بلوچ نیشنل موومنٹ ( بی این این ) ءِ بنجاھی کارگشاد دل مراد بلوچ ءَ ماں چاگردی رسانکدر ایکس ءَ شال ءَ پاکستانی لشکر ءِ زوراکیانی بابت ءَ نبشتگ کہ منی سرپدی ءِ بنیاد ءَ شال ءَ زھرشانی کنوکانی بگیری ءَ ارش ءُ رستری آزار دیگ ءَ پاکستانی لشکر ( ریگولر آرمی )ءِ کمانڈو ھم گوں بیتگ اَنت۔
آئیءَ گوشتگ کہ بنشون ءِ رد ءَ اے کمانڈو پولیسءِ پوشاک ءَ بیتگ اَنت آیاں زوراکی ءِ درسیں سیمسرانی گواز کنگ ءِ پرمان دیگ بیتگ ، انچوش کہ اکس ءُ تامربندانی تہ ءَ گندگ بنت۔
دل مراد بلوچ ءَ گوشتگ کہ پولیس ھم زورگریں ریاست ءِ ادارہ اِنت یا زورگپتی ءِ مھکم کنوکیں کمکارے بلے ھندی مردم بوگ ءِ سوب ءَ بلکیں آ مرچی چہ اے رستری کرد ءَ شریدار بوگ ءَ پھلی بہ لوٹ اَنت ( بوت کنت اے گمانے) اے کارپد پاکستان ریاست ءِ ناشری ءُ زورگری سسا ءَ پیش دار ایت۔ پاکستان ریاست بلوچانی بگیری ءَ شوربندی ءِ بنیاد ءَ جنگ ءَ مڑگ ءَ اِنت۔ بزاں پوشاک ءَ مٹ کنت ءُ پجار ءَ چیر دنت چہ اے درسیں جستانی پسوا بہ رک ایت، بلے زورگر ءِ ھمک کرد گوستانک ءِ تاکدیماں نبیسگ بوگ ءَ اِنت۔ ایشانی جست گوستانک ءِ آمیدگس ءَ گرگ بیت۔
