بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ یونٹ پتہ اسکواڈ ءِ سرمچاراں دوشی پنجگور ءَ بی ایل اے ءِ انٹیلیجنس ونگ زراب ءِ داتگیں انٹلی جنس ءِ ھالانی بنیاد ءَ پروم دِزگٹ ءَ پاکستانی لشکر ءُ چیریں ادارھانی جوڑ کرتگیں ناشرکاریں مردمانی ٹولی وتگڑیں کشندہ ٹولی ءِ یک بندرے ءَ ٹوھیں اُرشے کرتگ۔
آئی ءَ گوشتگ کہ سرمچارانی اُرش ءَ کشندہ ٹولی ءِ چار کارمند جاھی مرتگ آیانی یک ھمبلے ءَ وتی سلاہ چگل داتگ اَنت ءُ جستگ۔ وھدے کہ کشگ بوتگیں کارمندانی سلاہ ءُ آدگہ جنگی ساز ءُ سامان سرمچاراں دستیگ کرتگ اَنت۔
جارکش ءَ گوشتگ کہ ھمے میان ءَ سرمچارانی دگہ یک ٹولی یے ءَ اُرش ءِ جاہ ءَ دیم ءَ آیوکیں وتگڑیں کشندہ ٹولی ءِ سروک بجار شمبے زھی ءِ برات تاھر شمبے زھی اُرش ءَ نشانگ کنگ کرتگ۔ ایشی آسر ءَ آ جاھی مرتگ ءُ آئی دو ھمبل گوں ٹپی ئیں جاوراں تکگ اَنت۔
آئی ءَ گوشتگ کہ ھمے وڑ ءَ سرمچاراں ھمے جاہ ءَ لٹ ءُ پلی شوربندی ءِ دو کریش پلانٹ ءُ آدگہ مزنیں مشین ءُ ساماناں ھوار بندر مانداشتگ ءُ سرجم ءَ تباہ کرتگ اَنت۔
جارکش ءَ گوشتگ کہ پنجگور ءِ ھند پروم ءَ لھتے راجدروہ پہ وتی زاتی نپاں زورگریں لشکر ءُ کشندہ ٹولی ءِ کمکار جوڑ بوتگ اَنت، ءُ بلوچ راجی زرمبشت ءِ بگیری ءَ کار ءَ اَنت، پہ دژمنیں ریاست پاکستان ءِ لشکر ءَ چاریگی ءُ کمکاری ءِ کار ءَ کنگ ءَ اَنت۔ ھمے ناشریں سرگرمیانی بلوچ ورنایانی چاریگی، پہ دژمنیں لشکر ءَ راشن سرکنگ، چیریں ادارھانی سروگاناں وتی گاڑیانی سر ءَ سپر کناھینگ، پہ دژمنیں لشکر ءَ کیمرہ ءُ سولر سسٹم ءِ مک کنگ ءُ انچیں کمکاریاں ھوار اَنت۔ وھدے کہ اے درسیں بلوچ دژمنیں کاراں تیوک ءَ لشکر گوں باپاری ءَ ھمگرنچی ءِ نام ءَ دیگ ءَ اِنت۔
آئی ءَ گوشتگ کہ پنجگور ءِ لھتے مردم لائن ءِ نام ءَ سادگیں مردماں پہ دژمنیں لشکر ءَ چاریگی ءَ لاچار کنگ ءَ اَنت۔ اے مردم پہ لشکر ءِ کمکاری ءَ انام ءَ لائن ءِ کارمستر زورگ بوتگ اَنت۔ وھدے کہ سیمسر ءِ سر ءَ پہ تیل ءِ باپاری ءَ دژمنیں لشکر آیاں اسٹیکر دیگ ءَ اِنت۔ اے مردم چہ لس مردمانی مالی جنجالاں نپ زورگ ءَ اَنت ءُ آیاں چاریگی ءِ جاہ ءَ اسٹیکر ءِ لب ءَ دیگ ءَ اَنت۔ لھتے مردم بے سلاھیں چاریگ شکار، سیل ءُ سواد، مال ءُ دلوتانی چارگ ءِ نیمون ءَ کوھاں روگ ءُ سرمچارانی بندر ءُ راھانی چارگ ءِ جھد ءَ کنگ ءَ اِنت۔
جارکش ءَ گوشتگ کہ بی ایل اے تچکی ءَ گوش ایت کہ مئے انٹلی جنس ونگ ءَ اے درسیں مردمانی سر ءَ وتی چم سک داتگ اَنت، اگاں اے شکی ئیں مردم چہ وتی راج دژمنی ءِ کار ءَ دزکش نہ بنت گڑا آ ترسناکیں آسرے ءَ سر کنگ بنت۔
آئی ءَ گوشتگ کہ بی ایل اے ءِ سرمچاراں کیچ ءِ ھند ھوشاپ تل ءَ سے روچ پیش کاروائی کرتگ ءُ مکسود ء گواران جاہ مند ھوشاپ تل سر دزگیر کرتگ اَت۔
جارکش ءَ گوشتگ کہ اے چاریگ ءُ کمکار ءَ جست ءُ پرس ءِ میان ءَ من اتگ کہ آئی پاکستانی لشکر ءِ کرنل میران ءِ گون ءَ ھوشاپ بنجل ءَ گند ءُ نند کرتگ ءُ ھمائی پرمان ءَ رند ءَ وتگڑیں کشندہ ٹولی ءِ کارمند شھداد ء بھروز ءِ سروکی ءَ چاریگی ءُ کمکاری ءَ بوتگ۔
آئی ءَ گوشتگ کہ چاریگ مکسود ءَ منّ اتگ کہ آئی ھمدردی ءِ دروشم ءَ سرمچارانی راشنانی تہ ءَ ” ٹریکنگ چِپ“ چیر داتگ ءُ اوتاک ءَ سر کرتگ۔ اود ءَ دژمنیں لشکر ءَ جنوری 2023 ءَ یک ڈرون ارشے ءَ سرمچارانی اوتاک نشانگ کرتگ ءُ اُرش بندات کرتگ ءُ چہ دژمن ءِ میڑاں ھمبلیں گل ءِ سرمچار آمر ھان پنام آبد جان، یھیا جان پنام کمبر جان، رزا پنام گزین ءُ بی ایل اے ءِ ھمبل ممتاز ء کازی پنام ملا یاسر شھید بوتگ اَنت۔
جارکش ءَ گوشتگ کہ چاریگ ءُ کمکار مکسود ءَ وتی میارباری منّ اتگ اَنت ءُ وتی آدگہ ھمبلانی نام گوشتگ اَنت۔ راجدروھی ءِ سرزد بوگ ءَ بلوچ آمیدگس ءِ سوڑگ ءِ پارست ءَ مکسود ءَ سرمچاراں کشتگ۔ وھدے کہ زراب اے نیٹورک ءِ آدگہ چاریگانی رندگیری ءَ کنگ ءَ اِنت، آ زوت گڈی آسر ءَ سر کنگ بنت۔
آئی ءَ گوشتگ کہ ھمے وڑ ءَ بی ایل اے ءِ سرمچاراں مرچی سھب ءَ شال ءِ ھند کلی کمبرانی ءَ یک انٹلی جنس بیسڈ کاروائی ءِ میان ءَ زورگریں پاکستانی لشکر ءِ چیریں ادارہ ملٹری انٹیلی جنس ( ایم آئی ) ءِ یک نزیکیں کارمندے سیدھان ء کریم بکش بگٹی تیرگواری کرتگ ءُ کشتگ۔
جارکش ءَ گوشتگ کہ پاکستانی لشکر ءَ ملٹری انٹیلی جنس ءِ کارمند سید ھان شال ءَ پہ زورگریں لشکر ءَ چاریگی ءَ ھوار مردماں پہ چاریگی ءَ زورگ ءَ ھوار بوتگ۔ اے کمکار بنیاد ءَ مھمد کالونی سوئی ڈیرہ بگٹی ءِ جاہ منند بوتگ، اے وھد ءَ کلی کمبرانی ءَ بوتگ۔
آئی ءَ گوشتگ کہ درسیں سرپدیاں پد بی ایل اے ءِ سرمچاراں مرچی سھب ءَ کلی کمبرانی شال ءَ چاریگ سیدھان تیرگواری کرتگ ءُ کشتگ ءُ آئی سلاہ دستیگ کرتگ۔
جیھند ءَ اے اُرشانی زمہ واری منّ اتگ ءُ گوشتگ کہ دیمتر ءَ اے گپ ءَ تچک کن ایں کہ بلوچ راجی زرمبشت ءُ نپانی بگیری ءَ کسےکہ پرکار بہ بیت، آ گوں کجام راج، ٹک، مذھب ءُ ٹولی ءَ ھمگرنچ بہ بیت، آ یک دژمن ءُ راجدروھے ءِ وڑ ءَ گڈی آسر ءَ سر کنگ بیت۔
