اسلام آباد ءَ بی وائی سی ءِ سروک ءُزور بیگواھیں مردمانی کھولانی نیمگ ءَ زھرشانی ءَ چاردہ روچ سرجم بیتگ۔ سانمندیں کھولاں پہ وتی آزیزانی آجوئی ءَ روانکے کش اِتگ ءُ پہ وتی آزیزانی آجوئی ءُ زوریں بیگواھیں بگیری ءَاوگام جتگ۔
آیانی گوشگ اِنت کہ مئے زھرشانی ءَ مرچی چاردہ روچ سرجم بیتگ بلے انگت ءَ پہ مئے لوٹانی منگ ءَ چہ سرکار ءِ نیمگ ءَ ھچ وڑیں دلجمیں گامگیج زوگ نہ بیتگ۔
آیانی گوشگ اِنت مئے لوٹ ڈیھ ءِ راھبند ءُ کانود ءِ رد ءَ اَنت بلے چہ انتزامیہ ءِ نیمگ ءَ پہ مئے لوٹانی منگ ءَ ابید مئے توار ءِ دارگ ءِ جھد کنگ بوگ ءَ اِنت۔ ما چہ سرکار ءَ ھمے لوٹ کرتگ کہ بی وائی سی ءِ درکانودی دزگیر بیتگیں سروک یل کنگ بہ بنت ءُ بلوچستان ءَ چہ دھکاں برجاھیں زوریں بیگواھی ءُ درکانودی کوش بند کنگ بہ بیت۔
آیاں گوں انسانی ھکانی ادارہ، سیول سوسائٹی ءُ اھوالکاراں لوٹ کرتگ کہ آ مئے گون ءَ ھمگام بہ بنت ءُ مئے گون ءَ انساپ ءِ لوٹ ءَ وتی کرد ءَ پیلو بہ کن اَنت۔
