سند: چہ سندکور ءَآپ برگ ءِ بگیری ءَ چست بیتگیں زرمبشت ءَ پنچ روچ اِنت کہ برجاہ اِنت۔ اے میان ءَ سند ءُ پنجاپ ءَ روکیں درسیں شھدگ بند کنگ بیتگ اَنت۔ آمیدگس ءُ کراچی بندرگاہ ءِ شھدگ ھم بند کنگ بیتگ۔
اے زرمبشت ءَ سند ءِ راجدوستیں جتائیں پارٹی، وکیل، نودربر گل، سیاسیءُ چاگردی کارکناں بازیں کچے ءَ بھر زرتگ ءُ آیانی گوشگ اِنت کہ چہ سند ءَ پنجاپ ءَ آپ برگ ءِ شوربندی سند ءِ آپ، کشت ءُ کشاری، مڈی ءُ تیاب ءِ دستیگ کنگ ءِ جھد اِنت۔
اے بابت ءَ سند ءِ وکیل کونسل ءَ وتی شنگ کرتگیں درشانے ءَ گوشتگ کہ اگاں سرکار ءِ نیمگ ءَ داں 72 ادار ءَ اے شوربندی ھلاس کنگ نہ بوت گڑا ما سند ءُ پنجاپ ءَ روکیں درسیں ریلوے لائناں بند کن ایں ءُ گوایشی ءَ ھوار ما آمیدگسی کاراں ھم مھتل دار ایں۔
