جنیوا ءَ بیوکیں مراگشانی مستریں بنگپ بلوچستان ءِ ناگیگیں جاور بیت۔
راجانی سنت ءِ مردمی اگبالانی ماں جنیوا ءَ ستمبر ۔ اکتوبر 2024 ءَ بیوکیں نیادانی دْرچ ءَ بی این ایم بلوچستان ءَ مردمی اگبالانی جاور ءِ سر ءَ داں سئے روچ ءَ مراگش کنت۔ اے میان ءَ وڑ وڑیں مراگشانی پارست ءَ بلوچستان ءَ مردمی اگبالانی جاور ءُ بلوچ راجی جست سھرا کنگ بیت۔
اے مراگشانی بندات چہ 16 ستمبر ءَ بیت ، اے روچ ءَ گوں اھوالکاراں تْران کنگ بیت۔ 17 ستمبر ءَ زھرشانی بیت ءُ 17 ءَ گر داں 18 ستمبر اکسانی نمائش بیت کہ آئی ءِ تہ ءَ بلوچ ءُ بلوچستان ءِ بارہ ءَ سرپدی دیگ بیت۔
بی این ایم ءِ رسانک ’زْرمبش نیوز ‘ ءَ پہ اکسانی نمائش ءَ چہ بلوچ اکس گراں دزبندی کرتگ کہ آ ماں اے نمائش ءَ بھر زیرگ ءَ وتی اکساں زْرمبش ءَ ای میل ، واٹساپ ءُ ٹیلی گرام ءَ دیم بہ دے اَنت۔
اے مراگشاں چہ جھان ءِ جتائیں پھناتاں بی این ایم ءِ باسک ءُ سروک بھر زیر اَنت۔ اے مراگش زْرمبش نیوز ءِ پجیگ ءَ بی این ایم ءِ جتائیں چاگردی رسانکدراں تچکے ( لائب) ءَ شنگ کنگ بہ اَنت۔
بلوچ راجی زْرمبشت ( بی این ایم ) ءِ جارکش ءَ گْوشتگ پارٹی بلوچستان ءَ مردمی اگبال ءُ بلوچ راجی آجوئی ءِ زْرمبشت ءُ جست ءَ زیر ایت ءُ جھانی تْرامگیجاں ھمے نیمگ ءَ دلگوش پرین ایت۔ بلوچستان زور گپتگیں ڈیھے کہ پاکستان ءَ گوں لشکر ءَ گپتگ ، بلوچ راج گھگیری کنگ ءَ اِنت ءُ جتائیں پھنات ءُ وڑ ءُ ڈولاں بیوکیں گھگیری ءِ لپاشگ ءَ مزنیں ڈو ءُ میار کنگ ءَ اِنت۔ بلوچ سرمچارانی ارشانی دارگ ءَ بے سوب بیگ ءَ پد پاکستانی لشکر میتگاں نشانگ کنت۔پاکستان ءَ بلوچستان مارچ 1948 ءَ پہ زور گپتگ ءُ داں ھما روچ ءَ بلوچ راج ءِ سر ءَ یکشل ءَ لشکرکشی کنگ ءَ اِنت۔ اے روچاں مزنیں لشکری سروگان ءُ سیاسی واکدار بلوچستان ءِ برجاھیں چکچینی ءِ تہ ءَ چد ءُ گیشی آرگ ءِ شبین ءَ دیگ ءَ اَنت چہ ایشی ءَ آیوکیں روچاں گیشتر ھونریچی ءِ گمان اِنت۔ ایشی ءِ دارگ ءَ زیتیں میان استمانی گامگیج پکار اِنت۔
آئی ءَ گْوشتگ چہ بلوچ سرمچاراں پروش ءُ لشکری بے سوبیانی چیر دیگ ءَ پاکستانی لشکر دستگیریں بلوچانی کوش ءَ پد آیانی کنٹاں چگل دنت ، اے کار گیش کنگ بیتگ۔ اے ھما جاور اِنت کہ ایشی ءِ سر ءَ ماں جنیوا ءَ گپ بیت۔
چہ بی این ایم ءِ نیمگ ءَ مردمی اگبال ءُ بلوچ راجی کارکناں ما لوٹ ایں کہ آ اے مراگش ءَ بھر بہ زیر اَنت۔
چاگردی رسانکدر ءَ جھل ِءِ ہیش ٹیگانی پارست ءَ اے مراگش شنگ کنگ بیت۔ جارکش ءَ وتی سجھیں گل ءِ باسکان ءُ دوزواھاں گْوشتگ کہ آ چاگردی رسانکدر ءَ اے میان ءَ وتی دلگوش ءَ گیش بہ کن اَنت ءُ جتائیں زباناں شنگ بیتگیں نکاناں گوں ھیش ٹیگاں گیش ءَ گیش شنگ بہ کن اَنت۔
