شال: بیگواھیں بلوچانی توار ( وی بی ایم پی ) ءِ سرکماش نسر اللہ ءَ وتی شنگ کرتگیں درشانے ءَ گوشتگ کہ زور بیگواھیں ابدالگپار ءِ زوریں بیگواھی ءِ کیس آئی مات ءَ گل ءِ کِر ءَ یاداشت کرتگ۔
آئی ءِ گوشگ اِنت کہ بی بی ھدیجہ ءَ گوشتگ کہ منی زھگ ابدالگپار ء شیر زمان ءَ پاکستانی لشکر ءَ 19 نومبر ءَ چہ بادینی چاراہ، سریاب ءَ درکانودی آوار جتگ ءُ بیگواہ کرتگ۔
آئی ءَ گوشتگ کہ منی یک زھگے نیامت اللہ پیسر ءَ بیگواہ اِنت۔ آ 8 دسمبر 2016 ءَ پاکستانی لشکر ءَ بیگواہ کرتگ کہ انگت بیگواہ اِنت۔ آئی کیس کمیشن ءَ داتگ، نوں منی دومی زھگ زور بیگواہ کنگ بوتگ چہ ایشی مئے کھول گیش جنجالانی دیمپان اِنت۔
نسر اللہ ءَ گوشتگ کہ گل ءَ بی بی ھدیجہ دلجمی داتگ کہ تئی زھگ ابدالگپار ءِ کیس ءَ سرکار، پہ زور بیگواھیں مردماں جوڑ بوتگیں کمیشن ءُ اکوام متھدہ ءِ ورکنگ گروپ ( پہ بیگواھیں مردماں جوڑ بوتگ) دیگ بیت ءُ پہ ابدالگپار ءُ نیامت اللہ ءِ آجوئی ءَ ھمک جاہ ءَ توار چست کن ایں۔
نسر اللہ ءَ گوں سرکار ءَ لوٹ کرتگ ءُ گوشتگ کہ پہ ابدالگپار ءُ نیامت اللہ ءِ زوریں بیگواھی ءِ بگیری ءَ زوت دلگوش بہ کنت ءُ پہ آیانی آجوئی ءَ دلجمی بہ دنت ءُ کھول ءَ چہ رنجاں بہ رکین ایت۔
