اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ گوں بالیگرابانی بمب گْواری ءَ ھوار اوگان راجی لشکر ءَ وتی تْرُندیں جنگی اُرشاں 404 تالبان جنگول کُشتگ ءُ دِگہ 209 ٹپی کرتگ۔
راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش نگرھار، لوگمان، گزنی، پکتیا، ھوست، کندھار، زابُل، ھِرات، جوزجان، بلک، سمنگان، پریاب، سرئے پُل، ھِلمند، ٹکر، بلگان ءُ کاپیسا ءِ ھند ءُ دمگاں کرتگ اَنت۔
راجی پھزگ ءَ وتی یکشلیں ٹیوٹر پیگاماں گیشترّیں سرپدی یے دیان ءَ گْوشتگ کہ ھرات ءِ انجیل، گْوزراہ ءُ دِگہ نزیکیں دمگاں گوں اوگان راجی لشکر ءِ بالیگرابانی بمب گْواری، آشوبی سِلاھبند، راجدوستییں گلانی کُمک ءَ راجی لشکر ءِ جنگی اُرشاں 35 ناشرکاریں تالبان کُشگ ءُ دِگہ 27 زدگ بیتگ۔
گیشتریں سرپدیان ءَ آئی گْوشتگ کہ ماں اِے اُرشاں تالبان ءِ بازیں جنگی آسراتی ءُ سِلاہ کوت ھم تباہ کنگ بیتگ اَنت۔
ھمے پیم ءَ ھلمند ءِ بُنجاھی شھر لشکرگاہ ءِ کِرّ ءُ کشی دمگاں اوگان راجی لشکر ءُ اوگان بالیگراباں لشکرکشی کنان ءَ تالبان ریڈ یونیٹ ءِ بلاھیں جنگی کماندر مولوی مُبارک ءَ ھوار 94 تالبان جنگول کُشتگ ءُ دِگہ 16 زدگ کرتگ۔
گوں ھمے رِدیں ٹویٹور پیگاماں ھوار اوگان راجی لشکر ءَ ناشرکاریں تالبان ءِ بگیری ءَ وتی کسان ءُ مزنیں سرجمیں اُرشانی سرپدی اکس ءُ تامُربندی دْروشم ءَ وتی سرکاری تندجاہ ءُ پیسبوک تاکدیم ءَ ھم شِنگ کرتگ انت۔
دومی نیمگ ءَ اوگانستان ءِ تْرُندیں جنگی جیڑھانی بابت ءَ مرچی ھندوستان ءِ کارسر ٹی ایس تورومُورتی ءِ پاگواجھی ءَ یو این او ءِ راجمانی تپاکی پھزگ ءِ گل ءِ نِند ءُ نیادے اڈ دیگ بیت کہ ماں اِے مُچّی ءَ میان اُستمانی راج ءُ تپاکی پھزگی باسک اوگانستان ءِ بابت ءَ یک سوڑگے کن اَنت۔
زانگ بہ بیت کہ اوگان جیڑہ ءِ بابت ءَ اِے میان اُستمانی بلاھیں نِند ءُ نیاد چہ اوگانستان ءِ ڈنّی کارانی راھشُون ھنیپ ھتمار ءِ گوں ھندوستان ءِ ھمسر جے شنکر ءَ ٹیلی پونی گپ ءُ تْرانے ءَ پد ھندوستان ءِ کارمستر ٹی ایس تورومُورتی لوٹائینتگ۔
بازیں مُلکاری، جنگی ءُ میان اُستمانی جنگی زانتکارانی گْوشگ ءِ رِد ءَ ماں اِے مُچّی ءَ جھان ءِ مُلک اوگانستان ءِ بلاھیں شھر ءُ دمگانی سر ءَ اوگان تالبان ءِ تْرُندیں جنگی اُرشاں ایرجن اَنت، چہ ایشی ءَ ابید سِلاہ ءِ زور ءَ تالبان ءِ سرکار ءِ نہ منّگ ءِ ھم جار جنگ بیت۔
روس، امریکہ، پرانس انگلینڈ ءُ دگہ مستریں ملک بلکیں ناشرکاریں گلانی پلہّ مُرزی کنوکیں ملکاں ھم ایرجن اَنت۔
بنشون: نیوزڈیسک | اکس: دامگ
