ماسکو: روس ءَ یوکرین ءِ بنجاھی شھر کیپ ءَ ھوار دگہ چار شھراں جنگ بندی کنگ ءِ جارجتگ۔
روس ءِ دیمپانی وزیر ءِ رد ءَ کیپ، ماریوپول، ھارکیپ ءُ سمی ءَ جنگ بندی کنگ بیت۔
جنگ بندی ھندی وھد ءُ پاس ءِ رد ءَ ادار دہ ءَ بندات بیت۔
آئی گْوشتگ کہ جنگ بندی کنگ ءِ مول ءُ مراد ھمیش اِنت کہ ھما مردم کہ چہ شھر ءَ درکپگ لوٹ اَنت پہ آیاں یک آسراتی یے۔
اے بابت ءَ یوکرین ءِ سرکار ءِ نیمگ ءَ ھچ پیمیں درشان دیم ءَ نیاتکگ۔
دومی نیمگ ءَ یوکرین ءِ جتائیں دمگاں روسی لشکر ءِ بمبگواری ءُ روسی لشکر ءُ یوکرینی لشکر ءِ میان ءَ میڑ برجاہ اِنت۔
جھانی رسانکدر ءِ رد ءَ روسی لشکر ءِ جنگی بالیگرابانی بمبگواری ءَ یکیں کھول ءِ چار مردم ءُ مُرتگ۔ یوکرین ءِ دیمپانی وزیر ءَ گْوشگ اِنت کہ روس بنجاھی شھر کیپ ءَ ٹوھیں اُرشے کنت ءُ دومی نیمگ ءَ روسی مھتررولادی میرپوٹن ءِ گْوشگ اِنت کہ داں مئے لوٹ سرجم نہ بنت یورین ءِ سر ءَ اُرش برجاہ بنت۔
مھتر پوٹن گْوشتگ کہ روس ءَ ھچ زھرناکیں سلاھانی پلانٹانی سر ءَ اُرش نہ کُرتگ ءُ روس وتی مول ءُ مراداں جنگ کنت ءُ یا پہ گپ ءُ تران وتی لوٹاں منارین ایت۔ دومی نیمگ ءَ آئی اے ای اے ءَ وتی درشانی ءَ گْوشتگ کہ یوکرین ءِ تہ ءَ یورپ ءِ دُرساں مستریں زھرناکیں سلاھانی پلانٹ روسی لشکر ءَ دستیگ کُرتگ ءُ آ دمگ ءَ موبائل نٹورک ھم بند کنگ بیتگ اَنت۔
بنشون: مانیٹرینگ ڈسک/اکس: دامگ
