بلوچ اسٹوڈنٹس ایکشن کمیٹی ءِ چارمی بنجاھی پتر ءِ دیوان گل ءِ سر کماش شبیر ءِ سروکی ءَ داں دو روچاں برجم دارگ بیتگ۔ دو روچی دیوان ءَ گل ءِ گوستگیں اھوال، نگد، گَل ءِ کار ، ھندی ءُ میان استمانی سیاسی جاور ءُ آؤکیں گامگیج ءِ سر ءَ گپ ءُ تران کنگ بیتگ۔ دیوان ءَ سرجمیں بنگپانی سر ءَ یک یک ءَ گپ ءُ تران ءَ پد پہ آؤکیں کاراں جتائیں سوڑگ کنگ بیتگ۔
دیوان ءِ اولی روچ ءِ بندات چہ گل ءِ سرکماش شبیر ءِ رزا ءَ بندات کنگ بیتگ کہ گپ گل ءِ گوستگیں کار دیوان ءِ دیم ءَ پیش کنگ بیتگ اَنت، آئی ءِ تہ ءَ مزن کارگشاد ءِ کار، گل ءِ کُلیں پترانی ھال کہ آیانی تہ ءَ لبزانکی، رسانکدری، پنانس،بلوچ لٹریسی کیمپئین ءُ بلوچستان کتاب کاروان کمیٹی ءِ اھوا ل مان بیتگ اَنت۔ پترانی اھوالاں بھار گل ءِ سرجمیں ھنکینانی سر ءَ گوں ھیرتی ءَ چمشانک ءُ سبا لٹریری پیسٹیول ءِ مراگشانی ھال ءُ ایدگہ کسان ءُ مزنیں اھوال دیوان ءَ ایر کنگ بیتگ اَنت۔
دیوان ءِ دومی بن گپ نگدکاری ءِ تہ ءَ سنگتاں گل ءِ کسان ءُ مزنیں نزوریانی سرءَ یک یک ءَ گپ ءُ تران کُرتگ ءُ پہ آھانی گِرگءَ شور ءُ سلاہ اِش داتگ۔ سنگتاں سیاست ءُ سیاسی گلانی تہ ءَ نگدءِ سر ءَ درائینت ءُ گوشت کہ نگد ہما پدیانک اِنت کہ چہ ایشی ءَ ہدکارےچہ ہر وڈیں ردآشوبی روشتاں پاک ءُ پلگار بیان بیت ءُ نہ تھنا وتی سیاسی مکسد ءَ سر بیت بلکیں کاملیں آشوبی یے بیت ءُ در کئیت۔ دنیا ءِ ھمک راج یاکہ سیاسی گلاں نگدءِ چاگرد ءَ گوں سپر جتگ، آ مرچی بازیں وتگڈیں گپچلاں چہ پاک وتی دیمروئی ءِ سپر ءَ گوں مھکمی ءَ گوں گام جنان اَنت، ایشی ءِ مستریں سوباں چہ یکے ایش اِنت کہ آیاں پہ وتی سیاسی کردءِ شر ءُ گھرکنگءَ نگدکتگ ءُ راجی نپ ءُ پھازیتگ اَنت ۔ ھمے پیم مارا وتی راجی نپ ءُ سیت چارگی اَنت ءُ ھمک ردیں کارکہ پہ راج ءَ تاوان اِنت گوں نگد ءِ پاست ءَ شر کنگی اَنت پہ پمیشکا نگد ءَچاگردے ودی کنگ ءَ المی اِنت کہ نگد کنوک ءُ نگد گوشداروک ءَ ہردوئیناں سگگ ءِ ہاٹیگ بہ بیت۔ اوپار ءُ سگگ ءِ ہاٹیگ ءَ گوں نہ تھنا نگد ءَ گوں بندوکیں آشوبی چاگردے ودی بیت بلکیں جھد ءِ تہ ءَھمک پیمیں کار ءُ روشت دارگ ءُ شر کنگ بنت۔
دیوان یک روچے ءِ آسر بوگ ءَ پد دومی روچ ءَ گوں سرکماش ءِ رزا ءَ بندات کنگ بیتگ ءُ سیمی بن گپ گَل کاری ءِ تہ ءَ سنگتاں گل کاری ءِ سر ءَ نبشتگیں وتی نبشتانک ونتگ اَنت کہ آھانی تہ ءَ اے میان ءَ بیتگیں کار ءُ پہ دیم ءِ کارانی گھتری ءُ نوکیں کارانی نیمگ ءَ روگ ءِ سر ءَ گپ ءُ شور مان بیتگ۔ سنگتاں گَل کاری ءِ سر ءَ گپ کنان ءَ گوشتگ کہ گوستگیں سالے ءُ کپے ءِ تہ ءَ گل ءَ وت ءَ کساس سرجمیں بلوچستان ءَ نہ تھنا سر کُتگ بلکیں بلوچ ورنایانی زانت ءُ زانشتی چاگردے ودی کنگ ءَ ھم یک ھدے ءَ سوبین بیتگ۔ اے گل ءِ مھکمی ءُ سنگتانی ھمت ءُ ھاٹیگ ءِ برورد اِنت کہ ادارہ ءِ کار ءُ پالیسی روچ پہ روچ شرتر ءُ گھتر بیان اَنت، بلے بلوچ زمین ءِ سر ءَ ودی بیتگیں اوبادگے ءَ بِھ وتی کارسرجم ءُ گُڈی پھمگی نہ اَنت بلکیں ھمک کرد ءُ کار ءِ تہ ءَ ھمک روچ ءُ ماہ ءُ سال ءِ ھساب ءَ گھتر، شرتر ءُ مھکم تر کنگ ءِ ھیال زیرگی اِنت ءُ جھد کنگی اِنت۔ پہ بلوچ ورنایے ءَ وتی ھمک کار پہ راجی جھد ءَ کسانیں بھرشتے سرپد بیگی اَنت، مدام گیش ءُ گھتر ءَ چہ گھتر ءِ نیت ءَ گوں پھتوئیں پگر ءَ سیاسی کرد ءَ جنزینگی اِنت دانکہ آ ھستیں ھرڈولیں گامبیلانی (چیلنج) دیمپانی ءَ کُت بہ کن اَنت۔ بلوچ ورنایاں وت ءَ پگری بنیاد ءَ انچو پھتو کنگی اِنت کہ آئی ءِ ھمک سیاسی کاریک دلجمیں آسرے ءِ دیگ ءَ ھوار ھمک ڈولیں گرانی ءُ اڈاندانی دیم ءَ گوں دیرچاری ءَ بہ اوشت ایت ۔ پگری بنیاد ءَ پُھتو ءُ وتی کار ءِ سر ءَ بیسہ داروکیں جھدکار بِھ پُشت ءَ نہ کنز ایت، بلکیں مدام اڈاندانی دیم ءَ مھکمی ءَ اوشت ایت ءُ آیاں توجیل کنگ ءِ جھد ءَ کنت۔ اے پُھتوئی ورنایاں چہ وتی بلوچ زمین ءِ لگتمالی ءِ راستی ءُ ایدگہ دنیائی زانت ءُ زانشت ءِ پھمگ ءُ دربرگ ءَ چہ کئیت، پمشکا ھمک کرد گوں سنچ ءُ زانت ءَ پہ راجی سیتاں کارمرزگی اِنت۔ھمے پیم مرچی بلوچستان کتاب کاروان ءِ وسیلہ ءَ بلوچ ورنا ءُ مھلوک ءِ تہ ءَ وانگ ءُ زانشت ءِ ماھول ودی کنگ بہ بیت یاکہ بی ایل سی ءِ وسیلہ ءَ بلوچستان ءِ وانگی وادارھانی زوالی ءِبگیری ءَ توار چست کنگ ءُ شر کنگ ءِ جھد بہ بیت، گل ءَ نودربر گل ئے ءِ بستار ءَ پہ بلوچ راجءَ اے کارانی کردی دروشم ءَ جھدے کنگ ءَ اِنت ءُ گل ءَ مرچی سوبینی ءِ کشک ءَ وت ءَ ھمدپ کتگ۔
دیوان ءِ گُڈی بن گپ آؤکیں گامگیج بیتگ کہ سنگتانی شور ءُ سلاھانی بنیاد ءَ کارانی گھتر کنگ ءَ نوکیں سْوڑگ کنگ بیتگ۔دیمتر ءَ سبا لٹریری پسٹیول ملیر ءُ ڈی جی ھان ءَ برجم دارگ بیت،میان استمانی ماتی زبانانی روچ ءِ درگت ءَ ابدُلکریم شورش ءُ ابدُازیز کرد ءِ یات ءَ مستونگ ءَ مراگشے اڈ دیگ بیت،بلوچستان کتاب کاروان ءَ مھکم کنان ءَ نوکیں سال ءِ درگت ءَ سرجمیں بلوچستان ءَ کتاب میڑہ برجم دارگ بنت ءُ آسر ءَ سیمینارے اڈ دیگ بیت، بلوچ نودربر سیاست ءِ سرءَ شال ءُ اوتل ءَ مراگش اڈ دیگ بیت، بلوچ لٹریسی کیمپئین ءِ کاراں گیش مھکم کن ایں ءُ بلوچستان ءِ بنداتی وانگی جیڑھانی سر ءَ نکان شِنگ کنگ ءَ ھوار وانگجاھانی جم کتگیں ڈیٹایانی یک بریپنگ سیمنارے اڈ دیگ بیت، بلوچستان کتاب کاروان، رسانکدر ءُ کیرئیر کونسلنگ ءِ سر ءَ کتابُک اڈ دیگ بیت ءُ ماتی زبان ءِ سر ءَ براھوئی ءَ کتابُکے چاپ ءُشِنگ کنگ بیت۔ اشاں ھوار بنجاھی پتر ءِ سئے باسک شیراز بلوچ، پوزیہ بلوچ ءُ مسدک بلوچ ءِ چہ بنجاھی کمیٹی ءِ اُگدھاں دزکشی منگ بیتگ ءُ پہ ھورکیں اُگدھاں ھزدار ھنکین ءِ گوستگیں کارمستر جویریہ بلوچ، شال ھنکین ءِ انوگیں کارمستر پھد بلوچ ءُ گوستگیں کارگُشاد الی بلوچ پہ بنجاھی کمیٹی ءَ گچین کنگ بیتگ اَنت۔
دو روچی دیوان ءِ سرجمیں بھرانی سر ءَ یک یک ءَ گوں دلجمی ءَ گپ ءُ تران ءَ پد آؤکیں گامگیج ءِ تہ ءَ جتائیں شور ءُ سلاہ کنگ بیتگ۔ گُڈی ءَ سرکماش ءَ دیوان ءِ آسری ءِ جار جتگ۔
