کیچ/ پنجگور/ شال: زورگریں پاکستانی لشکر ءَ بیڑ برتگ ءُ ھپت مردم آوار جنگ ءَ پد بیگواه کرتگ.
دوشی زورگریں پاکستانی لشکر ءَ تربت ءِ ھند بھمن ءَ گسے ءَ بیڑ برتگ ءُ پنچ مردم نومان رپیک، راھیل الی، روشن الی، آدم گلام جان ءُ نسیم بشیر آوار جتگ ءُ بیگواه کرتگ اَنت. آیانی زوربیگواھی ءِ گپ بی وائی سی کیچ ھنکین ءَ راست کرتگ ءُ گوشتگ کہ چہ ایشاں چار یکیں کھول ءِ مردم اَنت۔
ھمے وڑ ءَ گوستگیں روچاں پاکستانی لشکر ءَ چه پنجگور ءَ مھمود ء مھپوز نامیں مردمے آوار جنگ ءَ پد بیگواه کرتگ.
دومی نیمگ ءَ گوستگیں شپ ءَ پاکستانی لشکر ءَ چه شال ءَ آپز الی نامیں مردمے آوار جتگ کہ آ ھاران ءِ جاہ منند اِنت۔ آئی ءَ وتی مات په الاج ءَ شال ءَ برتگ کہ چه ھوٹل ءَ آوار جنگ ءُ بیگواہ کنگ بیتگ۔
آپز اَلی ءِ برات مبارک گوستگیں روچ ءَ پاکستانی لشکر ءِ کارمنداں چه ھاران ءَ آوار جتگ ءُ بیگواه کرتگ اَت. دوئیں براتانی زوریں بیگواھی ءِ بگیری ءَ ھاران ءِ ریڈ زون ءَ کھول ءِ زھرشانی برجاه اِنت.
