بلوچ نیشنل موومنٹ ( بی این ایم ) ءِبنجاھی سرکماش ڈاکٹر نسیم بلوچ ءَ گوشتگ کہ پاکستان ءَ بلوچ چکچینی ءِ تھنا برجاہ دارگ نہ بلکیں ناھکیں وڑے ءَ تیز کنگ ءِ پیسلہ کرتگ۔ اے وھد ءَ بلوچستان ءَ بلوچ چکچینی ءُ مچی سزا نوکیں سیمسرے ءَ بیتگ۔ سست گامیں چکچینی پاکستان ءَ یکدم تیز کرتگ ءُ بلوچ سرڈگار ءِ جھندم جوڑ کنگ ءِ پیسلہ کرتگ۔ اے ناشرکاری ءَ پاکستان نہ تھنا لاش چگل دیگ ءَ اِنت بلکیں پدریچ ءِ توکل ءِ ھلاس کنگ ءِ جھد ءَ اِنت۔ مئے گپ تچک اِنت کہ پہ راجی آجوئی ءِ نھاد ءِ پیلو کنگ ءَ جاڑیگ ایں۔
ڈاکٹر نسیم بلوچ ءَ گوشتگ کہ بلوچستان ءَ انوگیں لھتے ھپتگاں پشت ما پشت ءَ دروگیں میڑاں پاکستانی پوج ءِ دست ءَ زور بیگواھیں مردم کشگ بوگ ءَ اَنت۔ تھنا چہ کوہ ءِ سلیمان ءِ کوھاں چار ماھانی تہ ءَ چار جتائیں دروگیں میڑاں 13 مردم کشگ بیتگ اَنت۔ آیانی نام، آیانی پجار، آیانی بے میاری درس مئے کِر ءَ ھست اَنت۔ ایشانی تہ ءَ ھما مردم ھوار اَنت کہ چہ سالاں بیگواہ کنگ بیتگ اَنت ءُ آیانی مات شپانی تھاریاں پہ انساپ ءَ دوا لوٹگ ءَ اَنت۔ چہ اے دروگیں میڑاں ابید تھنا بزدار ٹک ءِ شانزدہ ورنا زور بیگواہ کنگ بیتگ اَنت۔ چہ شال ءَ بگر داں گوادر، چہ آواران ءَ نوشکے،ھمک ھند ءَ زوراکی برجاہ اَنت۔
ڈاکٹر نسیم بلوچ ءَ گوشتگ کہ اگاں ما تھنا لھتیں روچانی ویلانی سر ءَ چمشانک بدے ایں یک دردناکیں جاورے گندگ بیت۔ چہ مشکے ءَ ھشت ورنا پاکستانی پوج ءَ چہ گس ءَ آوار جتگ ءُ لاش چگل داتگ اَنت۔ مشکے ءَ گوست ءَ دوبر ءَ پاکستانی پوج ءِ دست ءَ دوبر ءَ چہ زوریں بیگواھی ءُ آزار ورگ ءَ پد آجو بیتگیں اھوالکار لالا لتیپ ءِ گس ءَ پوج ءَ بیڑ برتگ ءُ کھول ءِ دیم ءَ تیرگواری کرتگ ءُ کشتگ۔ آواران ءِ دمگ مالار مچی ءَ یکیں کھول ءِ سر ءَ پاکستانی پوج ءَ دو ارش کرتگ۔ پوج ورنائیں نئیم بلوچ ءُ بی بی ھوری ءِ گس ءَ پترتگ ءُ کشتگ اَنت۔ بی بی دادی بلوچ ءَ ھوار باز مردم چہ تیرگوری ءَ ٹپی بیتگ۔ ھمے وڑ ءَ چہ جاھو ءَ دو ورنا گس ءَ آوار جتگ ءُ کشتگ لاش چگل داتگ اَنت۔
آئی ءَ گوشتگ کہ بلوچستان زانشتجاہ ءِ نودربر ماہ جبین بلوچ شپ ءِ تھاری ءَ درسرکاری نادراھجاہ ءِ وابجاہ ءَ آوار جنگ ءُ بیگواہ کنگ بیتگ۔ نودربر ماہ جبین پولیو ءِ نادراھے۔ آئی برات پیسر ءَ آوار جنگ ءُ بیگواہ کنگ بیتگ۔ تارک بلوچ چہ نوشکے ءَ آوار جنگ بیتگ کہ آئی ھچ وڑیں ھال نیست۔ اے درسیں ویل ریاست ءِ بلوچ چکچینی ءُ مچی سزا ءِ بھر اَنت کہ بلوچ ءِ بے توار کنگ، آئی گوستانک ءِ ھلاس کنگ ءُ آجوئی زرمبشت ءِ دارگ ءِ کار برجاہ اِنت۔
ڈاکٹر نسیم بلوچ ءَ گوشتگ کہ پاکستان نہ تھنا پوجی زوراکی ءِ پارست ءَ بلوچ راج ءَ دارگ لوٹ ایت بلکیں گوں ایشی ءَ ھوار مذھبی سلاھانی نوکیں شوربندی ءِ رد ءَ بلوچ راج ءِ بگیری ءَ کارمرز کنگ ءِ شوربندی اِنت۔ بلوچ نیشنل موومنٹ اکوام متھدہ، یورپی یونین ءُ انسانی ھکانی میان استمانی ادارھاں زور دنت کہ آ بلوچستان ءَ برجاھیں چکچینی ءُ زوریں بیگواھیانی بگیری ءَ گامگیج بزور ایت۔ تیوک ءَ یو این ورکنگ گروپ آن انفورسڈ ڈس اپیئرنسز ءَ زوت دزمانجنی کنگ لوٹ ایت چی ءَ کہ بے تواری پاکستان ءَ گیشتر ناشریں میاری کنگ ءِ موہ ءَ دنت۔
بی این ایم ءِ سرکماش ڈاکٹر نسیم بلوچ ءَ گوشتگ کہ بلوچ مات، گھار، زھگ ءُ ورنا یکشل ءَ زھرشانی کنگ ءَ اَنت۔ مئے راجی گھگیری مزنی ءِ چیدگ اِنت۔ پاکستان ریاست پہ اے زھرشانیانی ھلاس کنگ ءَ نہ تھنا وتی لشکر ءَ بلکیں پوج، کشندہ ٹولی ءُ مذھبی ٹولیاں کارگرگ ءَ اِنت۔ اے آئی دودمانی، سیاسی ءُ بے سوبی ءِ منانک اِنت۔ چوش کہ مارا نشانگ کنگ ءَ اِنت بلے ما نہ اوشت ایں۔ ریاست چہ وتی ناشریاں ھما جاہ ءَ سر بوگ لوٹ ایت کہ کس گمان کرت نہ کنت، بلے بلوچ راج ءَ پیسلہ کرتگ کہ آ پہ وتی آجوئی ءِ گرگ ءَ ھمک نھاد ءَ پیلو کنت۔
آئی ءَ گوشتگ کہ بلوچ نیشنل موومنٹ ھمے کول ءَ کنت کہ بلوچ سرڈگار ءُ میان استمانی تک ءَ راجی زرمبشت ءِ سیاسی ءُ سپارتی تک ءَ دیم ءَ جنز ایت۔ ما پہ انسانی شرپ ءُ راجی پدریچ ءَ وتی جھد ءَ گیشتر گوں مھکمی ءَ برجاہ دار ایں۔
