
سند: وائس پارمسنگ پرسن آپ سند ءِ سروک ءُ پاکستانی چیریں ادارھانی کارمندانی دست ءَ کشگ بوتگیں ھدایت لوھار ءِ جنک سورٹ لوھار ءَ نسیر آباد ءَ زھرشانی ءَ تران کرتگ ءُ گوشتگ کہ ریاست ءَ اگاں راجان ءَ ھک بہ داتیں گڑا بے میاریں مردم ناھک ءَ شھید نہ بوت اَنت۔ ریاست ھمے لوٹ ایت کہ سندی ءُ بلوچانی چکچینی برجاہ بہ بیت آ کدی مارا انساپ نہ دنت۔ مردمی بنیادی ھکانی گپ کنگ بیت بلے اد ءَ زوراکیاں پچار اِت کہ بلوچ ءُ سندیانی گون ءَ چونیں زوراکی کنگ بوگ ءَ اِنت۔ ریاست لس مردم ءُ سیاسی کارکناں نشانگ کنگ ءَ اِنت۔
آئی ءَ گوشتگ کہ مارا ادارہ بہ گوش اَنت کہ سند ءَ چے بوتگ؟ بلوچستان ءَ زھرشانی برجاہ بوتگ اَنت اود ءَ کشت ءُ کوش بوتگ، بلوچ اسلام آباد پریس کلب ءِ دیم ءَ زھرشانی ءَ نشتگ اَنت ءُ لوٹ کنگ ءَ بوتگ اَنت بلے آیان ءَ انساپ دیگ نہ بوتگ۔ کشت ءُ کوش بند کنگ نہ بوتگ ۔
سسی لوھار ءَ گوشتگ کہ ریاست ءَ سند ءَ کشت ءُ کوش بندات کرتگ نزاناں چے کلوہ دیگ لوٹ ایت۔ ریاست ءَ اد ءَ زوراکی بندات کرتگ ایشی پسو ریاست ءُ ریاستی ادرھاں دیگ لوٹ ایت۔ ھما سیاسی کارکن 2017 ءَ زور بیگواہ کنگ بوتگ اَنت آ انگت ءَ چیریں آزارجاھاں بندیگ اَنت۔
آئی ءَ گوشتگ کہ ھمک سیاسی کارکن ھمے جست ءَ بہ کنت کہ ھدایت لوھار ءَ چی ءَ شھید کرتگ؟ دانکہ شھید ھدایت لوھار ءِ کشندہ دزگیر کنگ مہ بنت ما ھمے وڑ ءَ دگانی سر ءَ زھرشانی کن ایں۔ من گوں درسیں مردم دوستاں ھمے لوٹ ءَ کناں کہ مئے گون ءَ کمک بہ کن اَنت۔