پسنی | منگچر | تربت | جاھو | شال: زورگریں پاکستانی شش مردم آوار جتگ ءُ بیگواه کرتگ.
بنشون ءِ رد ءَ سی ٹی ڈی ءِ کارمنداں 14 اپریل ء شپ ءَ پسنی ، ببر شور ءَ گسے ءَ بیڑ برتگ ءُ ورنایے آوار جتگ ءُ بیگواه کرتگ. آوار جنگ بیتگیں ورنا ءِ نام شوکت ء سکی بکش اِنت ءُ آ ببر شور ءِ جاہ منند اِنت.
ھمے وڑ ءَ مرچی سھب ءَ پاکستانی لشکر ءَ تربت ءِ ھند جوسک ءَ شیرهان نزر نامیں مردمے آوار جنگ ءَ پد بیگواه کرتگ. کھول ءَ آئی ءِ بیگواھی ءِ گپ راست کرتگ ءُ آئی ءِ یل کنگ ءِ لوٹ کرتگ.
چه ایشی ءَ ابید مرچی پاکستانی لشکر ءِ کارمنداں منگچر ءَ گسے ءَ بیڑ برتگ ءُ ڈاکٹر نسیر نامیں مردمے آوار جتگ ءُ بیگواه کرتگ.
ڈاکٹر نسیر ءِ بیگواھی آئی ءِ گھار ماه دیم ءَ راست کرتگ ءُ گوشتگ که نسیر نودربرے ءُ مرچی پاکستانی لشکر ءَ گس ءَ چه کھول ءِ چمانی دیم ءَ آوار جتگ ءُ بیگواه کرتگ چه ایشی ءَ ما سکا جنجالانی دیمپان اِیں، پاکستان ءِ زوراکی انوں ھما کچ ءَ سر بوتگ اَنت که آ تچک ءَ کھولانی سر ءَ بیڑ برگ اِنت.
ھمے وڑ ءَ چہ ھب چوکی ءَ زورگریں پاکستانی لشکر ءَ گلاب نامیں ورنایے آوار جنگ ءَ پد بیگواہ کرتگ۔ بیگواھیں گلاب ء اسھاک جاھو ءِ میتگ کوھڑو ءِ جاہ منند اِنت کہ پاکستانی لشکر ءَ 11 اپریل ءَ چہ ھب چوکی بازار ءَ آوار جتگ ءُ بیگواہ کرتگ انگت بیگواہ اِنت۔
چہ شال ءِ ھند ڈگاری ءَ 13 اپریل ءَ پاکستانی دو ورنا آوار جتگ کہ بیگواھیں ورنایانی نام نسیر ساتکزھی ء کیسر ھان ءُ اکرام ساتکزھی ء نورھان اِنت۔
نسیر ءُ اکرام ساتکزھی ءِ زوریں بیگواھی ءِ گپ بی وائی سی شال ھنکین ءَ راست کرتگ۔
