ وانگجاہ چہ اے دودمان ءَ دور بوگ ءُ نودربر چہ دربرگ ءِ جاہ ءَ زوراکیانی دیمپان اَنت۔
آئی ءَ گوشتگ کہ شانزدہ ستمبر ءَ بلوچی زبان ءِ نامداریں شائرمبارک کازی ءِ سالروچ دارگ بیت، سرجمیں بلوچستان اے روچ ءَ دار ایت۔ بلے ھمےوڑ ءَ لسبیلہ یونیورسٹی ءِ نودربراں آئی یات ءَ پروگرامے برجم داشتگ بلے یونیورسٹی ءِ انتزامیہ ءَ چہ پولیس ءِ رد ءَ ھلاس کرتگ ءُ رند ءَ نودربر ماٹو کرتگ اَنت ایشی ما ایر جن ایں۔ ھمےوڑ ءَ ھزدار انجینئرنگ یونیورسٹی ءِ نودبر ترسینگ بیتگ اَنت ءُ چہ زانشتی سرگرمیاں دارگ بیتگ اَنت، آیانی ھک بزاں اسکالرشپ ءُ پنڈ پلگ بیتگ اَنت۔ وھدے کہ نودربراں ناھکیانی بگیری ءَ زھرشانی کرتگ بلے چہ آیانی جیڑہ ءِ گیش ءُ گیوار کنگ ءِ جاہ ءَ چہ دامگ ءُ بنکی آسراتیاں زبھر کنگ بیتگ اَنت۔
آئی ءَ گوشتگ کہ بلوچ اسٹوڈنٹس کونسل اسلام آباد گوں تچک ءَ گوش ایت کہ ما ھمک جاہ ءَ نودربرانی ھمراہ ایں ءُ گوں آیاں یکجھتی کنگ ءِ جار ءَ جن ایں۔ نودربرانی ترسینگ ءُ آیانی سرگرمیانی سر ءَ پابند ی جنگ جیڑہ ءِ گیش ءِ گیوار نہ اِنت بلکیں جیڑہ ءَ گنتر کنت۔
آئی ءَ گوشتگ کہ ما یونیورسٹیانی انتزامیاں زور دے ایں کہ درسیں ماٹو کرتگیں نودربر پد ءَ زورگ بہ بنت ءُ نودربرانی گون ءَ زوراکی بند کنگ بہ بیت۔ اگاں نہ بلوچ اسٹوڈنٹس کونسل اسلام آباد گوں آدگہ بلوچ نودربر گلاں پہ وتی ھکاں زرمبشتے بندات کنت۔
