ھوشاپ: پرندوشی زورگریں پاکستانی لشکر ءَ ڈاکٹر مشتانک نامیں مردمے آوار جتگ ءُ بیگواہ کرتگ۔ کھول ءَ زھرشانی ءَ سی پیک دگ بند کرتگ
اھوالکار ءِ رد ءَ زور بیگواہ کنگ بوتگیں ڈاکٹر مشتاک ء سوالی ھوشاپ ءِ جاہ منند اِنت کہ پرندوشی شپ ءِ یک ءَ پاکستانی لشکر ءُ چیریں ادارھانی کارمنداں گس ءَ بیڑ برتگ ءُ آوار جتگ۔
ڈاکٹر مشتاک ءِ زوریں بیگواھی ءِ بگیری ءَ آئی کھول ءَ ھندی مردمانی ھمراھی ءَ زھرشانی ءَ سی پیک دگ بند کرتگ۔ دگ ءِ بند بوگ ءِ سوب ءَ دوئیں نیمگاں گاڑیانی مزنیں کتار اوشتاتگ اَنت۔
کھول ءِ گوشگ اِنت دانکہ ڈاکٹر مشتاک آجو نہ بوتگ ما وتی زھرشانی ءَ برجاہ دار ایں۔
ڈاکٹر مشتاک ءِ برات امام جان 3 جنوری 2024 ءَ چہ شال ءَ آوار جنگ ءُ بیگواہ کنگ بوتگ۔
