بلوچ راجی آجوئی لوٹوکیں سروک رھیم بلوچ ایڈوکیٹ ءَ وتی شنگ کرتگیں درشانے ءَ گوشتگ کہ آشورہ ءِ روچ تھنا گم ءُ پرس دارگ ءِ روچ نہ اِنت، بلکیں گوں ایشی ءَ مزنیں سکینے بندوک اِنت۔ آ ایش اِنت کہ ھک، انساپ ءُ پہ راستی ءَ زوراک ءُ توانمندانی بگیری ءَ توار چست کنگ ءُ دیم پہ دیمی کنگ اِنت۔ھک، انساپ ءُ راستی جھد ءُ جنگ ءَ اے گپ ھچ مانا نہ دار ایت کہ زوراک چنچو توانمند اِنت یا گوں آئی ءَ اکیدہ، مھذب ءُ ھمگرنچی ھست۔
آئی ءَ گوشتگ کہ بلوچ راج پاکستان ءِ دست ءَ زورگپتی، راجی ایردستی، زوراکی، چکچینی ءُ لٹ ءُ پلانی بگیری ءَ ھما جھد ءَ کنگ ءَ اِنت، ھما وڑ ءَ پہ راجی آجوئی ءَ دیمونی دیگ ءَ اِنت آ امام ھسین ئیگ اِنت۔ پاکستان ریاست، پاکستان ءِ پوج، چیریں ادارہ ءُ آدگہ ادارہ بلوچ راج ءِ سر ءَ ھما زوراکیاں کنگ ءَ اَنت که یزیدی لشکر ءَ کرتگ۔
رھیم بلوچ ایڈوکیٹ ءَ گوشتگ کہ پاکستان ھما وڑیں یک وتگڑیں ڈیھے کہ ھما پیم یزید ءِ وتگڑیں اسلامی بادشاھی بوتگ، پاکستان ءِ پوج، چیریں ادارہ ءِ کارمند یزید ءِ زوراکیں لشکر ءِ وڑ ءَ زوراکی کنگ ءُ پاکستان ءِ نیمگ ءَ یزید ءِ وڑ ءَ وار راست ءُ لگوری کن اَنت۔
