شال: 27 جون 2024 ءَ زورگریں پاکستانی لشکر ءِ دست ءَ زور بیگواہ کنگ بوتگیں زھیر اھمد ء ھاجی ڈاکٹر ابداللہ ءِ کھول ءَ گوشتگ کہ سرکار ءِ نیمگ ءَ پہ زھیر اھمد ءِ یل کنگ ءَ پانزدہ روچ ءِ کول کنگ بوتگ، بلے چہ یک ماھے ءَ گوزگ ءَ پد ھم ھچ وڑیں گامگیج زورگ نہ بوتگ ءُ زھیر اھمد انگت بیگواہ اِنت۔
آئی ءَ گوشتگ کہ سرکار ءِ مردم بس گپ ءَ ٹالینگ ءَ اَنت ءُ پہ زھیر اھمد ءِ آجوئی ءَ سنگین نہ اَنت۔ نہ آیاں واک ھست بلکیں تیوک ءَ وھد زوالی کنگ ءَ اَنت۔
آئی ءَ گوشتگ کہ زھیر اھمد ءِ یل نہ کنگ ءِ سوب ءَ کھول ءَ ھمے سوڑگ کرتگ کہ آ زوت پریس کانپریس کن اَنت ءُ وتی آھوکیں گامگیج ءِ جار ءَ پرین اَنت ءُ ایمنیں زھرشانی کن اَنت۔ چہ ایشی ابید گوں مردمی ھکانی میان استمانی ءُ ھندی گل ءُ سول سوسائٹی ءَ ھوار گوں درسیں بھرگاں سیادی داروکیں مردماں لوٹ کن آں کہ آ پہ زھیر اھمد ءِ آجوئی ءَ توار چست بہ کن اَنت۔
