شال: بلوچ راجی زْرمبشت ءِ پیشگیں کارگشاد ءُ بلوچ سروک رھیم بلوچ ایڈووکیٹ ءَ وتی درشانے ءَ گْوشتگ کہ زورگِپتیں بلوچستان ءَ چہ دھکاں برجاھیں لشکرکشی ءِ تیز کنگ ءَ نوکیں شوندات ”عزم استحکام فوجی آپریشن“ بلوچ چکچینی ءَ دیمروئی ءُ وشھالی گْوشگ پنجابی لشکر ءُ پنجابی مزن وزیر ءِ زوراکیں پگر ءُ شونداتاں پدر کنت۔
آئی ءَ گْوشتگ کہ لشکری زوراکیانی بنیاد ءَ بمبگواری کنگ ءُ بلوچ آبادیانی آدرہ کنگ،بلوچانی پس ءُ مال ءُ مڈیانی لُٹگ ءُ آدرہ کنگ،بلوچ ورنا،کماش،جنین ءُ زھگانی گون ءَ زوراکی کنگ،بلوچ پسگانی بیگواہ کنگ،بندیگیں بلوچانی کُشگ ءُ ژانگولیں لاشانی چگل دیگ ءُ دروگیں میڑاں آیانی کُشگ ءَ پنجاب ءِ مردم بوت کنت کہ دیمروئی ءُ وشھالی بزان اَنت بلت بلوچ راج ءُ جھان لشکر ءِ لشکرکشیانی میان ءَ زور ءُ زوراکیاں دیمروئی نہ بلکیں جنگی میارباری ءُ مردمگری ءِ بگیری ءَ میارے سرپد بیت۔
بلوچ سروک ءَ گْوشتگ کہ پنجاب ءِ مردم ءُ لشکر نہ زانت کہ ایردستیں راجاں چہ کرناں پیش زورگِر ءُ نوآبادیاتی لُٹ ءُ پُل دیمروئی ءُ وشھالی نہ منّ اِتگ اَنت،آجوئی زْرمبشتانی پارست ءَ چوشیں زوراکی ولگوج کُرتگ ءُ گْوستانک ءِ ھاکوت ءَ چگل داتگ اَنت۔آدگہ ایردستیں راجانی وڑ ءَ بلوچ راج ھم چہ 1948 ءَ بلوچستان ءَ پاکستان ءِ زورگری ءِ بگیری ءَ آجوئی ءِ جنگے کنگ ءَ اِنت۔
آئی ءَ گْوشتگ کہ نہ بلوچ راج ءُ نہ جھان بلوچ آجوئی زْرمبشت ءَ ناشرکاری لیک ایت ءُ نہ کہ پنجابی لشکر ءِ زوراکیاں دیمروئی ءُ وشھالی سرپد بنت۔ بلوچ راجی آجوئی زْرمبشت نوں ھنچوش توانمند ءِ مھکم بیتگ کہ نوں ایشی ءِ پروش دیگ ءُ ایرماد کنگ چہ پنجابی لشکر ءِ وس ءَ ڈن اِنت۔ پنجاب ءِ مردم ءُ ھاکماں زوت یا دیر ءَ اے گْواچن منّگی اِنت کہ ایمنی، دیمروئی ءُ وشھالی تیوک ءَ گوں بلوچستان ءِ آجوئی ءَ بندوک اِنت۔
